ଓ୍ବାଶିଂଟନ୍, ୧୩ା୯:ତାଇଓ୍ବାନ ପ୍ରସଙ୍ଗକୁ ନେଇ ଆମେରିକା ଓ ଚାଇନା ମଧ୍ୟରେ ତିକ୍ତତା ବଢ଼ିଥିବାବେଳେ ଓ୍ବାଶିଂଟନ୍ ବେଜିଂର ଦୁର୍ବଳତାକୁ ଧରିଛି। ଆର୍ଟିଫିସିଆଲ ଇଣ୍ଟେଲିଜେନ୍ସ(ଏଆଇ) ଏବଂ ଅନ୍ୟ ସାମଗ୍ରୀ ପ୍ରସ୍ତୁତ ନିମନ୍ତେ ଆବଶ୍ୟକ ପଡ଼ୁଥିବା ସେମିକଣ୍ଡକ୍ଟର ଚିପ୍ ଚାଇନାକୁ ରପ୍ତାନି ଉପରେ ଅଙ୍କୁଶ ଲଗାଇବାକୁ ଆମେରିକା ରାଷ୍ଟ୍ରପତି ଜୋ ବାଇଡେନ୍ଙ୍କ ପ୍ରଶାସନ ଯୋଜନା କରିଛି। ପୂର୍ବରୁ ଆମେରିକାର ୩ କମ୍ପାନୀ କେଏଲ୍ଏ କର୍ପ, ଲାମ୍ ରିସର୍ଚ୍ଚ କର୍ପ ଏବଂ ଆପ୍ଲାଏଡ୍ ମାଟେରିଆଲ୍ସ ଇଙ୍କ୍ ଉପରେ ଲଗାଯାଇଥିବା କଟକଣା ଆଧାରରେ ବାଣିଜ୍ୟ ବିଭାଗ ନୂଆ ନିୟମ ଆଣିବାକୁ ପ୍ରସ୍ତୁତ ହେଉଛି।
ବର୍ଷ ଉକ୍ତ କମ୍ପାନୀଗୁଡ଼ିକୁ ଏ ନେଇ ଚିଠି କରାଯାଇଥିଲା। ସବ୍-୧୪ ନାନୋମିଟର ପ୍ରକ୍ରିୟାରେ ଆଡ୍ଭାନ୍ସଡ୍ ସେମିକଣ୍ଡକ୍ଟର ପ୍ରସ୍ତୁତ କରୁଥିବା ଅଣଲାଇସେନ୍ସ ପ୍ରାପ୍ତ ଚାଇନିଜ୍ ଫ୍ୟାକ୍ଟ୍ରିଗୁଡ଼ିକୁ ଉକ୍ତ କମ୍ପାନୀଗୁଡ଼ିକ ଚିପ୍ରୁ ପ୍ରସ୍ତୁତ ସାମଗ୍ରୀ ରପ୍ତାନି ଉପରେ କଟକଣା ଲଗାଯାଇଥିଲା। କମର୍ସ ଡିପାର୍ଟମେଣ୍ଟ ପକ୍ଷରୁ ଗତ ମାସରେ ଏନ୍ଭିଡିଆ କର୍ପ ଏବଂ ଆଡ୍ଭାନ୍ସଡ୍ ମାଇକ୍ରୋ ଡିଭାଇସ୍କୁ ପଠାଯାଇଥିବା ଚିଠି ଅନୁସାରେ ଲଗାଯାଇଥିବା କଟକଣାଗୁଡ଼ିକ ମଧ୍ୟ ଅନ୍ତର୍ଭୁକ୍ତ କରାଯିବ। ଲାଇସେନ୍ସ ନ ପାଇବା ପର୍ଯ୍ୟନ୍ତ ଏହି କମ୍ପାନୀଗୁଡ଼ିକୁ ଆର୍ଟିଫିସିଆଲ୍ ଇଣ୍ଟେଲିଜେନ୍ସ କମ୍ପ୍ୟୁଟିଂ ଚିପ୍ସ ରପ୍ତାନି ବନ୍ଦ କରିବାକୁ ଚିଠିରେ କୁହାଯାଇଥିଲା। ଏ ପ୍ରସଙ୍ଗରେ ଆସିବାକୁ ଥିବା ନୂଆ ନିୟମରେ ଚାଇନା ବିରୋଧୀ ନୀତି ଆସିବାର ସମ୍ଭାବନା ରହିଛି। ପରେ ଏଥିରେ ପରିବର୍ତ୍ତନ ମଧ୍ୟ କରାଯାଇପାରେ। ଉକ୍ତ କମ୍ପାନୀଗୁଡ଼ିକୁ ପଠାଯାଇଥିବା ଚିଠିର ନୀତିଗୁଡ଼ିକ ଆଇନରେ ପରିଣତ ହେଲେ ସମାନ ଉତ୍ପାଦ ପ୍ରସ୍ତୁତ କରୁଥିବା ଆମେରିକାର ଅନ୍ୟ କମ୍ପାନୀ ପାଇଁ ମଧ୍ୟ ରେଗୁଲେଶନ ଲାଗିବ।
ଇଣ୍ଟେଲିଜେନ୍ସ ଭଳି ଗୁରୁତ୍ୱପୂର୍ଣ୍ଣ କ୍ଷେତ୍ର ସମେତ କାର୍ ନିର୍ମାଣ ଓ ଅନ୍ୟ ଅତ୍ୟାଧୁନିକ ଉପକରଣରେ ସେମିକଣ୍ଡକ୍ଟର ଚିପ୍ ବ୍ୟବହାର ହେଉଛି। ତାଇଓ୍ବାନ ସହ ଉତ୍ତେଜନା ବୃଦ୍ଧି ମଧ୍ୟରେ ବି ଚାଇନା ସେଠାରୁ ସେମିକଣ୍ଡକ୍ଟର ଚିପ୍ ଆମଦାନୀ ଉପରେ କଟକଣା ଲଗାଇନାହିଁ। ସମ୍ପ୍ରତି ଟେକ୍ନୋଲୋଜି ଯୁଗରେ ଚିପ୍ର ଆବଶ୍ୟକତାକୁ ଦୃଷ୍ଟିରେ ରଖି ଚାଇନାର ଦମ୍ଭ ଭାଙ୍ଗିବା ନିମନ୍ତେ ଆମେରିକାର ଏହି ନିଷ୍ପତ୍ତି ରଣନୀତି ଦିଗରୁ ବିଶେଷ ଗୁରୁତ୍ୱ ରଖେ। ଆମେରିକା କମର୍ସ ଡିପାର୍ଟମେଣ୍ଟର ଜଣେ ମୁଖପାତ୍ର କହିଛନ୍ତି, ଜାତୀୟ ନିରାପତ୍ତା ଏବଂ ବିଦେଶ ନୀତିର ରକ୍ଷା ନିମନ୍ତେ ଚାଇନା ଆମେରିକୀୟ ପ୍ରଯୁକ୍ତିବିଦ୍ୟା ହାସଲ ଓ ନିଜର ସୈନ୍ୟ ଆଧୁନିକୀକରଣରେ ଏହାର ଉପଯୋଗକୁ ରୋକିବା ଲାଗି ଏହି ନିଷ୍ପତ୍ତି ନିଆଯାଇଛି। ସେଣ୍ଟର ଫର୍ ଷ୍ଟ୍ରାଟେଜିକ୍ ଆଣ୍ଡ ଇଣ୍ଟରନ୍ୟାଶନାଲ ଷ୍ଟଡିଜ୍ର ଟେକ୍ନୋଲୋଜି ବିଶେଷଜ୍ଞ ଜିମ୍ ଲୁଇସ୍ ଏହି ନିଷ୍ପତ୍ତି ଚାଇନାର ଗଳା ଦବାଇବା ଭଳି ବୋଲି କହିଛନ୍ତି।
