ନୂଆଦିଲ୍ଲୀ,୨୪।୬: ଆମେରିକା ଭିସା ଯାଞ୍ଚ ପ୍ରକ୍ରିୟାରେ ସୁରକ୍ଷା କଡ଼ାକଡ଼ି କରିବା ପାଇଁ ଏକ ବଡ଼ ପଦକ୍ଷେପ ନେଇଛି। ଏହା ଅଧୀନରେ, ଏବେ F, M, ଏବଂ J କାଟେଗୋରୀର ଅଣ-ପ୍ରବାସୀ ଭିସା ପାଇଁ ଆବେଦନ କରୁଥିବା ସମସ୍ତ ଆବେଦନକାରୀଙ୍କୁ ସେମାନଙ୍କର ସମସ୍ତ ସୋସିଆଲ ମିଡିଆ ଆକାଉଣ୍ଟର ଗୋପନୀୟତା ସେଟିଂସ ’ସାର୍ବଜନୀନ’ କରିବାକୁ ପଡିବ। ଏହାର ଉଦ୍ଦେଶ୍ୟ ହେଉଛି ଭିସା ଆବେଦନକାରୀଙ୍କ ପରିଚୟକୁ ଭଲ ଭାବରେ ଯାଞ୍ଚ କରିବା ଏବଂ ସୁରକ୍ଷା ସୁନିଶ୍ଚିତ କରିବା। ଏହି ନୂତନ ନିୟମ ତତ୍କାଳ ଲାଗୁ କରାଯାଇଛି। ଏନେଇ ଆମେରିକା ଦୂତାବାସ ପକ୍ଷରୁ Xରେ ଏହି ସୂଚନା ଦିଆଯାଇଛି।
ସାଧାରଣତଃ ବିଦେଶୀ ନାଗରିକମାନଙ୍କୁ F, M, ଏବଂ J ଭିସା ଏଜେନ୍ସି ଦ୍ୱାରା ପ୍ରଦାନ କରାଯାଇଥାଏ। ଏଫ୍ ଭିସା ପାଠ ପଢ଼ୁଥିବା ଛାତ୍ରୀଛାତ୍ର, ଧନ୍ଦାମୂଳକ ଛାତ୍ରୀଛାତ୍ରଙ୍କୁ ଏମ୍ ଭିସା ଏବଂ ଏକ୍ସଚେଞ୍ଜ ଭିଜିଟର, ରିସର୍ଚ୍ଚର ଓ ଇଣ୍ଟର୍ଣ୍ଣମାନଙ୍କୁ ଜେ ଭିସା ପ୍ରଦାନ କରାଯାଇଥାଏ। ଏବେ ନୂତନ ନିୟମ ନେଇ ଆମେରିକା ଦୂତାବାସ ଭାରତ ସୋସିଆଲ ମିଡିଆ ପ୍ଲାଟଫର୍ମ X ରେ କହିଛି ଯେ, ପ୍ରତ୍ୟେକ ଭିସା ଆବେଦନ ଏକ ଜାତୀୟ ସୁରକ୍ଷା ନିଷ୍ପତ୍ତି। ଆମେରିକା ୨୦୧୯ ମସିହାରୁ ଭିସା ଆବେଦନ ଫର୍ମରେ ସୋସିଆଲ ମିଡିଆ ୟୁଜରନେମ ମାଗୁଛି, କିନ୍ତୁ ବର୍ତ୍ତମାନ ସୋସିଆଲ ମିଡିଆ ଆକାଉଣ୍ଟଗୁଡ଼ିକୁ ସାର୍ବଜନୀନ କରିବା ବାଧ୍ୟତାମୂଳକ କରାଯାଇଛି। ଯାହା ଦ୍ୱାରା ଆବେଦନକାରୀଙ୍କ ସମ୍ପୂର୍ଣ୍ଣ ତଦନ୍ତ କରାଯାଇପାରିବ। ଆବେଦନକାରୀଙ୍କ ସମ୍ପର୍କରେ ଅନଲାଇନରେ ଅଫିସରମାନେ ସହଜରେ ଜାଣିପାରିବେ। ଏହା ସହିତ ଆମେରିକା କହିଛି ଯେ ସେମାନେ ସମସ୍ତ ଉପଲବ୍ଧ ସୂଚନା ଯାଞ୍ଚ ପରେ ଦେଶର ସୁରକ୍ଷା ପାଇଁ ବିପଦ ସୃଷ୍ଟି କରୁଥିବା ଲୋକମାନେ ଆମେରିକା ଆସିପାରିବେ ନାହିଁ।
ଯଦିଓ ଆମେରିକା ଯାତ୍ରା କରିବା ପାଇଁ ଭାରତୀୟ ନାଗରିକଙ୍କ ଉପରେ କୌଣସି ପ୍ରତିବନ୍ଧକ ନାହିଁ, କିନ୍ତୁ ଭିସା ପ୍ରକ୍ରିୟାରେ ବିଳମ୍ବ ଯୋଗୁ ଅନେକ ଛାତ୍ର, କାର୍ଯ୍ୟରତ ବୃତ୍ତିଗତ ଏବଂ ପର୍ଯ୍ୟଟକଙ୍କୁ ଆମେରିକା ଯିବାର ଯୋଜନା ପରିବର୍ତ୍ତନ କରିବାକୁ ପଡ଼ିପାରେ। ଏହା ବ୍ୟତୀତ ସୋସିଆଲ ମିଡିଆକୁ ସାର୍ବଜନୀନ କରିବାର ନିୟମ ଅନେକ ଲୋକଙ୍କ ଗୋପନୀୟତା ଉପରେ ମଧ୍ୟ ପ୍ରଶ୍ନ ଉଠାଇପାରେ। ଏହି ନୂତନ ନିୟମ ଏବଂ ପ୍ରତିବନ୍ଧକର ଉଦ୍ଦେଶ୍ୟ ହେଉଛି ଆମେରିକାର ଜାତୀୟ ସୁରକ୍ଷାକୁ ସୁଦୃଢ଼ କରିବା, ଯାହା ଦାରା ସମସ୍ତ ଭିସା ଆବେଦନକାରୀ ଦେଶ ପାଇଁ ସୁରକ୍ଷିତ ଏବଂ ନିର୍ଭରଯୋଗ୍ୟ ପ୍ରମାଣିତ ହେବେ।
ସୂଚନାଯୋଗ୍ୟ ଯେ ଆମେରିକା ତାର ଭିସା ସମ୍ପର୍କିତ ସୁରକ୍ଷା ଏବଂ ତଦନ୍ତ ପ୍ରକ୍ରିୟାକୁ ନିରନ୍ତର କଡ଼ାକଡ଼ି କରିବାକୁ ଚେଷ୍ଟା କରୁଛି। ଏହା ପୂର୍ବରୁ ଜୁନ ୯ ରେ ମଧ୍ୟ ଆମେରିକା ୧୨ ଟି ଦେଶର ନାଗରିକଙ୍କୁ ଆମେରିକାର ଭିସା ଦେବା ଉପରେ ସମ୍ପୂର୍ଣ୍ଣ ନିଷେଧ କରିଛି। ଏହି ୧୨ ଟି ଦେଶର ତାଲିକାରେ ଆଫଗାନିସ୍ତାନ, ମିଆଁମାର, ଚାଡ, କଙ୍ଗୋ ଗଣରାଜ୍ୟ, ଇକ୍ୱାଟୋରିଆଲ ଗିନି, ଏରିଟ୍ରିଆ, ହାଇତି, ଇରାନ, ଲିବିଆ, ସୋମାଲିଆ, ସୁଡାନ ଏବଂ ୟେମେନ ଅନ୍ତର୍ଭୁକ୍ତ।
ସେହି ସମୟରେ, ଅନ୍ୟ ସାତଟି ଦେଶ ପାଇଁ କିଛି ଭିସା ବର୍ଗରେ କଡ଼ା ନିୟମ ଲାଗୁ କରାଯାଇଛି। ଏଥିରେ ବୁରୁଣ୍ଡି, କ୍ୟୁବା, ଲାଓସ, ସିଏରା ଲିଓନ, ଟୋଗୋ, ତୁର୍କମେନିସ୍ତାନ ଏବଂ ଭେନେଜୁଏଲା ଅନ୍ତର୍ଭୁକ୍ତ। ତେବେ ଆମେରିକା ଏହି ପଦକ୍ଷେପ ସେହି ଦେଶଗୁଡ଼ିକ ବିଷୟରେ ନେଇଛି ଯାହାକୁ ସେ ତାର ଜାତୀୟ ସୁରକ୍ଷା ଦୃଷ୍ଟିକୋଣରୁ ବିପଦପୂର୍ଣ୍ଣ ବୋଲି ବିବେଚନା କରେ।
