ମସ୍କୋ/କ୍ୱିଭ୍, ୧୮।୪ : ୟୁକ୍ରେନ ଯୁଦ୍ଧ ରୁଷିଆ ପାଇଁ ଏବେ ଗଳାର କଣ୍ଟା ପାଲଟିଛି। ଯୁଦ୍ଧ ଯୋଗୁ ରୁଷିଆ ସବୁଆଡୁ ପ୍ରତିରୋଧର ସମ୍ମୁଖୀନ ହେବାରେ ଲାଗିଛି। ରୁଷିଆ କେବେ ବି ଭାବି ନ ଥିଲା ଯେ ୟୁକ୍ରେନ ଏପରି ଚ୍ୟାଲେଞ୍ଜ କରିବ। ଏହାର କାରଣ ହେଉଛି ଯେ ୟୁକ୍ରେନ ଉପରେ ଆକ୍ରମଣ କରିବା ପରେ ରୁଷିଆରେ ବିରୋଧରେ ସହାୟତା କ୍ୱିଭ୍ରେ ପହଞ୍ଚିବାରେ ଲାଗିଛି।
ଇତିମଧ୍ୟରେ ଯୁଦ୍ଧରେ ରୁଷିଆର ୮ ଜେନେରାଲ ଏବଂ ୩୪ ଜଣ କର୍ନେଲଙ୍କ ମୃତ୍ୟୁ ଘଟିଛି। ପ୍ରଥମ ବିଶ୍ୱଯୁଦ୍ଧ ପରେ ବରିଷ୍ଠ ସେନା ଅଧିକାରୀଙ୍କସ୍ତରରେ ରୁଷିଆ ସେନାରେ ଏହା ସର୍ବାଧିକ ମୃତ୍ୟୁ। କିନ୍ତୁ ଏହା ପରେ ମଧ୍ୟ ରୁଷିଆ ପଛକୁ ହଟିବାକୁ ପ୍ରସ୍ତୁତ ନୁହେଁ। ସେହିପରି ବହୁ ଧୟଧତି ପରେ ବି ୟୁକ୍ରେନ୍ ମୁଣ୍ଡ ନୋଇବାକୁ ଚାହୁଁନାହିଁ।
ଶନିବାର ରୁଷିଆର ଆଉ ଜଣେ ଜେନେରାଲଙ୍କ ମୃତ୍ୟୁ ଘଟିଛି।
ରିପୋର୍ଟ ଅନୁଯାୟୀ, ଜେନେରାଲଙ୍କ ମୃତଦେହକୁ ସେଣ୍ଟ ପିଟର୍ସବର୍ଗରେ ସମାଧି ଦିଆଯାଇଛି। ନିହତ ଜେନେରାଲଙ୍କୁ ମେଜର ଜେନେରାଲ ଭ୍ଲାଦିମିର ଫ୍ରୋଲୋଭ ବୋଲି ଚିହ୍ନଟ କରାଯାଇଛି। ସେ ଅଷ୍ଟମ ସେନାର ଡେପୁଟି କମାଣ୍ଡର ଥିଲେ।
ସେ, ତାଙ୍କ ୟୁନିଟ ସହିତ, ମାରିଆପୋଲ ବନ୍ଦରକୁ କିଛି ସପ୍ତାହ ଧରି ଦଖଲ କରିଥିଲେ। ଶନିବାର ୟୁକ୍ରେନ ସୈନ୍ୟଙ୍କ ଦ୍ୱାରା ହୋଇଥିବା ଆକ୍ରମଣରେ ତାଙ୍କର ମୃତ୍ୟୁ ହୋଇଥିଲା।
କେବଳ ଜେନେରାଲ ନୁହଁନ୍ତି, ଉଭୟ ପକ୍ଷର ହଜାର ହଜାର ରୁଷିଆ ସୈନିକଙ୍କର ମଧ୍ୟ ମୃତ୍ୟୁ ଘଟିଛି। ଯୁଦ୍ଧରେ ରୁଷିଆର ସାମରିକ କ୍ଷୟକ୍ଷତି ଆଶା କରାଯାଉଥିବା ଠାରୁ ଅଧିକ ହୋଇଛି।
ୟୁକ୍ରେନ ଦାବି କରିଛି ଯେ ଏହି ଯୁଦ୍ଧ ଆରମ୍ଭରୁ ରୁଷିଆର ୨୦,୦୦୦ ରୁ ଅଧିକ ସୈନ୍ୟଙ୍କ ମୃତ୍ୟୁ ହୋଇଛି। ତେବେ ଏହାକୁ ନେଇ ରୁଷିଆ ପକ୍ଷରୁ କୌଣସି ତଥ୍ୟ ପ୍ରଦାନ କରାଯାଇନାହିଁ।
