ଭୁବନେଶ୍ୱର,୧ା୧୦(ବ୍ୟୁରୋ): ରାଜଧାନୀରେ ପୁଣି ଜଣେ ଯୁବତୀ ଆତ୍ମହତ୍ୟା କରିଛନ୍ତି। ନୟାପଲ୍ଲୀ ଥାନା ଅନ୍ତର୍ଗତ ନୂଆସାହିରେ ଶୁକ୍ରବାର ବିଳମ୍ବିତ ରାତିରେ ଏଭଳି ଅଭାବନୀୟ ଘଟଣା ଘଟିଛି। ମୃତ ଯୁବତୀ ଜଣଙ୍କ ହେଲେ ଢେଙ୍କାନାଳ ଜିଲାର କବିତା ବାରିକ। ଆତ୍ମହତ୍ୟାର ପ୍ରକୃତ କାରଣ ଜଣାପଡ଼ି ନାହିଁ। ଖବର ପାଇ ପୋଲିସ ସାଇଣ୍ଟଫିକ୍ ଟିମ୍ ସହାୟତାରେ ମୃତଦେହ ଜବତ କରି ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲ ପଠାଇଥିଲା। ଏହାପରେ ପରିବାର ଲୋକଙ୍କ ଉପସ୍ଥିତିରେ ବ୍ୟବଚ୍ଛେଦ ପରେ ପୋଲିସ ହସ୍ତାନ୍ତର କରିଥିଲା। ଏନେଇ କବିତାଙ୍କ ପରିବାର ପକ୍ଷରୁ ଥାନାରେ କୌଣସି ଅଭିଯୋଗ ହୋଇ ନ ଥିଲେ ମଧ୍ୟ ଏହାର କାରଣ ଖୋଜିବାକୁ ପୋଲିସଙ୍କୁ ପରିବାର ଲୋକେ କହିଛନ୍ତି। ପୋଲିସ କେସ୍ ନଂ ୮୬/୨୨ରେ ଏକ ଅପମୃତ୍ୟୁ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି। ଏହାସହ ତାଙ୍କ ନିକଟରୁ ଏକ ସୁଇସାଇଡ୍ ନୋଟ୍ ଜବତ କରିଛି ପୋଲିସ। ତେବେ ଏଥିରେ ସେ କୌଣସି କାରଣ ଉଲ୍ଲେଖ କରି ନ ଥିବା ପୋଲିସ ପକ୍ଷରୁ ସୂଚନା ମିଳିଛି।
ପୋଲିସ ସୂଚନାନୁସାରେ, କବିତା ଏଠାରେ ଏକ ସେବା ପ୍ରଦାନକାରୀ ସଂସ୍ଥାର କର୍ମଚାରୀ ଭାବେ କାମ କରୁଥିଲେ। ଗତ ୨ ମାସ ଧରି ନୟାପଲ୍ଲୀ ଅଞ୍ଚଳର ଜଣେ ୯୩ ବର୍ଷୀୟା ବୃଦ୍ଧାଙ୍କ ପାଖରେ କେୟାରଟେକର ଭାବେ ରହି ତାଙ୍କ ସେବା କରୁଥିଲେ। ଉଭୟ ଗୋଟିଏ ରୁମ୍ରେ ରହୁଥିଲେ। ତେବେ ଶନିବାର ମଧ୍ୟାହ୍ନ ପର୍ଯ୍ୟନ୍ତ କବାଟ ବନ୍ଦ ଥିବାରୁ ଅନ୍ୟ ସଦସ୍ୟମାନେ କବାଟ ବାଡ଼ାଇଥିଲେ। କିନ୍ତୁ ଭିତର ପଟୁ ମୃତା କବିତାଙ୍କ କୌଣସି ଉତ୍ତର ଆସି ନ ଥିଲା। ଏହାପରେ ଉକ୍ତ ରୁମ୍ରେ ଶୋଇଥିବା ୯୩ ବର୍ଷୀୟା ବୃଦ୍ଧା କବାଟ ଖୋଲିବାରୁ କବିତା ଓଢ଼ଣୀ ସାହାଯ୍ୟରେ ଫ୍ୟାନ୍ରେ ଝୁଲି ପଡ଼ିଥିବା ଦେଖିବାକୁ ମିଳିଥିଲା। ଏହାପରେ କଣ୍ଟ୍ରୋଲ ରୁମ୍କୁ ଖବର ଦିଆଯିବାରୁ ପିସିଆର ଭ୍ୟାନ୍ ପହଞ୍ଚି ମୃତଦେହ ଜବତ କରିଥିଲା।
