ପଟ୍ଟାଙ୍ଗୀ,୧୩ା୨: ଆନ୍ଧ୍ର ସରକାର ଓଡ଼ିଶାର କୋରାପୁଟ ଜିଲା ପଟ୍ଟାଙ୍ଗୀ ବ୍ଲକ କୋଟିଆ ପଞ୍ଚାୟତର ୩ ଗ୍ରାମକୁ ପଞ୍ଚାୟତ ମାନ୍ୟତା ଦେଇ ତ୍ରିସ୍ତରୀୟ ପଞ୍ଚାୟତ ନିର୍ବାଚନ କରୁଥିବା ଜଣାପଡ଼ିବା ପରେ ଓଡ଼ିଶା ସରକାରଙ୍କ ପକ୍ଷରୁ ତତ୍ପରତା ପ୍ରକାଶ ପାଇଛି। ବ୍ଲକଠାରୁ ଆରମ୍ଭକରି ଜିଲା ପ୍ରଶାସନ ପର୍ଯ୍ୟନ୍ତ ସମସ୍ତେ ସଜାଗ ରହିଛନ୍ତି। ଏହାକୁ ନେଇ ଓଡ଼ିଶା ସରକାର ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ ମଧ୍ୟ ଏହାର କୌଣସି ପ୍ରଭାବ ଆନ୍ଧ୍ର ସରକାରଙ୍କ ଉପରେ ପଡିନାହିଁ। ଖବରରୁ ଜଣାପଡିଛି, ପଟ୍ଟାଙ୍ଗୀ ବ୍ଲକ ଅନ୍ତର୍ଗତ କୋଟିଆ ପଞ୍ଚାୟତର ୨୮ଟି ଗ୍ରାମ ମଧ୍ୟରୁ ୨୧ଟି ଗ୍ରାମ ବିବାଦରେ ରହିଛି। ଏହି ବିବାଦ ଆନ୍ଧ୍ର ସରକାରଙ୍କ ସହ ଚାଲିଛି। ବିବାଦୀୟ ଗ୍ରାମଗୁଡିକ ମଧ୍ୟରୁ ତଳଗଞ୍ଜେଇପଦର, ଫଗୁଣସିନେରି ଓ ଫାଟୁସିନେରି ଆଦି ୩ ଗ୍ରାମକୁ ଆନ୍ଧ୍ର ସରକାର ପଞ୍ଚାୟତର ମାନ୍ୟତା ଦେଇ ଏବେ ସେଠାରେ ନିର୍ବାଚନ କରୁଛନ୍ତି। ଏନେଇ ଆନ୍ଧ୍ର ସରକାର ଜାନୁୟାରୀ ୩୧ରୁ ବିଜ୍ଞପ୍ତି ଜାରି କରିଥିଲେ। କୋରାପୁଟ ଜିଲା ପ୍ରଶାସନ ଏହା କିପରି ଜାଣିପାରିଲେ ନାହିଁ ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
ଅନ୍ୟପକ୍ଷରେ କୋଟିଆ ପଞ୍ଚାୟତର ଏହି ୩ ଗ୍ରାମ ମଧ୍ୟରୁ ତଳ ଗଞ୍ଜେଇପଦର ଏବଂ ଫଗୁଣସିନେରି ୨ ପଞ୍ଚାୟତରେ ସରପଞ୍ଚ ଓ ଓ୍ବାର୍ଡସଭ୍ୟମାନେ ଅପ୍ରତିଦ୍ୱନ୍ଦ୍ୱୀ ହୋଇଛନ୍ତି। ବର୍ତ୍ତମାନ ଫାଟୁସିନେରି ଗ୍ରାମରେ ଆନ୍ଧ୍ର ସରକାର ପଞ୍ଚାୟତ ନିର୍ବାଚନ କରୁଛନ୍ତି। ଶନିବାର ଏନେଇ ମତଦାନ ହେବ। ୨ ସରପଞ୍ଚ ପ୍ରାର୍ଥୀ ସେଦା ରାପୋକାମି ଓ କୋଣ୍ଡାପେଲି ପାଇଡି ତାଲିଆମାଁଙ୍କ ସହ ମୁକାବିଲା ହେବ। ସେହିପରି ଓ୍ବାର୍ଡସଭ୍ୟ ପଦପାଇଁ କୋଣ୍ଡାପେଲି ଲଛମି, ଚୋଡପେଲି ଡିପାଇ, ତାଡିଙ୍ଗି ଜୁଲମେ, କୁନେଟି ଦେଉଡୁ ଆମ୍ମା, ତାଡିଙ୍ଗି ମୁକୁ, ହନ୍ତାଳ ମଇନା, ମେଲିକା ବିମା, ସେଦାରାପୋ ଏନଙ୍ଗାନା, ସୋଢାପେଲି ସିତ୍ରୋ, ସେଦାରାପୁ ସିମି, ସେଦାରାପୁ ମୋତାଇ, କୁନେଟି ଦାଶାଇ, ସେଦାରାପୁ ସାମି, ତାଡିଙ୍ଗି ସିଙ୍ଗାରି, ସେଦାରାପୁ ଚୁକା, କୁନେଟି କୋମାଟି ପ୍ରମୁଖଙ୍କ ମଧ୍ୟରେ ମୁକାବିଲା ହେବ। ତେବେ ଗ୍ରାମବାସୀଙ୍କୁ ଆକୃଷ୍ଟ କରିବା ଲାଗି ଓଡ଼ିଶା ସରକାରଙ୍କ କୋରାପୁଟ ଜିଲା ପ୍ରଶାସନ ଫାଟୁସିନେରି ଗ୍ରାମରେ ସାଂସ୍କୃତିକ କାର୍ଯ୍ୟକ୍ରମ କରି ସଚେତନ କରୁଛି। ସୂଚନା ଯୋଗ୍ୟ, କୋଟିଆ ପଞ୍ଚାୟତର ବିକାଶ ପାଇଁ ରାଜ୍ୟ ସରକାର ୨ଟି ପର୍ଯ୍ୟାୟରେ ୧୭୦ କୋଟି ଟଙ୍କା ପ୍ୟାକେଜ ଘୋଷଣା କରି ଅନୁଦାନ ଦେଇଥିଲେ। ଏବେ ଏହି ନିର୍ବାଚନକୁ ଦେଖିଲେ ସରକାରଙ୍କ ପ୍ୟାକେଜ୍ର କୌଣସି ପ୍ରଭାବ ଅଞ୍ଚଳବାସୀଙ୍କ ଉପରେ ପଡି ନ ଥିବା ମନେ ହେଉଛି।
