ଜଗତ୍ସିଂହପୁର ଅଫିସ, ୧୮ା୨: ଆଗାମୀ ସାଧାରଣ ନିର୍ବାଚନ ପୂର୍ବରୁ ଭାଜପା ବରିଷ୍ଠ ନେତା ତଥା କେନ୍ଦ୍ର ମନ୍ତ୍ରୀମାନଙ୍କ ଗସ୍ତ ଓ ସମୀକ୍ଷାକୁ ନେଇ ଜିଲାରେ ଚର୍ଚ୍ଚା ଜୋର ଧରିଛି। ଗୁରୁବାରଠାରୁ ରେଳ ଓ ବୟନ ଶିଳ୍ପ ରାଷ୍ଟ୍ରମନ୍ତ୍ରୀ ଦର୍ଶନା ଜରଦୋଶ ୨ ଦିନିଆ ଜଗତ୍ସିଂହପୁର ଜିଲା ଗସ୍ତ କରି ଶୁକ୍ରବାର ମଧ୍ୟାହ୍ନରେ ଜିଲାପାଳଙ୍କ କାର୍ଯ୍ୟାଳୟ ପରିସରରେ ସମୀକ୍ଷା କରିଥିଲେ। ବିଶେଷକରି କେନ୍ଦ୍ରୀୟ ଯୋଜନାଗୁଡିକର କାର୍ଯ୍ୟାନ୍ବୟନ ଓ ଅଗ୍ରଗତି ସମ୍ପର୍କରେ ପଚାରି ବୁଝିଥିଲେ। ଏହା ଉପରେ ଜିଲାପାଳ ପାରୁଲ ପଟୱାରି ବିସ୍ତୃତ ସୂଚନା ଦେଇଥିଲେ। ସେ କହିଥିଲେ, ଗତ ୫ ବର୍ଷରେ ଅର୍ଥାତ୍ ୨୦୨୦-୨୧ ଆର୍ଥିକ ବର୍ଷ ପର୍ଯ୍ୟନ୍ତ ଜିଲାରେ ପ୍ରଧାନମନ୍ତ୍ରୀ ଆବାସ ଯୋଜନାରେ ୧୬,୩୮୩ ଜଣ ହିତାଧିକାରୀଙ୍କ ଗୃହ ନିର୍ମାଣ ପୂର୍ଣ୍ଣ ହୋଇପାରିଛି। ଆଉ ୧୦,୨୪୦ ହିତାଧିକାରୀଙ୍କ ତାଲିକା ଅନୁମୋଦନ ହୋଇଛି। ସେହିପରି ପ୍ରଧାନମନ୍ତ୍ରୀ ଉଜ୍ଜ୍ୱଳା ଯୋଜନାରେ ୧,୨୯,୨୬୮ ଜଣ ହିତାଧିକାରୀଙ୍କୁ ଜାଳେଣି ଗ୍ୟାସ୍ ଯୋଗାଇ ଦିଆଯାଇପାରିଛି । ପ୍ରଧାନମନ୍ତ୍ରୀ ଫସଲ ବୀମା ଯୋଜନାରେ ବୀମା ଦାୟିତ୍ୱ ଏଚ୍ଡିଏଫ୍ସିଇଆର୍ଜିଓ ଉପରେ ନ୍ୟସ୍ତ କରାଯାଇଛି। ଏହି କମ୍ପାନୀ ୨୦୨୨-୨୩ରେ ୧୮,୧୬୩ ଚାଷୀଙ୍କ ୮,୨୧୦ ହେକ୍ଟର ଚାଷ ଜମିକୁ ବୀମା ଅନ୍ତର୍ଭୁକ୍ତ କରିପାରିଛି। ସେହିପରି ପିଏମ୍ କିଷାନ ସମ୍ମାନନିଧି ଯୋଜନାରେ ୧,୨୩,୬୫୩ ଯୋଗ୍ୟ ହିତାଧିକାରୀଙ୍କ ମଧ୍ୟରୁ ୧,୧୯,୧୩୭ ଚାଷୀଙ୍କ ଆଧାର ପ୍ରାମାଣିକୀକରଣ ଯାଞ୍ଚ କରାଯାଇଛି। ଜାତୀୟ ସାମାଜିକ ସୁରକ୍ଷା ଯୋଜନାରେ ଜିଲାରେ ୫୫,୭୯୫ ହିତାଧିକାରୀଙ୍କୁ ସହାୟତା ଯୋଗାଇବା ପାଇଁ ଲକ୍ଷ୍ୟ ରଖାଯାଇଥିବାବେଳେ ୫୫,୧୩୮ ଜଣଙ୍କ ନାମ ଚୟନ ପରେ ଡିବିଟି ମାଧ୍ୟମରେ ମାସିକ ଭତ୍ତା ଯୋଗାଇ ଦିଆଯାଉଛି। ଜାତୀୟ ପରିବାର ମଙ୍ଗଳ ଯୋଜନାରେ ୨୦୨୨-୨୩ ଆର୍ଥିକ ବର୍ଷ ୩୨୧ ଜଣ ହିତାଧିକାରୀଙ୍କୁ ୨୦ ହଜାର ଟଙ୍କା ଲେଖାଏ ସହାୟତା ରାଶି ପ୍ରଦାନ କରାଯାଇଛି। ଜଳଜୀବନ ମିଶନ ଅନ୍ତର୍ଗତ ୨୨୬ଟି ପ୍ରକଳ୍ପ ମଧ୍ୟରୁ ୪୫ଟିର ନିର୍ମାଣ କାର୍ଯ୍ୟ ଶେଷ ହୋଇଥିବାବେଳେ ୧୮୧ଟିର କାର୍ଯ୍ୟ ଚାଲୁ ରହିଛି। ୭୫ଟି ଅମୃତ ସରୋବର ନିର୍ମାଣ ନିମନ୍ତେ ଲକ୍ଷ୍ୟଧାର୍ଯ୍ୟ କରାଯାଇଥିବା ବେଳେ ସେଥିରୁ ୧୩ଟି ପୂର୍ଣ୍ଣ ହୋଇପାରିଥିବା ଜିଲାପାଳ ସୂଚନା ଦେଇଥିଲେ। ବଡ କଥା ହେଲା ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନାର ସଫଳ ରୂପାୟନରେ କୌଣସି ପ୍ରକାର ଅବହେଳାକୁ ଗ୍ରହଣ କରାଯିବ ନାହିଁ। ଜାତୀୟ ଖାଦ୍ୟ ସୁରକ୍ଷା ଯୋଜନା ଅନ୍ତର୍ଗତ ୱାନ ନେସନ ୱାନ ରାଶନ କାର୍ଡ ଯୋଜନାର କାର୍ଯ୍ୟକାରିତାରେ ଆଦୌ ବିଳମ୍ବ ହେବା ଉଚିତ ନୁହେଁ ବୋଲି ମନ୍ତ୍ରୀ ପରାମର୍ଶ ଦେଇଥିଲେ। ବୈଠକରେ ଅନ୍ୟମାନଙ୍କ ମଧ୍ୟରେ ଅତିରିକ୍ତ ଜିଲାପାଳ ଚିନ୍ମୟୀ ବିଶ୍ୱାଳ, ଅତିରିକ୍ତ କାର୍ଯ୍ୟନିର୍ବାହୀ ଅଧିକାରୀ, ଜିଲା ପରିଷଦ ଅଭିମନ୍ୟୁ ପଣ୍ଡା, ଜିଲା ମୁଖ୍ୟ କୃଷି ଅଧିକାରୀ ପ୍ରଫୁଲ୍ଲ ଚନ୍ଦ୍ର ସେଠୀ, ଜିଲା ଯୋଗାଣ ଅଧିକାରୀ ସୁଜାତା ମିଶ୍ର, ଆର୍ଡବ୍ଲ୍ୟୁଏସ୍ଏସ୍ ଅଧୀକ୍ଷଣ ଯନ୍ତ୍ରୀ କିଶୋର କୁମାର କବି, ଉପନିର୍ଦ୍ଦେଶକ ବୟନ ଶିଳ୍ପ, ସହକାରୀ ନିର୍ଦ୍ଦେଶକ, ହସ୍ତଶିଳ୍ପ ପ୍ରମୁଖ ଉପସ୍ଥିତ ଥିଲେ।
