ପାଟଣା, ୧।୯ (ବୀର କିଶୋର ଦାଶ): ଲଗାଣ ବର୍ଷାରେ ନାଳ ଉପରେ ଥିବା ପୋଲ ଧୋଇଯିବାରୁ ଗାଁ ଭିତରକୁ ଯାଇପାରିଲା ନାହିଁ ଆମ୍ବୁଲାନ୍ସ। ଶେଷରେ ଗୁରୁତର ଅବସ୍ଥାରେ ଥିବା ପୁଅକୁ ବଞ୍ଚାଇବା ପାଇଁ ମା’ କାନ୍ଧରେ ବୋହି ପୋଲ ନିକଟକୁ ଆଣିଥିଲେ ମା’। ଆଉ କାନ୍ଧରେ ବୋହି ନପାରିବାରୁ ପରେ ଖଟିଆ ସାହାଯ୍ୟରେ ଆମ୍ବୁଲାନ୍ସ ନିକଟକୁ ନେଇଯାଇଥିଲେ। ତେବେ ପାଟଣା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ପହଞ୍ଚିବା ପରେ ଡାକ୍ତର ନାବାଳକଙ୍କୁ ମୃତ ଘୋଷଣା କରିଥିଲେ। ଏଭଳି ଏକ ଅଭାବନୀୟ ଓ ହୃଦୟବିଦାରକ ଘଟଣା କେନ୍ଦୁଝର ଜିଲା ପାଟଣା ଥାନା ଅଧୀନ ଝାଲିଆପଡ଼ା ଗ୍ରାମର ଗୁଣିଆଭାଡ଼ି ସାହିରେ ଘଟିଛି।
ସୋମବାର ସକାଳେ ମା’ ମୀନା ମହାନ୍ତଙ୍କ ସହ ୧୩ ବର୍ଷୀୟ ପୁଅ ନରେଶ ମହାନ୍ତ ଶୌଚ ପାଇଁ ପୋଖରୀକୁ ଯାଇଥିଲେ। ଏହି ସମୟରେ ନରେଶ ପୋଖରୀରେ ବୁଡ଼ିଯାଇଥିଲେ। ପରିବାର ଲୋକେ ତାଙ୍କୁ ତୁରନ୍ତ ଉଦ୍ଧାର କରିବା ସହ ଆମ୍ବୁଲାନ୍ସକୁ ଫୋନ୍ କରିଥିଲେ।
ତେବେ ପ୍ରବଳ ବର୍ଷା ଯୋଗୁଁ ଗାଁ ନିକଟରେ ଥିବା ନାଳର ପୋଲ ଧୋଇଯାଇଥିବାରୁ ଆମ୍ବୁଲାନ୍ସ ଗାଁ ଭିତରକୁ ଯାଇପାରି ନ ଥିଲା। ପୁଅକୁ ବଞ୍ଚାଇବା ଆଶାରେ ମା’ ନରେଶଙ୍କୁ ପ୍ରଥମେ କାନ୍ଧରେ ବୋହି ପୋଲ ନିକଟକୁ ଆଣିଥିଲେ। ପରେ ଆଉ କାନ୍ଧରେ ବୋହି ନ ପାରିବାରୁ ଏକ ଖଟିଆ ସାହାଯ୍ୟରେ ନରେଶଙ୍କୁ ଆମ୍ବୁଲାନ୍ସ ନିକଟକୁ ନେଇଥିଲେ।
ଆମ୍ବୁଲାନ୍ସ ଯୋଗେ ନରେଶଙ୍କୁ ପାଟଣା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିଲା। ହେଲେ ସେଠାରେ ଡାକ୍ତର ନରେଶଙ୍କୁ ମୃତ ଘୋଷଣା କରିଥିଲେ। ପୋଲ ଧୋଇଯିବା ଯୋଗୁଁ ଜରୁରୀ ସମୟରେ ଆମ୍ବୁଲାନ୍ସ ଗାଁରେ ପହଞ୍ଚି ନପାରିବା ଘଟଣାକୁ ନେଇ ଅଞ୍ଚଳରେ ଚାଞ୍ଚଲ୍ୟ ପ୍ରକାଶ ପାଇଛି।