ମୁମ୍ବାଇ: ବଲିଉଡ୍ ଚୁଲ୍ବୁଲି ଅଭିନେତ୍ରୀ ଅନନ୍ୟା ପାଣ୍ଡେ ବର୍ତ୍ତମାନ ତାଙ୍କ ବ୍ୟକ୍ତିଗତ ଜୀବନକୁ ନେଇ ବେଶ୍ ଲାଇମଲାଇଟ୍ରେ ଅଛନ୍ତି। ଧନ୍ତେରସ ଅବସରରେ ଅନନ୍ୟା ନିଜ ପାଇଁ ଏକ ଘର କିଣି ଗୃହ ପ୍ରବେଶ କରିଛନ୍ତି। ସେ ପୂଜା କରୁଥିବା ଫଟୋ ସୋସିଆଲ ମିଡିଆରେ ଶେୟାର କରିଛନ୍ତି। ତାଙ୍କ ଫଟୋରେ ଅନେକ ଅଭିନେତ୍ରୀ ଅଭିନେତା ଯଥା ଫରାହ ଖାନ, ଟାଇଗର ଶ୍ରଫ, ଶାନୟା କପୁର, ବରୁଣ ସୁଦ, ମଲିକା ଭଟ୍ଟ, ଭାବନା ପାଣ୍ଡେ, ଗୌହର ଖାନ୍ ନୂତନ ଘର ଏବଂ ଭବିଷ୍ୟତ ପାଇଁ ଶୁଭେଚ୍ଛା ଜଣାଇଛନ୍ତି। ତେବେ ଅନନ୍ୟା କେଉଁଠାରେ ଘର କିଣିଛନ୍ତି, ସେ କେବେ ଏଠାକୁ ରହିବାକୁ ଆସିବେ, ସେନେଇ କୌଣସି ସୂଚନା ନାହିଁ। ଏଥିସହ ଘରର ମୂଲ୍ୟ ମଧ୍ୟ ପ୍ରକାଶ କରାଯାଇ ନାହିଁ। ତେବେ ଅନନ୍ୟା ୨୦୧୯ରେ ଷ୍ଟୁଡେଣ୍ଟ୍ ଅଫ୍ ଦି ଇୟର ୨ ଜରିଆରେ ବଲିଉଡ୍ ଡେବ୍ୟୁ କରିଥିଲେ। ଏହା ପରେ ସେ ଆଉ କିଛି ଫିଲ୍ମ କରିଥିଲେ ମଧ୍ୟ ତାହା ଏତେ ଲୋକପ୍ରିୟ ହୋଇ ନ ଥିଲା। ଶେଷଥର ପାଇଁ ତାଙ୍କୁ ଫିଲ୍ମ ‘ ଡ୍ରିମ୍ ଗର୍ଲ ୨’ରେ ଦେଖିବାକୁ ମିଳିଥିଲା। ଆଗକୁ ତାଙ୍କ ପାଖରେ ୩ଟି ଚଳଚ୍ଚିତ୍ର ରହିଛି।
