ଓ୍ବାଶିଂଟନ,୨୨ା୧୧: କରୋନା ଭୂତାଣୁ ପୁଣି ଥରେ ଲେଉଟିଛି। ଫଳରେ ଲୋକେ ଏଥିରେ ଶିକାର ହେବାର ଲାଗିଲେଣି। ଏଭଳି ପରିସ୍ଥିତିରେ ଆମେରିକାର ଖାଦ୍ୟ ଏବଂ ଔଷଧ ବିଭାଗ ଶନିବାର ଜରୁରୀକାଳିନ ପରିସ୍ଥିତିରେ ରେଜେନେରନ ଚିକିତ୍ସା ପାଇଁ ଅନୁମତି ଦେଇଛି। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କରୋନା ସଂକ୍ରମିତ ହେବା ପରେ ତାଙ୍କର ଚିକିତ୍ସା କରାଯାଇଥିଲା। ପରେ ସେ ଶୀଘ୍ର ଆରୋଗ୍ୟ ଲାଭ କରିଥିଲେ।
ରେଜେନେରନଙ୍କ ଚିକିତ୍ସାରେ ଦୁଇଟି ଆଣ୍ଟିବଡି ବ୍ୟବହାର କରାଯାଇଛି। ଗତମାସରେ ରାଷ୍ଟ୍ରପତି ଟ୍ରମ୍ପ କରୋନା ସଂକ୍ରମିତ ହୋଇଥିବା ଜଣାପଡ଼ିବା ପରେ ଏହି ଔଷଧରେ ସେ ସୁସ୍ଥ ହୋଇଥିଲେ। ତେଣୁ ବର୍ତ୍ତମାନ ସମଗ୍ର ଆମେରିକୀୟଙ୍କ ପାଇଁ ଏହି ଔଷଧ ବରଦାନ ସଦୃଶ ହେବ।
ଅକ୍ଟୋବର ୭ରେ ଓ୍ବାଲର୍ଡ ରିଡ ଆର୍ମି ମେଡିକାଲରୁ ହ୍ବାଇଟ୍ ହାଉସକୁ ଫେରିବା ପରେ ଟ୍ରମ୍ପ ଏହି ଚିକିତ୍ସା ପଦ୍ଧତିକୁ ପ୍ରଶଂସା କରିଥିଲେ। ସେ ଲେଖିଛନ୍ତି ଯେ, ଅନ୍ୟମାନେ କେବଳ ଡାକ୍ତରୀ ଅଭ୍ୟାସ ବୋଲି କୁହନ୍ତି, କିନ୍ତୁ ଏହା ମୋତେ ଭଲ କଲା, ଠିକ୍ ଅଛି। ମୁଁ ଏହାକୁ ଏକ ଉପଶମ ବୋଲି କହୁଛି।
ଏଫ୍ଡିଏ କହିଛି ଯେ, ଆଣ୍ଟିବାୟୋଟିକ ଚିକିତ୍ସା କାସିରିଭିମାବ ଏବଂ ଇମଡେଭିମାବକୁ ଅନୁମୋଦନ କରାଯାଇଛି। ବୟସ୍କ ଏବଂ ଶିଶୁ ରୋଗୀଙ୍କ କ୍ଷେତ୍ରରେ ଏହି ଚିକିତ୍ସା କରାଯିବ।
ଖାଦ୍ୟ ଏବଂ ଔଷଧ ବିଭାଗ (ଏଫ୍ଡିଏ) ଲେଖିଛି, କରୋନା ଯୋଗୁ ଡାକ୍ତରଖାନାରେ ଭର୍ତ୍ତି ହୋଇଥିବା କିମ୍ବା ଅମ୍ଳଜାନ ଚିକିତ୍ସା ଆବଶ୍ୟକ କରୁଥିବା ରୋଗୀଙ୍କ ପାଇଁ କାସିରିଭିମାବ ଏବଂ ଇମଡେଭିମାବ ଅନୁମୋଦିତ ନୁହେଁ।
