ହାଟଡିହୀ,୨୬।୫(ଶୁଭକାନ୍ତ ନାୟକ): କେନ୍ଦୁଝର ଜିଲା ଆନନ୍ଦପୁର ବିଧାନସଭା ନିର୍ବାଚନମଣ୍ଡଳୀରେ ୨୯୧ଟି ଭୋଟ କେନ୍ଦ୍ରରେ ଭୋଟ ଗ୍ରହଣ ହୋଇଛି। ଉକ୍ତ ବିଧାନସଭା କ୍ଷେତ୍ର ଅଧୀନରେ ହାଟଡିହୀ ଏବଂ ଆନନ୍ଦପୁର ବ୍ଲକ, ଆନନ୍ଦପୁର ମ୍ୟୁନିସିପାଲିଟି ରହିଥିବା ବେଳେ ଶାନ୍ତି, ଶୃଙ୍ଖଳାର ସହ ଏଥର ଭୋଟ ଗ୍ରହଣ ହୋଇଛି । ହାଟଡିହୀ ବ୍ଲକରେ ୧୬୮ଟି ଭୋଟ କେନ୍ଦ୍ରରେ ଭୋଟ ଗ୍ରହଣ ହୋଇଥିଲା l ସେଥିମଧ୍ୟରୁ ୧୧ଟି ଆଦର୍ଶ ବୁଥ୍ ରହିଥିଲା। ମୋଟ ୭ଜଣ ବିଧାୟକ ପ୍ରାର୍ଥୀ ଭାବେ ନିର୍ବାଚନୀ ମଇଦାନରେ ପ୍ରତିଦ୍ବନ୍ଦିତା କରୁଥିଲେ । ବିଜେଡିରୁ ଅଭିମନ୍ୟୁ ସେଠୀ, ଭାଜପାରୁ ଆଲୋକ ସେଠୀ, କଂଗ୍ରେସରୁ ପୂର୍ବତନ ବିଧାୟକ ଜୟଦେବ ଜେନା, ସ୍ବାଧୀନରୁ ଝାନ୍ସୀରାଣୀ ଦାସ ଏବଂ ବିଶ୍ୱ ପ୍ରତାପ ଜେନା, ବହୁଜନ ସମାଜ ପାର୍ଟିରୁ ଦେବେନ୍ଦ୍ର ଜେନା,ଏସ୍ୟୁସିଆଇରୁ ନୀଳକଣ୍ଠ ଜେନା ନିର୍ବାଚନ ଲଢୁଥିଲେ l ରାତି ପ୍ରାୟ ସାଢେ ୧୦ଟା ପର୍ଯ୍ୟନ୍ତ ଭୋଟ ଗ୍ରହଣ ଚାଲିଥିଲା l କେତେକ ସ୍ଥାନରେ ସ୍ଥାନରେ ଇଭିଏମ୍ ଅଚଳ ହେବାରୁ ଭୋଟ ଗ୍ରହଣ ଦୀର୍ଘ ସମୟ ପର୍ଯ୍ୟନ୍ତ ବାଧାପ୍ରାପ୍ତ ହୋଇଥିଲା। ଭୋଟ ଗ୍ରହଣ ବନ୍ଦ ରହିଥିଲା l ଇଭିଏମ୍ ମେଶିନ ସଜଡ଼ା ଯିବାପରେ ଭୋଟ ଗ୍ରହଣ ସ୍ବାଭାବିକ ହୋଇଥିଲା। ଆଉ କେତେକ କେନ୍ଦ୍ରରେ ଅବ୍ୟବସ୍ଥା ପରିଲିକ୍ଷିତ ହୋଇଥିଲା । ସକାଳ ୭ଟାରେ ଭୋଟ ପ୍ରକ୍ରିୟା ଆରମ୍ଭ ହୋଇଥିଲା। ପୋଲିସ,ଫୋର୍ସ, ପ୍ରଶାସନିକ ଅଧିକାରୀମାନେ ବିଭିନ୍ନ ସ୍ଥାନରେ ନିୟୋଜିତ ଥିଲେ l ଶାନ୍ତି, ଶୃଙ୍ଖଳା ଏବଂ ସୁରୁଖୁରୁରେ ର୍ନିବାଚନ ପର୍ବ ଅନୁଷ୍ଠିତ ହୋଇଥିବାରୁ ଆନନ୍ଦପୁର ଉପଜିଲାପାଳ ଫାଲ୍ଗୁନୀ ମାଝୀ, ଆନନ୍ଦପୁର ଡିଏସ୍ପି ପ୍ରଶାନ୍ତ ବେହେରା ଏବଂ ହାଟଡିହୀ ବିଡିଓ ସୌମ୍ୟଶ୍ରୀ ପାଣିଗ୍ରାହୀ, ନନ୍ଦିପଦା ଆଇଆଇସି ରବୀନ୍ଦ୍ର ପାତ୍ର, ସୋସୋ ଆଇଆଇସି ବିଜୟ ବିହାରୀ ଏବଂ ଆନନ୍ଦପୁର ଆଇଆଇସି ଲକ୍ଷ୍ମୀକାନ୍ତ ପ୍ରଧାନ ପ୍ରମୁଖ ଗଣମାଧ୍ୟମ ପ୍ରତିନିଧି ଏବଂ ଭୋଟରଙ୍କୁ କୃତଜ୍ଞତା ଏବଂ ଧନ୍ୟବାଦ ଜଣାଇଛନ୍ତି ।
