ଅହମଦାବାଦ, ୨୨।୩ (ପି.ଟି.)-ଡାହାଣ କହୁଣିରେ ଆଘାତ ଲାଗିଥିବାରୁ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ପ୍ରଥମ ଭାଗ ଖେଳିବେନି ଇଂଲଣ୍ଡର ଷ୍ଟାର ପେସ୍ ବୋଲର ଜୋଫ୍ରା ଆର୍ଚର। ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ତରଫରୁ ରବିବାର ଏହି ସୂଚନା ଦିଆଯାଇଛି। ମଙ୍ଗଳବାରଠାରୁ ପୁଣେଠାରେ ଆରମ୍ଭ ହେବାକୁଥିବା ଭାରତ ବିପକ୍ଷ ୩ ମ୍ୟାଚ ବିଶିଷ୍ଟ ଅନ୍ତର୍ଜାତୀୟ ଦିନିକିଆ ସିରିଜ ପାଇଁ ରବିବାର ଘୋଷଣା କରାଯାଇଥିବା ୧୪ ଜଣିଆ ଦଳରୁ ଆର୍ଚରଙ୍କୁ ବାଦ୍ ଦିଆଯାଇଛି। ଏହି ୨୫ବର୍ଷୀୟ ପେସ୍ ବୋଲର ସ୍ବଦେଶ ଫେରିଛନ୍ତି। ଆର୍ଚରଙ୍କ କିଭଳି ଚିକିତ୍ସା କରାଯିବ ତାହାର ଯୋଜନା ଇସିବି ମେଡିକାଲ ଟିମ୍ ସ୍ଥିର କରିବ। ଆର୍ଚରଙ୍କ କହୁଣିରେ ସମସ୍ୟା ଦେଖାଦେବାରୁ ସେ ଭାରତ ବିପକ୍ଷ ଅନ୍ତିମ ଟେଷ୍ଟ ଖେଳିପାରି ନ ଥିଲେ। କିନ୍ତୁ ଟି୨୦ ସିରିଜକୁ ପ୍ରତ୍ୟାବର୍ତ୍ତନ କରି ୭ ଉଇକେଟ ଅକ୍ତିଆର କରିଥିଲେ। ତନ୍ମଧ୍ୟରେ ଚତୁର୍ଥ ଗେମ୍ରେ ତାଙ୍କ କ୍ୟାରିୟରର ଶ୍ରେଷ୍ଠ ବୋଲିଂ ୩୩/୪ ଅନ୍ତର୍ଭୁକ୍ତ। ଚଳିତବର୍ଷ ଆଇପିଏଲ୍ ଏପ୍ରିଲ ୯ରୁ ଆରମ୍ଭ ହେବା କାର୍ଯ୍ୟକ୍ରମ ରହିଛି।
