ନୟାଗଡ଼ ଅଫିସ,୨୨।୭: ବିପଦସଙ୍କୁଳ ଅଙ୍ଗନଓ୍ବାଡି କେନ୍ଦ୍ରରେ ପାଠ ପଢ଼ୁଛନ୍ତି କୁନି କୁନି ପିଲା। ହେଲେ ଏଥିପ୍ରତି ପ୍ରଶାସନର ନଜର ନାହିଁ ।ଏଭଳି ଅଭିଯୋଗ ନୟାଗଡ଼ ଜିଲାରେ ଗତ ୨୦ ବର୍ଷ ହେଲା ହୋଇ ଆସୁଛି। ତଥାପି ଧିମେଇ ଚାଲିଛି ଅଙ୍ଗନଓ୍ବାଡି କେନ୍ଦ୍ରର ନିର୍ମାଣ । ଏପରି କି ଜିଲାର ରଣପୁର ବ୍ଲକ ସୁଅଁାସିଆସାହିରେ ଏକ ସ୍କୁଲ ଗୃହ ହଠାତ୍ ଭୁଶୁଡ଼ି ପଡ଼ିବା ଯୋଗୁ ୭ ଅଙ୍ଗନୱାଡି ଶିଶୁଙ୍କ ମୃତ୍ୟୁ ଘଟିଥିଲା । ଏହି ଘଟଣାକୁ ପ୍ରାୟ ୧୦ ବର୍ଷ ବିତି ଥିଲେ ମଧ୍ୟ ଜିଲାର ଅଙ୍ଗନୱାଡି କେନ୍ଦ୍ରର ରୂପରେଖ ବଦଳି ପାରିନି । ଜିଲାରେ ୧୫୮୪ ଅଙ୍ଗନୱାଡି କେନ୍ଦ୍ର ରହିଛି । ସେଥିମଧ୍ୟରୁ ଆଜି ସୁଦ୍ଧା ୮୧୦ କେନ୍ଦ୍ରର ନିର୍ମାଣ ସରିଛି ବୋଲି ଜିଲା ସମାଜ ମଙ୍ଗଳ ବିଭାଗର ରେକର୍ଡ କହୁଛି। ଅନ୍ୟପକ୍ଷେ ଅଙ୍ଗନୱାଡି ଗୃହ କାମ ଶେଷ ପରେ ଅଧିକାଂଶ କେନ୍ଦ୍ର ଫାଙ୍କା ପଡ଼ିଛି । ନୂତନ ଗୃହକୁ ଅଙ୍ଗନୱାଡି କେନ୍ଦ୍ର ସ୍ଥାନାନ୍ତରିତ ହୋଇ ପାରୁନି । ଅଙ୍ଗନୱାଡି କେନ୍ଦ୍ର ନିର୍ମାଣରେ କାହିଁକି ବିଳମ୍ବ ହେଉଛି, ଗୃହ ନିର୍ମାଣ ପରେ ବି କାହିଁକି ତାହା କାର୍ଯ୍ୟକ୍ଷମ ହେଉନି ସେ ନେଇ ଜିଲା ପ୍ରଶାସନ ସମୀକ୍ଷା ସନ୍ତୋଷ ଜନକ ନ ଥିବା ସ୍ପଷ୍ଟ ହେଉଛି ।
ସୂଚନା ଅନୁଯାୟୀ, ଜିଲାର ଭାପୁର ବ୍ଳକରେ ୧୫୩, ଦଶପଲ୍ଲା ବ୍ଲକରେ ୨୨୩, ଗଣିଆ ବ୍ଲକରେ ୮୨, ଖଣ୍ଡପଡ଼ା ବ୍ଳକରେ ୧୬୯, ନୟାଗଡ଼ ବ୍ଲକରେ ୨୩୦, ନୂଆଗାଁ ବ୍ଲକରେ ୧୬୮, ଓଡ଼ଗାଁ ବ୍ଳକରେ ୨୩୦, ରଣପୁର ବ୍ଲକରେ ୩୨୩ ଅଙ୍ଗନୱାଡି କେନ୍ଦ୍ରକୁ ମିଶାଇ ମୋଟ୍ ୧୫୮୪ ଅଙ୍ଗନୱାଡି କେନ୍ଦ୍ର ରହିଛି । ସେଥିରୁ ଭାପୁର ବ୍ଳକରେ ୧୪୯, ଦଶପଲ୍ଲା ବ୍ଲକରେ ୨୧୬, ଗଣିଆ ବ୍ଲକରେ ୭୮, ଖଣ୍ଡପଡ଼ା ବ୍ଳକରେ ୧୬୩, ନୟାଗଡ଼ ବ୍ଲକରେ ୨୨୭, ନୂଆଗାଁ ବ୍ଲକରେ ୧୬୪, ଓଡ଼ଗାଁ ବ୍ଳକରେ ୨୨୬, ରଣପୁର ବ୍ଲକରେ ୩୨୦ ଅଙ୍ଗନୱାଡି କେନ୍ଦ୍ରକୁ ମିଶାଇ ମୋଟ ୧୫୪୩ ଅଙ୍ଗନୱାଡି କେନ୍ଦ୍ରର ଗୃହ ନିର୍ମାଣ ପାଇଁ କାର୍ଯ୍ୟାଦେଶ ଦିଆଯାଇଥିଲା। ସେଥିମଧ୍ୟରୁ ଭାପୁର ବ୍ଳକରେ ୧୦୫, ଦଶପଲ୍ଲା ବ୍ଲକରେ ୯୮, ଗଣିଆ ବ୍ଲକରେ ୪୧, ଖଣ୍ଡପଡ଼ା ବ୍ଳକରେ ୮୬, ନୟାଗଡ଼ ବ୍ଲକରେ ୧୩୫, ନୂଆଗାଁ ବ୍ଲକରେ ୯୫, ଓଡ଼ଗାଁ ବ୍ଳକରେ ୧୦୮, ରଣପୁର ବ୍ଲକରେ ୧୪୨ ଅଙ୍ଗନୱାଡି କେନ୍ଦ୍ର ଅର୍ଥାତ୍ ୮୧୦ ଅଙ୍ଗନୱାଡି କେନ୍ଦ୍ରର ଗୃହ କାର୍ଯ୍ୟ ସମାପ୍ତ ହୋଇଥିବା ସରକାରୀ ରେକର୍ଡ କହୁଛି । ଅନ୍ୟପକ୍ଷେ ଭାପୁର ବ୍ଳକରେ ୨୮, ଦଶପଲ୍ଲା ବ୍ଲକରେ ୭୦, ଗଣିଆ ବ୍ଲକରେ ୧୭, ଖଣ୍ଡପଡ଼ା ବ୍ଳକରେ ୩୩, ନୟାଗଡ଼ ବ୍ଲକରେ ୪୩, ନୂଆ ଗାଁ ବ୍ଲକରେ ୨୧, ଓଡ଼ ଗାଁ ବ୍ଳକରେ ୮୨, ରଣପୁର ବ୍ଲକରେ ୯୯ ଅଙ୍ଗନୱାଡି କେନ୍ଦ୍ରକୁ ମିଶାଇ ମୋଟ୍ ୩୯୩ ଅଙ୍ଗନୱାଡି କେନ୍ଦ୍ରର ଗୃହ କାହିଁକି ଆରମ୍ଭ ହେଉନି ତାହା ଜଣାପଡୁନି । ତେବେ ଜିଲାର ୩୪୦ ଅଙ୍ଗନୱାଡି ଗୃହ କାମ ଚାଲୁଛି।
