ପୋଲସରା,୧୩।୧୨(ସୁବ୍ରତ ବେହେରା): ଗର୍ଭବତୀ ଓ ପ୍ରସ୍ତୁତି ମହିଳା ହିତାଧିକାରୀମାନଙ୍କୁ ଅଙ୍ଗନୱାଡ଼ି କେନ୍ଦ୍ରରେ ନିମ୍ନମାନର ଛତୁଆ ବଣ୍ଟନ କରାଯାଉଛି। ଏପରି ଘଟଣା ଘଟିଛି ପୋଲସରା ବ୍ଲକ ବାଲିଛାଇ ଗ୍ରାମ ପଞ୍ଚାୟତର ଡୋଙ୍ଗରୀ ଅଙ୍ଗନୱାଡ଼ି କେନ୍ଦ୍ରରେ। ଛତୁଆ ଗଚ୍ଛିତ ରଖିଥିବା ବେଳେ ସେଗୁଡ଼ିକୁ ମୂଷା କାଟି ଦେଇଥିବା ଦାୟିତ୍ୱରେ ଥିବା ଅଙ୍ଗନୱାଡ଼ି ଦିଦି ଓ ଅଭିଭାବକ କହିଛନ୍ତି। ସେହି ଛତୁଆ ପକେଟକୁ ୮ ଦିନ ପରେ ବଣ୍ଟନ କରାଯାଉଛି। ସେହି ଛତୁଆକୁ ଗର୍ଭବତୀ ମହିଳା ଖାଇଲେ ସ୍ବାସ୍ଥ୍ୟ ଖରାପ ହେବାର ସମ୍ଭାବନା ରହିଛି। ଫଳରେ ଛତୁଆର ମାନ ଯାଞ୍ଚ କରାଯିବା ନେଇ ଦାବି ଜୋର ଧରିଛି। ଉକ୍ତ କେନ୍ଦ୍ରରେ ୩୫ ଜଣଙ୍କ ନାମ ପଞ୍ଜୀକରଣ ହୋଇଥିବା ବେଳେ ୨୮ ଜଣ ଶିଶୁ ଓ ୭ ଜଣଙ୍କ ଗର୍ଭବତୀ ମହିଳାଙ୍କ ନାମ ପଞ୍ଜୀକୃତ ହୋଇଛି। ଏହା ସହିତ ଡୋଙ୍ଗରି ଗ୍ରାମରେ ଅନେକ ୧୫ ରୁ ୧୯ ବର୍ଷର କିଶୋର ବାଳିକା ରହିଥିବା ବେଳେ ୧୧ ଜଣ ନାମ ପଞ୍ଜିକୃତ କରିଛନ୍ତି ଅଙ୍ଗନୱାଡ଼ି ଦିଦି। ଫଳରେ ଅନେକ କିଶୋର ବାଳିକା ହିତାଧିକାରୀ ରାଜ୍ୟ ସରକାରଙ୍କ ନୂତନ ଯୋଜନାର ଲାଭ ଉଠିବାରେ ବଞ୍ଚିତ ହେଉଛନ୍ତି। ଡିସେମ୍ବର ୧ରୁ ନୂତନ ଭାବେ ‘ମୁଖ୍ୟମନ୍ତ୍ରୀ ସଂପୂର୍ଣ୍ଣ ପୃଷ୍ଟି ଯୋଜନା’ ମାଧ୍ୟମରେ ପ୍ରତ୍ୟେକ କେନ୍ଦ୍ରରେ ୧୫ ରୁ ୧୯ ବର୍ଷର କିଶୋର ବାଳିକା ହିତାଧିକାରୀମାନଙ୍କୁ ମସଲା ମୁଡି, ଚଣା, ଏକ ସପ୍ତାହକୁ ୪ଟି ଅଣ୍ଡା ଦେବା ପାଇଁ ଏହି ନୂତନ ଯୋଜନା ଓଡ଼ିଶାରେ ରାଜ୍ୟ ସରକାର ଲାଗୁ କରିଥିବା ବେଳେ ଅନେକ ହିତାଧିକାରୀ କିଶୋର ବାଳିକାମାନଙ୍କୁ ଅନ୍ତର୍ଭୁକ୍ତ କରାଯାଇନାହିଁ। ଉକ୍ତ କେନ୍ଦ୍ରର ଅଙ୍ଗନୱାଡ଼ି କର୍ମୀ କବିତା କୁମାରୀ ଖଟେଇ ଦୀର୍ଘ ୪ ମାସ ଧରି ନିଜର ସ୍ବାସ୍ଥ୍ୟ ଖରାପ ଥିବା ନେଇ ସେ ଛୁଟିରେ ରହିବା ପରେ ଏକ ମାସ ଧରି ତାଲିମ ପ୍ରଶିକ୍ଷଣ ଶିବିର ପାଇଁ ଯାଇଥିଲେ। ସେ ନିଜର ଛୁଟି ସାରି ନଭେମ୍ବର ୩୦ରେ ନିଜର ଚିଠି ମାଧ୍ୟମରେ କାର୍ଯ୍ୟରେ ଯୋଗ ଦାନ କରିବା ସତ୍ତ୍ୱେ ଦୀର୍ଘ ୯ ଦିନ ବିତିଯାଇଥିଲେ ମଧ୍ୟ ତାଙ୍କୁ ସିଡିପିଓ ଭାରତୀ ମହାପାତ୍ର ଦାୟିତ୍ୱ ହସ୍ତାନ୍ତର କରିନଥିବା ସେ କହିଛନ୍ତି। କେବଳ ସେତିକି ନୁହେଁ ଉକ୍ତ କେନ୍ଦ୍ରକୁ ପାଠ ପଢିବା ପାଇଁ ଆସୁଥିବା ୩ ରୁ ୬ ବର୍ଷ ଶିଶୁମାନଙ୍କୁ ପ୍ରାକ ବିଦ୍ୟାଳୟରେ ସଠିକ୍ ଭାବେ ଶିକ୍ଷା ମିଳି ପାରୁନାହିଁ। ପ୍ରତ୍ୟେକ ଦିନ ଶିଶୁମାନଙ୍କୁ ରୋଷେଇ କରି ଖାଦ୍ୟ ଦିଆ ଯାଉନଥିବା ଅଭିଯୋଗ କରିଛନ୍ତି ଅଭିଭାବକ। ଉକ୍ତ ବିଷୟକୁ ନେଇ ବର୍ତ୍ତମାନ ଦାୟିତ୍ୱରେ ଥିବା ଜେମାଦେଇପୁର କେନ୍ଦ୍ର ନମ୍ବର (୧) ପ୍ରଶାନ୍ତି ଲତିକା ନନ୍ଦ ତାଙ୍କର ସ୍ବାସ୍ଥ୍ୟ ଖରାପ ଥିବା ଲାଗି ମନା କରିବା ସତ୍ତ୍ୱେ ତାଙ୍କୁ ବାଧ୍ୟତାମୂଳକ ଭାବେ ଡୋଙ୍ଗରୀ କେନ୍ଦ୍ରର ଦାୟିତ୍ୱ ଦିଆଯାଇଥିବା କହିଛନ୍ତି।
