ଆନନ୍ଦପୁର,୨୨।୩(ସ୍ବ.ପ୍ର.): କେନ୍ଦୁଝର ଜିଲାର ଆନନ୍ଦପୁର ଉପଖଣ୍ଡକୁ ଜିଲା ଦାବି ଜୋର ଧରିଛି। ଲୋକଙ୍କ ମୌଳିକ ସ୍ବାର୍ଥକୁ ଦୃଷ୍ଟିରେ ରଖି ସାଧାରଣ ଜନତା ଏବେ ଜିଲା ଦାବିର ମଙ୍ଗ ଧରିଛନ୍ତି। ଆନନ୍ଦପୁରର ବିରଷ୍ଠ ନାଗରିକ, ସଚେତନ ନାଗରିକ ଓ ବୁଦ୍ଧିଜୀବୀଙ୍କ ସହିତ ଉପକଣ୍ଡର ଖବରଦାତା, ଆଇନଜୀବୀ ଦାବିର ଗୁରୁତ୍ୱକୁ ଯଥାର୍ଥ ପ୍ରତିପାଦିତ କରିବା ପାଇଁ ସାମିଲ ହୋଇଛନ୍ତି। ସୋମବାର ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଜିଲାପାଳଙ୍କୁ ଦାବିପତ୍ର ପ୍ରଦାନ କରିଛନ୍ତି।
ଆନନ୍ଦପୁରର ଆରାଧ୍ୟ ଦଧିବାମନଜୀଉ ମନ୍ଦିର ପରିସରରୁ ଦସ୍ତଖତ ଅଭିଯାନରେ ସାମିଲ ହୋଇ ଆନନ୍ଦପୁରର ବରିଷ୍ଠ ନାଗରିକ ପ୍ରଫେସର ରମାକାନ୍ତ ନାୟକ, ମହେଶ୍ୱର ସାହୁ, ରଘୁନାଥ ପଣ୍ଡିତ, ଦୁର୍ଗାଚରଣ ଦଳେଇ, ନିରାକାର ଦଳେଇ, ଅଶୋକ ସାହୁ, ଓକିଲ ସଂଘର ପୂର୍ବତନ ସଭାପତି ଦୟାନିଧି ଦାଶ, ପୂର୍ବତନ ସମ୍ପାଦକ ହେମନ୍ତ ମଲ୍ଲିକ, ଆଇନଜୀବୀ ଭାଗିରଥି ଦାଶ, ଶୈଲେଶ ପଟ୍ଟନାୟକ, ଖବରଦାତା ମଦନ ପାଣି, ଲଲାଟେନ୍ଦୁ ଧିର, ସନ୍ତୋଷ ରାଉତ, କିରଣ ପାଢ଼ୀ, ଗୋପାଳ କୃଷ୍ଣ ରାଉତ, କିଶୋର ଚନ୍ଦ୍ର ଆଚାର୍ଯ୍ୟ, ନିର୍ମଳ ରାଉଳ, ରଞ୍ଜିତ ରଣାଙ୍କ ସମେତ ପୌରାଧ୍ୟକ୍ଷା ରଜନୀରାଣୀ ଖଟୁଆ, କାଉନ୍ସିଲର କୃଷ୍ଣ ଚନ୍ଦ୍ର ରଣା, ସନତ କର, ସୁରେନ୍ଦ୍ର ଦାସ, ରଶ୍ମୀତା ବାରିଙ୍କ ସମେତ ବହୁ କାଉନ୍ସିଲର ହାଟଡ଼ିହୀ ବ୍ଲକ୍ରେ ଅନୁଷ୍ଠିତ ଜିଲାପାଳଙ୍କ ଅଭିଯୋଗ ଶୁଣାଣି କାର୍ଯ୍ୟକ୍ରମରେ ସାମିଲ ହୋଇ ଜିଲାପାଳଙ୍କୁ ଦାବିପତ୍ର ପ୍ରଦାନ କରିଥିଲେ। ଭୌଗଳିକ ଦୃଷ୍ଟିକୋଣ ହେଉ କି ଭାଷାଗତ, ସାଂସ୍କୃତିକ, ଐତିହ୍ୟ, ପରମ୍ପରା ଦୃଷ୍ଟିକୋଣରୁ ଆନନ୍ଦପୁର ଉପଖଣ୍ଡ ଓ କେନ୍ଦୁଝର ମଧ୍ୟରେ ଅନେକ ତାରତମ୍ୟ ରହିଛି। ଆନନ୍ଦପୁର ସଦର ମହକୁମାଠାରୁ ୯୦ କି.ମି ଦୂର ଏବଂ ଉପଖଣ୍ଡର ସୀମାଠାରୁ ୧୨୦ କି.ମି ଦୂରରେ ଅବସ୍ଥିତି ଜିଲା କାର୍ଯ୍ୟାଳୟ ସହିତ ଯୋଗାଯୋଗ କରାଯିବା କଷ୍ଟସାଧ୍ୟ ହେଉଥିବା କହିଥିଲେ।
