ବ୍ରାଜିଲିଆ, ୧୨ା୧: ବିଶ୍ୱର ସବୁଠାରୁ ବଡ଼ ଟ୍ରପିକାଲ ଜଙ୍ଗଲ ଆମାଜନ ଏବେ ବିପଦରେ। ବଦଳୁଥିବା ପାଣିପାଗ, ବ୍ୟାପକ ଗଛ କଟା ଯୋଗୁ ଏହି ଜଙ୍ଗଲର ଅସ୍ତିତ୍ୱ ଉପରେ ସଙ୍କଟ ଘନେଇଛି। ଏପରିକି ଆଗାମୀ ୪୦ ବର୍ଷ ପରେ ଆମାଜନ୍ ନିଜର ସତ୍ତା ହରାଇପାରେ ବୋଲି ଆଶଙ୍କା କରିଛନ୍ତି ବୈଜ୍ଞାନିକ। ଏଭଳି ହେଲେ ପୁରା ମାନବ ଜାତି ସଙ୍କଟରେ ପଡ଼ିବ ବୋଲି ନିକଟରେ ଦି ପିର ଏନଭାଇରନମେଣ୍ଟାଲ ଜର୍ନାଲରେ ପ୍ରକାଶିତ ଏକ ରିପୋର୍ଟ ଅନୁସାରେ ବୈଜ୍ଞାନିକ ରବର୍ଟ ଓ୍ବାକର ଚେତାବନୀ ଦେଇଛନ୍ତି।
ବ୍ରାଜିଲ, କଲମ୍ବିଆ, ପେରୁ ଏବଂ ଅନ୍ୟ ଦକ୍ଷିଣ ଆମେରିକୀୟ ଦେଶକୁ ବ୍ୟାପିଥିବା ଆମାଜନ ସାରା ବିଶ୍ୱକୁ ୨୦ ପ୍ରତିଶତରୁ ଅଧିକ ଅମ୍ଳଜାନ ଯୋଗାଇଥାଏ। ଅଙ୍ଗାରକାମ୍ଳ ମାତ୍ରା କମାଇବା, ବାୟୁ ପ୍ରଦୁଷଣ ନିୟନ୍ତ୍ରଣ ସହ ଠିକ୍ ସମୟରେ ବର୍ଷା ତଥା ଜଳବାୟୁକୁ ଜୀବଜଗତ ପାଇଁ ଅନୁକୂଳ ରଖିବାରେ ଏହି ଜଙ୍ଗଲର ଅବଦାନ ଅନେକ। କିନ୍ତୁ କ୍ରମାଗତ ଭାବେ ଜଙ୍ଗଲ ନଷ୍ଟ, ଜଳବାୟୁ ପରିବର୍ତ୍ତନ ଯୋଗୁ ମରୁଡ଼ି ପରିସ୍ଥିତି ଏବେ ନୂଆ ଜଙ୍ଗଲ ସୃଷ୍ଟିରେ ବାଧା ହୋଇ ଛିଡ଼ାହୋଇଛି। ଏହା ଲାଗି ରହିଲେ ୨୦୬୪ ସୁଦ୍ଧା ଆମାଜନ ନିଜ ଅସ୍ତିତ୍ୱ ହରାଇବ ବୋଲି ରବର୍ଟ ଓ୍ବାକର କହିଛନ୍ତି। ଆମାଜନ ଜିଓ-ରେଫରେନ୍ସଡ୍ ସୋସିଓ ଏନଭାଇରନମେଣ୍ଟାଲ ନେଟୱର୍କ ସୂଚନା ମୁତାବକ, ଗତ ୧୮ ବର୍ଷରେ ଜଙ୍ଗଲର ୮ ପ୍ରତିଶତ ଅଞ୍ଚଳରୁ ଗଛ କଟାସରିଛି, ଯାହାର ଆକାର ସ୍ପେନ ଭଳି ଦେଶଠାରୁ ଅଧକ ଅଞ୍ଚଳ ପର୍ଯ୍ୟନ୍ତ ପରିବ୍ୟାପ୍ତ। ଏହା ଗଭୀର ଚିନ୍ତାର କାରଣ। ଏବେଠାରୁ ସଚେତନ ନ ହେଲେ ଆଗାମୀ ଦିନ ସମ୍ପୂର୍ଣ୍ଣ ଜୀବଜଗତର ଅସ୍ତିତ୍ୱ ସଙ୍କଟରେ ପଡ଼ିପାରେ ବୋଲି ଓ୍ବାକର ଚେତାଇଦେଇଛନ୍ତି।
