ଲମ୍ବା କେଶ ରଖିବା ସବୁ ନାରୀଙ୍କ ପସନ୍ଦ ହୋଇଥାଏ। ବେଳେ ବେଳେ ଏହି ପସନ୍ଦ ପୁରୁଷଙ୍କ କ୍ଷେତ୍ରରେ ମଧ୍ୟ ଦେଖାଦେଇଥାଏ। ପୁରୁଷମାନେ ଲମ୍ବା ଲମ୍ବା କେଶ ରଖିବା ଏହା ଏବେ ଫ୍ୟାଶନ୍ ପାଲଟିଗଲାଣି। ହେଲେ ପରିଣତ ବୟସରେ ଜଣେ ବୃଦ୍ଧ ଲମ୍ବା କେଶ ରଖି ଚର୍ଚ୍ଚାକୁ ଆସିବା ସହ ସମସ୍ତଙ୍କୁ ଚକିତ କରିଛନ୍ତି। ଏହି ଦୃଶ୍ୟ ଦେଖିବାକୁ ମିଳିଛି କର୍ନାଟକ ଚିତ୍ରଦୁର୍ଗା ଜିଲାର ମୋଲାକାଲମୁରୁର ସହରରେ। ଉକ୍ତ ସହରରେ ରହୁଥିବା ୯୫ବର୍ଷୀୟ ଡୋଡାପାଲି ନାମକ ଜଣେ ବୃଦ୍ଧଙ୍କ କେଶକୁ ଦେଖିଲେ ଯେକେହିବି ଆଶ୍ଚର୍ଯ୍ୟ ହୋଇଯିବ। ବର୍ତ୍ତମାନ ଲକ୍ଡାଉନ ସମୟରେ ଲୋକମାନେ ନିଜ କେଶ କାଟିବା ପାଇଁ ବେଶ୍ ଅସୁବିଧା ଭୋଗୁଛନ୍ତି। କିନ୍ତୁ ଉକ୍ତ ବୃଦ୍ଧ ଜଣଙ୍କର ଏହି ସମସ୍ୟା ଆଦୌ ନାହିଁ। କାରଣ ସେ କେବେ କେଶ କାଟନ୍ତି ନାହିଁ। ବର୍ତ୍ତମାନ ତାଙ୍କ କେଶର ଲମ୍ବ ୨୪ ଫୁଟ (୭.୩. ମିଟର)। ଶୁଣିଲେ ଆଶ୍ଚର୍ଯ୍ୟ ଲାଗୁଛି ନା ହେଲେ କଥାଟି ସତ।
କାରଣ ଡୋଡାପାଲି ତାଙ୍କ ଜୀବନରେ ଥରେ ବି କେବେ କେଶ କାଟି ନାହାନ୍ତି। ଉକ୍ତ କେଶ ତାଙ୍କ ମୁଣ୍ଡ ଉପରେ ରଖାଯାଇଥିବା ଏକ ଗଣ୍ଠିଲି ସଦୃଶ୍ୟ ଭଳି ଦେଖାଯାଏ। ଏହାକୁ ବାନ୍ଧିବା ପାଇଁ ସେ ଆଖପାଖ ଲୋକଙ୍କ ସାହାଯ୍ୟ ଲେଡିଥାନ୍ତି। ଏହି କେଶ ପାଇଁ ସେ ବହୁ ଅସୁବିଧାର ସମ୍ମୁଖୀନ ହେଲେ ମଧ୍ୟ ଏହାକୁ କାଟିବାକୁ ପସନ୍ଦ କରନ୍ତି ନାହିଁ। ସବୁଠାରୁ ବଡ଼ କଥା ହେଲା ଡୋଡାପାଲିଙ୍କ ଏହି କେଶ ପାଇଁ ସ୍ଥାନୀୟ ଅଞ୍ଚଳର ଲୋକେ ତାଙ୍କୁ ଭଗବାନଙ୍କ ଦୂତ ଭାବେ ସମ୍ମାନ ଦିଅନ୍ତି। ଡୋଡାପାଲିଙ୍କ ଲମ୍ବା କେଶ ଏବେ ସୋସିଆଲ ମିଡିଆରେ ଭାଇରାଲ ହୋଇଥିବା ବେଳେ ଏହା ଏବେ ଚର୍ଚ୍ଚାର ବିଷୟ ପାଲଟିଛି।
