ମୁମ୍ବାଇ,୨୯।୮: ଡ୍ରଗ୍ସ ମାମଲାରେ ଅଭିନେତା ଅରମାନ କୋହଲି ଗିରଫ ହୋଇଛନ୍ତି। ଦୀର୍ଘ ଦିନ ଧରି ପଚରାଉଚରା ପରେ ଏନସିବି ପକ୍ଷରୁ କୋହଲିଙ୍କୁ ଗିରଫ କରାଯାଇଛି। ଶନିବାର ସାରେ ଏନସିବି କୋହଲିଙ୍କୁ ଘରେ ପଚରାଉଚରା କରିଥିଲେ। ଏହି ସମୟରେ ତାଙ୍କ ଘରୁ ଡ୍ରଗ୍ସ୍ ଜବତ କରାଯାଇଥିଲା।
ଏନସିବି ଅନୁଯାୟୀ, ଜଣେ ଡ୍ରଗ୍ସ୍ ବେପାରୀଙ୍କ ମାଧ୍ୟମରେ କୋହଲିଙ୍କୁ ଯାଞ୍ଚ୍ ପରିସର ଭୁକ୍ତ କରାଯାଇଛି। ବଲିଉଡର ବହୁ ଖ୍ୟାତି ସମ୍ପନ୍ନ ବ୍ୟକ୍ତି ବିଶେଷ ଏହି ମାମଲାରେ ଜଡିତ ଅଛନ୍ତି। ତେଣୁ କୋର୍ଟରେ ଅରମାନଙ୍କୁ ସର୍ବାଧିକ ରିମାଣ୍ଡରେ ନେବାକୁ ଏନସିବି ପକ୍ଷରୁ ଚେଷ୍ଟା କରାଯିବ ବୋଲି କୁହାଯାଉଛି। କୋହଲି ପରେ ଆଗାମୀ ଦିନରେ ଆଉ କିଛି ବ୍ୟକ୍ତିଙ୍କୁ ମଧ୍ୟ ଗିରଫ କରାଯିବାର ସମ୍ଭାବନା ରହିଥିବା ଏନସିବି କହିଛି। ଜଣେ ବଡ ଡ୍ରଗ୍ସ ବ୍ୟବସାୟୀ ଅଜୟ ରାଜୁ ସିଂହ ଏଠାରୁ ଧରାପଡିଥିଲେ ଏବଂ ତାଙ୍କଠାରୁ ୨୫ ଗ୍ରାମ ଏମ୍ଡ଼ି ଜବତ କରିଥିଲେ। ଏନ୍ଡିପିଏସ୍ ଆକ୍ଟର ଧାରା ୨୧ (ଏ), ୨୭ (ଏ), ୨୮, ୨୯, ୩୦, ଏବଂ ୩୫ ଅନୁଯାୟୀ କୋହଲିଙ୍କୁ ଗିରଫ କରାଯାଇଛି। ଅନ୍ୟପକ୍ଷରେ, ଏନଡିପିଏସ ଆକ୍ଟର ଧାରା ୨୨ ବି (ଏ), ୨୭ ଏ, ୨୮, ୨୯, ୩୦, ଏବଂ ୩୫ ଅନୁଯାୟୀ ଅଜୟ ରାଜୁ ସିଂହଙ୍କୁ ଗିରଫ କରାଯାଇଛି। ଏପର୍ଯ୍ୟନ୍ତ ଅନୁସନ୍ଧାନରେ ଏହା ସାମ୍ନାକୁ ଆସିଛି ଯେ ଏହି ମାମଲାର ଚେର ବିଦେଶୀ ଦେଶ ସହ ଜଡିତ। ଉଦ୍ଧାର ହୋଇଥିବା କୋକେନ ଦକ୍ଷିଣ ଆମେରିକାର ବୋଲି କୁହାଯାଇଛି। ଏହି ଘଟଣାରେ ଅଧିକ ତଦନ୍ତ ଜାରି ରହିଛି।
