ଓ୍ବାଶିଂଟନ୍,୧୬।୫: ଇରାନ ପରେ ପୁଣି ଆଉ ଗୋଟିଏ ଦେଶ ଉପରେ ଆକ୍ରମଣ କରିଛି ଆମେରିକା। ନାଇଜେରିଆ ଉପରେ ଆମେରିକା ଏୟାରଷ୍ଟ୍ରାଇକ୍ କରିଥିବା ଜଣାପଡ଼ିଛି। ଅବଶ୍ୟ ଆମେରିକା ଏବଂ ନାଇଜେରିଆ ସୈନ୍ୟବାହିନୀର ମିଳିତ ସହଯୋଗରେ ଏହା ଘଟିଛି। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦାବି କରିଛନ୍ତି ଯେ, ଆମେରିକା ଏବଂ ନାଇଜେରିଆର ସେନା ଏକ ବଡ଼ ଆତଙ୍କବାଦ ବିରୋଧୀ ଅଭିଯାନ ସଫଳତାର ସହ ଚଳାଇଛନ୍ତି। ISISର ଦ୍ୱିତୀୟ ସର୍ବୋଚ୍ଚ କମାଣ୍ଡର, ଆବୁ-ବିଲାଲ ଅଲ-ମିନୁକି ଏହି ମିଶନରେ ନିହତ ହୋଇଛନ୍ତି। ସେ ଏହି ସୂଚନା ଟ୍ରୁଥ୍ ସୋସିଆଲ ମିଡିଆରେ ଶେୟାର କରିଛନ୍ତି।
ଟ୍ରମ୍ପ କହିଛନ୍ତି ଯେ, ଏହି ଅଭିଯାନ ଅତ୍ୟନ୍ତ କଷ୍ଟକର ଥିଲା ଏବଂ ଏହା ସୂକ୍ଷ୍ମ ଯୋଜନା ସହିତ କରାଯାଇଥିଲା। ଆବୁ-ବିଲାଲ ଅଲ-ମିନୁକି ଆଫ୍ରିକାରୁ କାର୍ଯ୍ୟ କରୁଥିଲେ ଏବଂ ବିଶ୍ୱବ୍ୟାପୀ ISIS କାର୍ଯ୍ୟରେ ପ୍ରମୁଖ ଭୂମିକା ଗ୍ରହଣ କରିଥିଲେ। ଅଲ-ମିନୁକି ବିଶ୍ୱାସ କରୁଥିଲେ ଯେ ସେ ଆଫ୍ରିକାରେ ସୁରକ୍ଷିତ ରହିପାରିବେ, କିନ୍ତୁ ଆମେରିକାର ଏଜେନ୍ସିଗୁଡ଼ିକ ତାଙ୍କ କାର୍ଯ୍ୟକଳାପ ବିଷୟରେ ନିରନ୍ତର ସୂଚନା ପାଇଥିଲା। ସେ ଆଉ ଆଫ୍ରିକୀୟମାନଙ୍କୁ ଆତଙ୍କିତ କରିପାରିବେ ନାହିଁ କିମ୍ବା ଆମେରିକୀୟମାନଙ୍କ ବିରୋଧରେ ଆକ୍ରମଣ ଯୋଜନା କରିପାରିବେ ନାହିଁ।
ଟ୍ରମ୍ପ ଏହା ମଧ୍ୟ କହିଛନ୍ତି ଯେ ଏହି ଅଭିଯାନ ISISର ବିଶ୍ୱବ୍ୟାପୀ ନେଟୱାର୍କ ଏବଂ କାର୍ଯ୍ୟ ପାଇଁ ଏକ ବଡ଼ ଝଟ୍କା ଥିଲା। ସେ ନାଇଜେରିଆର ସରକାର ଏବଂ ସେନାକୁ ସେମାନଙ୍କ ସହଯୋଗ ପାଇଁ ଧନ୍ୟବାଦ ଜଣାଇଥିଲେ।