ହାଟଡିହୀ,୧୫।୨(ଶୁଭକାନ୍ତ ନାୟକ): ଜୟଦୂର୍ଗା ଫାଉଣ୍ଡେସନ ଟ୍ରଷ୍ଟ ଅଧ୍ୟକ୍ଷା ସୁରେଶ୍ୱରୀ ସାଗରୀକା ଜେନା ଏକ ଠକେଇ ମାମଲାରେ ଗତ ଶନିବାର ଗିରଫ ହେବା ପରେ ତାଙ୍କର ଠକେଇ ଗୁମର ଖୋଲିବାରେ ଲାଗିଛି । କେନ୍ଦୁଝର ଜିଲା ହାଟଡିହୀ ବ୍ଲକ ନନ୍ଦିପଦା ଥାନା ଜଳକଳଙ୍ଗ ଗ୍ରାମର ସୁରେଶ୍ୱରୀ ସାଗରୀକାଙ୍କୁ ଖଣ୍ଡଗିରି ପୋଲିସ ସ୍ଥାନୀୟ ପୋଲିସ ସହାୟତାରେ ଗିରଫ କରିଥିଲା । ଗିରଫ ପରେ ଫାଉଣ୍ଡେସନ ଅଧକ୍ଷା ସୁରେଶ୍ୱରୀଙ୍କ ନାମରେ ନନ୍ଦିପଦା ଥାନାରେ ଆଉ ଏକ ଠକେଇ ମାମଲା ମଧ୍ୟ ରହିଥିବା ଜଣାପଡିଛି । କେସ ନଂ ୧୦୬/୨୦୨୫ରେ ମାମଲା ରୁଜୁ ହୋଇଛି ।
ମାମଲାରୁ ଜଣାଯାଇଛି ଯେ ସୁଲଣ ଗ୍ରାମର ସୁଶାନ୍ତ ରାଉତଙ୍କ ପତ୍ନୀକୁ ଚାକିରି ଦେବାକୁ କହି ଫାଉଣ୍ଡେସନ ଅଧକ୍ଷା ସୁରେଶ୍ୱରୀ ୧୫ ଲକ୍ଷ ଟଙ୍କା ଠକେଇ କରିଥିଲେ । ଏହି ମାମଲାରେ ତାଙ୍କ ନାମରେ ଚାର୍ଜସିଟ କୋର୍ଟରେ ଦାଖଲ ହୋଇଥିବା ନନ୍ଦିପଦା ପୋଲିସ କହିଛି । ମହିଳା ଅଭିଯୁକ୍ତ ସୁରେଶ୍ଵରୀ ଜୟଦୂର୍ଗା ଫାଉଣ୍ଡେସନ ନାମରେ ଏକ ସଂସ୍ଥା ଗଠନ କରି ସାମାଜିକ କର୍ମୀ ଭାବେ ଚର୍ଚ୍ଚାରେ ଥିଲେ । ସୂଚନା ଯୋଗ୍ୟ, ଚାକିରି ଦେବାକୁ କହି ସୁରେଶ୍ୱରୀ ୨୨ଲକ୍ଷ ଟଙ୍କା ଠକେଇ କରିଥିବା ଖଣ୍ଡଗିରି ଥାନାରେ ମାମଲା ନଂ ୪୬୫/୨୦୨୫ ରୁଜୁ ହୋଇଥିଲା । ଗିରଫରୁ ବର୍ତ୍ତିବା ପାଇଁ ସୁରେଶ୍ୱରୀ ପ୍ରଥମେ ୧୭ ଜୁଲାଇ ୨୦୨୫ ରେ ଓଡିଶା ହାଇକୋର୍ଟଙ୍କ ନିକଟରେ ଆଗୁଆ ଜାମିନ ଆବେଦନ କରିଥିଲେ ।
୧୦ ଡିସେମ୍ବର ୨୦୨୫ ରେ ହାଇକୋର୍ଟ ସୁରେଶ୍ୱରୀଙ୍କୁ ଜାମିନ ପାଇଁ ଭୁବନେଶ୍ୱର ଜେଏମଏଫସି -ଭି କୋର୍ଟରେ ସରେଣ୍ଡର କରିବାକୁ ନିର୍ଦେଶ ଦେଇଥିଲେ । କିନ୍ତୁ ୨୦ ଜାନୁୟାରୀ ୨୦୨୬ ରେ ସୁରେଶ୍ୱରୀ ହାଇକୋର୍ଟଙ୍କ ଠାରେ ଜାମିନ ସମ୍ପର୍କିତ ଆଉ ଏକ ଦରଖାସ୍ତ କରିଥିଲେ । ୨୯ ଜାନୁୟାରୀ ୨୦୨୬ ରେ ଶୁଣାଣି ହୋଇ ଦରଖାସ୍ତକୁ ହାଇକୋର୍ଟ ରିଜେକ୍ଟ କରିଦେଇଥିଲେ । ଜାମିନ ନିମନ୍ତେ ଦ୍ଵିତୀୟ ଥର ପାଇଁ ସୁରେଶ୍ୱରୀ ୩୦ ଜାନୁୟାରୀ ୨୦୨୬ରେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ଏବିଏଲଏପିଏଲ ନଂ ୧୬୬୪/୨୦୨୬ ଅଟେ । ଏହି ମାମଲାର ବର୍ତ୍ତମାନ ସୁଦ୍ଧା ଶୁଣାଣି ହୋଇନାହିଁ ।
ଉକ୍ତ ଠକେଇ ମାମଲାରୁ ଆଶ୍ବସ୍ତି ପାଇବା ପାଇଁ ସୁରେଶ୍ୱରୀ ଅନ୍ୟ ଏକ ମାମଲା ମଧ୍ୟ ହାଇକୋର୍ଟଙ୍କ ଠାରେ ଦାୟର କରିଥିଲେ । କିନ୍ତୁ ଗିରଫରୁ ବର୍ତ୍ତିବା ପାଇଁ କୌଣସି ଆଶ୍ବସ୍ତି ମିଳିନଥିଲା । ସିଆରଏଲଏମସି ନଂ ୫୪୧୨/୨୦୨୫ ଅଟେ । ଏହି ମାମଲାର ଶୁଣାଣି କରି ହାଇକୋର୍ଟ ଗତ ୧୮ ଡିସେମ୍ବର ୨୦୨୫ ରେ ଅପର ପକ୍ଷଙ୍କୁ ନୋଟିସ ଜାରି ପାଇଁ ନିର୍ଦେଶ ଦେଇଥିଲେ । ଯାହାକି ଏବେ ବିଚାରଧୀନ ଅଛି ।
