ଗଞ୍ଜାମ ଜିଲା ଛତ୍ରପୁର ଅଞ୍ଚଳ ବାସିନ୍ଦା ସେହନାଜ୍ ବିବି ଓ ନୁରାଅଲୀ ଖାନ୍ଙ୍କ ପୁଅ ଜଲାଲ୍ ଖାନ୍। ଜଣେ ସମାଜସେବୀ ଏବଂ ବଡିବିଲ୍ଡର ଭାବେ ସ୍ଥାନୀୟ ଅଞ୍ଚଳରେ ବର୍ତ୍ତମାନ ସେ ଜଣେ ଜଣାଶୁଣା ନାମ। ଗଞ୍ଜାମ ଲ’ କଲେଜରୁ ବିଏ.ଏଲ୍ଏଲ୍ବି. ପଢ଼ା ସାରି ସେ ଏବେ ବ୍ରହ୍ମପୁର ବିଶ୍ୱବିଦ୍ୟାଳୟରେ ସାମ୍ବାଦିକତା ଓ ଗଣଯୋଗଯୋଗ ବିଭାଗର ପ୍ରଥମ ବର୍ଷ ଛାତ୍ର। ପିଲାଟି ଦିନରୁ ପାଠପଢ଼ା ସାଙ୍ଗକୁ ଏନ୍ସିସି, ଏନ୍ଏସ୍ଏସ୍ରେ ସକ୍ରିୟ ସଦସ୍ୟ ଭାବେ ସମାଜସେବା କ୍ଷେତ୍ରରେ ସେ ଥିଲେ ସବୁବେଳେ ଆଗଭର। ବର୍ତ୍ତମାନ ସୁଦ୍ଧା ୨୦ ଥର ରକ୍ତଦାନ କରି ସେ ରାଜୀବ ଗାନ୍ଧୀ ସେବା ସମ୍ମାନ ପାଇଛନ୍ତି। ତାଙ୍କର ଫୁଟବଲ ଖେଳ ପ୍ରତି ରୁଚି ଥିବା ସହ ଯୁକ୍ତଦୁଇ ପାଠପଢ଼ା ସମୟରେ ସେ ବିଶ୍ୱବିଦ୍ୟାଳୟ ସ୍ତରରେ ଜଣେ ଭଲ ହକି ଖେଳାଳି ଭାବେ ଜିଲା ଓ ରାଜ୍ୟକୁ ପ୍ରତିନିଧିତ୍ୱ କରିଛନ୍ତି। ବଡ଼ ଭାଇ ବେଲାଲ୍ ଖାନ୍ଙ୍କୁ ନିଜର ଆଦର୍ଶ ମନେ କରି ୨୦୧୮ ମସିହାରୁ ସୁନ୍ଦର ସ୍ବାସ୍ଥ୍ୟ ପ୍ରତିଯୋଗିତା କ୍ଷେତ୍ରରେ ଆଗ୍ରହୀ ହୋଇଥିଲେ ଏବଂ ଉକ୍ତ ବର୍ଷ ଗଞ୍ଜାମ ଶ୍ରୀ ପୁରସ୍କାର ପାଇଥିଲେ। ପରେ ମିଷ୍ଟର ଓଡ଼ିଶା, କଳିଙ୍ଗଶ୍ରୀ ପାଇବା ସହ ଜାତୀୟ ସ୍ତରୀୟ ସୁନ୍ଦର ସ୍ବାସ୍ଥ୍ୟ ପ୍ରତିଯୋଗିତାରେ ଅଂଶ ଗ୍ରହଣ କରି ଅନେକ ପଦକ ହାସଲ କରିଛନ୍ତି। ବର୍ତ୍ତମାନ ସେ ୧୫ରୁ ଊର୍ଦ୍ଧ୍ୱ ଯୁବକଙ୍କୁ ବଡି ବିଲ୍ଡିଂ ତାଲିମ ପ୍ରଦାନ କରୁଛନ୍ତି। ସେହିପରି ନିଜସ୍ବ ଅଞ୍ଚଳରେ କିଛି ଦୈବୀ ଦୁର୍ବିପାକ ହେଉ ଅବା କାହାର କିଛି ଅସୁବିଧା ହେଲେ ନିଜ ସହଯୋଗୀଙ୍କ ସହ ସେ ପହଞ୍ଚତ୍ୟାଆନ୍ତି ଲୋକଙ୍କ ସହଯୋଗ ନିମନ୍ତେ। ସେହିପରି ନିଜ କ୍ୟାମ୍ପସ୍ ହତାରେ ହେଉ ଅବା ନିଜ ଆଖପାଖରେ ସବୁଜ ବନାନୀ ସୃଷ୍ଟି କରିବା ଲାଗି ସେ ବୃକ୍ଷରୋପଣ କରିଥାନ୍ତି। ମହାବିଦ୍ୟାଳୟ ସ୍ତରରୁ ଛାତ୍ର ରାଜନୀତିରେ ଯୋଗ ଦେଇ ଦୁଇ ଦୁଇ ଥର କ୍ରୀଡ଼ା ସମ୍ପାଦକ ଓ ସଭାପତି ଭାବେ କାର୍ଯ୍ୟ କରିସାରିଥିବା ଜଲାଲ୍ଙ୍କୁ ସୁଯୋଗ ମିଳିଲେ ଭବିଷ୍ୟତରେ ରାଜନୀତିରେ ଯୋଗଦେଇ ଲୋକଙ୍କ ସେବା କରିବା ସହ ସମାଜର ଉନ୍ନତି ପାଇଁ କାର୍ଯ୍ୟ କରିବାକୁ ଲକ୍ଷ୍ୟ ରଖିଥିବା ପ୍ରକାଶ କରିଛନ୍ତି।
– ତନୁଶ୍ରୀ ନାହାକ
