ବାରିପଦା ଅଫିସ,୩ା୨: ଆର୍ଥତ୍କ ଅନଟନ ମଧ୍ୟରେ ପେଟକୁ ଦୁଇଓଳି ଖାଇବାକୁ ନ ପାଇ ୧୭ବର୍ଷ ବୟସରେ ଦାଦନ ଖଟିବାକୁ ଘର ଛାଡ଼ି ଦେଇଥିଲେ। ୨୦ବର୍ଷ ପରେ ନିଜେ ସ୍ବାବଲମ୍ବୀ ହୋଇ ବୁଧବାର ଘରକୁ ଫେରିଛନ୍ତି ଜଣେ ଯୁବକ। ସେ ହେଲେ ବାରିପଦା ଟାଉନ ଥାନା ଅଧୀନ ବାଘଡାରୋଡ୍ ଅଞ୍ଚଳର ସୀତରାମ ଚୌହାନଙ୍କ ପୁଅ ଅମରଜିତ। ଦୀର୍ଘ ବର୍ଷ ପରେ ସେ ଘରକୁ ଫେରିଥିବାରୁ ପରିବାରରେ ଖୁସିର ଲହରୀ ଦେଖିବାକୁ ମିଳିଛି। ତାଙ୍କୁ ଦେଖିବା ପାଇଁ ସାଙ୍ଗସାଥି ଓ ଆତ୍ମୀୟସ୍ବଜନଙ୍କ ଭିଡ଼ ପରିଲକ୍ଷିତ ହୋଇଛି।
୨୦୦୨ରେ ଅମରଜିତ ଏମ୍ପିସି କଲେଜରେ ପାଠ ପଢୁଥିବା ବେଳେ ଦାରିଦ୍ର୍ୟ କଷାଘାତ ଯୋଗୁ ଘର ଛାଡ଼ି ପଳାଇଥିଲେ। ମା’, ବାପା ଓ ବଡ଼ଭାଇ ମିଶି ବହୁ ଖୋଜାଖୋଜି କରିବା ପରେ ତାଙ୍କର କୌଣସି ସନ୍ଧାନ ପାଇ ନ ଥିଲେ। ଅମରଜିତ୍ କୁହନ୍ତି, କାମ ଅନ୍ବେଷଣରେ ସେ ପ୍ରଥମେ ମହାରାଷ୍ଟ୍ର ପଳାଇ ଯାଇଥିଲେ। ଅଚିହ୍ନା ଅପରିଚିତ ସ୍ଥାନରେ ତାଙ୍କୁ କାମ ମିଳି ନ ଥିଲା। ଏକ ସାଇକେଲ ଦୋକାନ ବନ୍ଦ ହେବା ପରେ ନିଜ ବ୍ୟାଗକୁ ଧରି ସେଠାରେ ଶୋଉଥିଲେ। ବଡ଼ିଭୋରରୁ ଉଠି କାମ ଅନ୍ବେଷଣରେ ବାହାରି ପଡୁଥିଲେ। କାମ ମିଳୁ ନ ଥିବାରୁ ଅନେକ ଦିନ ଭୋକ ଉପାସରେ ଦିନ କଟୁଥିବା ବେଳେ ପାଣିପିଇ ଜୀବନ ବଞ୍ଚାଇବା ପରି କଷ୍ଟ ଭୋଗୁଥିଲେ। ତେବେ ଜନୈକ ସହୃଦୟ ବ୍ୟକ୍ତିଙ୍କ ସାହାଯ୍ୟରେ ସେ ସ୍ଥାନୀୟ ବାସିନ୍ଦା ପ୍ରମାଣପତ୍ର ଯୋଗାଡ଼ କରି ସିକ୍ୟୁରିଟି ଚାକିରି କରିଥିଲେ। କିଛି ଦିନ ରହିବା ପରେ ସିରତା ଡ୍ୟାମ ନିର୍ମାଣକାରୀ ସଂସ୍ଥାର ଜଗୁଆଳି କାର୍ଯ୍ୟ ପାଇଥିଲେ। ପରେ ସେଠାରୁ ମୁମ୍ବାଇ ପଳାଇଆସି ଜୀବନ ଜୀବିକା ପାଇଁ ସଂଘର୍ଷ ଜାରି ରଖିଲେ। ସେଠାରେ ନିଜର ଟୁର୍ ଆଣ୍ଡ୍ ଟ୍ରାଭେଲ୍ସ ବ୍ୟବସାୟ ଆରମ୍ଭ କରି ଆଜିର ଦିନରେ ୨ଚକିଆ ଓ ୪ଚକିଆ ଯାନ ଭଡ଼ା ଦେଉଛନ୍ତି ା ନିଜ ଗୋଡ଼ରେ ଛିଡ଼ା ହେବା ସହ ସ୍ବାବଲମ୍ବୀ ହୋଇପାରିଛନ୍ତି। ପରେ ଘରକୁ ଫେରିବା ପାଇଁ ମନବଳାଇଲେ। ସୋସିଆଲ ମିଡିଆରେ ସାଙ୍ଗସାଥିଙ୍କ ସହ ଯୋଡ଼ି ହୋଇ ଘରକୁ ଫେରିବା ପାଇଁ ମନସ୍ଥ କରିଥିଲେ। ସୁଦୂର ମୁମ୍ବାଇରୁ ନିଜର ସୌଖିନ ବାଇକ୍ ଚଳାଇ ବାରିପଦାରେ ପହଞ୍ଚିଛନ୍ତି। ଇତି ମଧ୍ୟରେ ସେ ତାଙ୍କ ବାପା ଓ ବଡ଼ ଭାଇ ପ୍ରଦୀପଙ୍କୁ ହରାଇଛନ୍ତି। ଘରକୁ ଫେରିବା ପରେ ମା’ ସୁଲୋଚନା ତାଙ୍କୁ ପାଖରେ ବସାଇ ଖୁଆଇଦେବା ବେଳେ ସେ ଭାବବିହ୍ବଳ ହୋଇପଡିଥିଲେ।
