ମୁମ୍ବାଇ: ଶାହାରୁଖ ଖାଁ ଓ ମହିମା ଚୌଧୁରୀ ଷ୍ଟାରର ମୁଭି ‘ପରଦେଶ’ରେ ରାଜୀବ ଭୂମିକାରେ ଦର୍ଶକଙ୍କ ହୃଦୟ ଜିତିଥିବା ଅଭିନେତା ଅପୂର୍ବ ଅଗ୍ନିହୋତ୍ରୀ ଏବେ ପିତା ହୋଇଛନ୍ତି । ନିକଟରେ ଅଭିନେତା ତାଙ୍କ ଜନ୍ମଦିନରେ ଏହି ଖୁସି ଖବର ଦେଇଥିଲେ । ଅପୂର୍ବ ଅଗ୍ନିହୋତ୍ରୀ ଓ ଅଭିନେତ୍ରୀ ଶିଳ୍ପା ସକଲାନି ବିବାହର ୧୮ ବର୍ଷ ପରେ ପ୍ୟାଣ୍ଟେସ ହୋଇଛନ୍ତି । ଉଭୟ ଗ୍ଲାମର ୱାର୍ଲଡର ଚର୍ଚ୍ଚିତ କପଲ ମଧ୍ୟରୁ ଅନ୍ୟତମ । ଆଉ କିଛିଦିନ ହେବ ଉଭୟ ଡ୍ରଗ୍ସ ମାମଲାକୁ ନେଇ ବି ରହିଥିଲେ ଖୁବ୍ ଚର୍ଚ୍ଚାରେ । ଯାହାହେଉ ଏବେ କିନ୍ତୁ ଅପୂର୍ବ ଓ ଶିଳ୍ପାଙ୍କର ଭଲ ସମୟ ଚାଲିଛି । କାରଣ ଉଭୟ ପ୍ରଥମଥର ଲାଗି ମାତାପିତା ହୋଇଛନ୍ତି । ତାହା ପୁଣି ବିବାହର ୧୮ ବର୍ଷ ପରେ ।
ନିକଟରେ ଅଭିନେତା ସୋସିଆଲ ମିଡିଆରେ ଏକ କ୍ୟୁଟ ଭିଡିଓ ଶେୟାର କରି ଏହି ସୂଚନା ଦେଇଛନ୍ତି । ଏହାସହ ଉକ୍ତ ଭିଡିଓରେ ସେ ତାଙ୍କ ଝିଅକୁ ବି ଦେଖାଇଛନ୍ତି । ଆଉ କ୍ୟାପଶନରେ ଶିଳ୍ପା ଓ ଅପୂର୍ବ ତାଙ୍କର ଖୁସି ଜାହିର କରିଛନ୍ତି । ଏହାସହ ଅଭିନେତା କ୍ୟାପଶନରେ ଲେଖିଛନ୍ତି, ଚଳିତ ବର୍ଷର ଜନ୍ମଦିନ ଆମ ପାଇଁ ସବୁଠାରୁ ଅଧିକ ଗୁରୁତ୍ୱ ରଖେ କାରଣ ଏଥର ଭଗବାନ ଆମକୁ ସବୁଠାରୁ ନିଆରା, ଅବିଶ୍ୱନୀୟ, ଅଦ୍ଭୁତ, ଚମତ୍କାରୀ ଉପହାର ସହ ଆଶୀର୍ବାଦ ଦେଇଛନ୍ତି । ଅତ୍ୟନ୍ତ ଖୁସିର ସହ ଶିଳ୍ପା ଓ ମୁଁ ଆମ ଝିଅ ଇଶାନୀ କାନୁ ଅଗ୍ନିହୋତ୍ରୀଙ୍କୁ ଆପଣଙ୍କ ସହ ପରିଚିତ କରାଉଛୁ । ଦୟାକରି ତାକୁ ଆପଣଙ୍କ ଭଲପାଇବା ଓ ଆଶୀର୍ବାଦରେ ଗାଧୋଇ ଦିଅନ୍ତୁ । ଓଁ ନମୋ ଶିବାୟ ।
ଏହି ଭିଡିଓରେ ଶିଳ୍ପା ତାଙ୍କ ଝିଅ ଇଶାନୀଙ୍କୁ କୋଳରେ ଉଠାଇ ଧରିଥିବା ନଜର ଆସିଛି । ଆଉ ଅପୂର୍ବ ଖୁବ୍ ଭଲପାଇବା ସହ ଝିଅକୁ ଦେଖୁଛନ୍ତି । ଅପୂର୍ବ ଯେମିତି ଏହାକୁ ଶେୟାର କରିଛନ୍ତି କିଛି କ୍ଷଣ ମଧ୍ୟରେ ଶୁଭେଚ୍ଛାର ସୁଅ ଛୁଟିଲା ।
