କେନ୍ଦୁଝର,୩୦ା୧୧(ସ୍ବ.ପ୍ର.): ଭତ୍ତା ଟଙ୍କା ହଡ଼ପ ଅଭିଯୋଗରେ ୨ ଜଣ ପୂର୍ବତନ ପିଇଓଙ୍କ ସମେତ ଜଣେ ପୂର୍ବତନ ସରପଞ୍ଚଙ୍କଙ୍କୁ ୩ ବର୍ଷ ଜେଲ ଦଣ୍ଡାଦେଶ ଏବଂ ୩୫ ହଜାର ଟଙ୍କା ଜରିମାନା ହୋଇଛି। ଜରିମାନା ଅନାଦେୟ ଅତିରିକ୍ତ ୬ ମାସ ଦଣ୍ଡାଦେଶ ହୋଇଛି। ଏ ନେଇ ବୁଧବାର ଚିଫ୍ ଜୁଡିସିଆଲ ମାଜିଷ୍ଟ୍ରେଟ ରଞ୍ଜୁଲତା ଲେଙ୍କା ଏହି ଆଦେଶ କରିଛନ୍ତ। ୨୦୧୬ରେ ହରିଚନ୍ଦନପୁର ବ୍ଲକ ଭଅଁରପୁର ପଞ୍ଚାୟତରେ କେତେକ ମୃତ ହିତାଧିକାରୀ ବଞ୍ଚିଥିବା ଦର୍ଶାଇ ତାଙ୍କ ଭତ୍ତା ଟଙ୍କା ହଡ଼ପ କରିଥିବା ନେଇ ଅଭିଯୋଗ ହୋଇଥିଲା। ଏ ବାବଦରେ ପାଖାପାଖି ୪ ଲକ୍ଷ ୫୦ ହଜାର ଟଙ୍କାରୁ ଊର୍ଦ୍ଧ୍ୱ ହଡ଼ପ ହୋଇଥିବା ନେଇ ତଦନ୍ତ ବିଡିଓ କରିଥିଲେ। ତଦନ୍ତ ପରେ ଅର୍ଥ ହଡ଼ପ ହୋଇଥିବା ଜଣାପଡ଼ିବା ପରେ ଥାନାରେ ଏତଲା ହୋଇଥିଲା। ହରିଚନ୍ଦନପୁର ପୋଲିସ କେସ ରୁଜୁ କରି ତଦନ୍ତ କରିଥିଲା। ସେମାନେ ଗିରଫ ନ ହେବା ପାଇଁ ଆଗୁଆ ଜାମିନ ଆବେଦନ କରିଥିଲେ। ଏହି ମାମଲାରେ ଆଜି ଶୁଣାଣି କରି ପୂର୍ବତନ ଭଅରପୁର ପଞ୍ଚାୟତ ପିଇଓ ପୂର୍ଣ୍ଣଚନ୍ଦ୍ର ପାତ୍ର,ଶୁକଦେବ ମହାନ୍ତ ଏବଂ ଭଅଁରପୁର ପଞ୍ଚାୟତର କୁନ୍ତଳା ଦେହୁରୀଙ୍କୁ ଏହି ଦଣ୍ଡ ଆଦେଶ କରିଛନ୍ତି। ୧୯ ଜଣ ମୃତ ହିତାଧିକାରୀଙ୍କ ଜୀବିତ ଥିବା ଦର୍ଶାଇ ଏବଂ ୭ ଜଣ ନକଲି ହିତାଧିକାରୀ ତଥା ୪୯ ଜଣ ହିତାଧିକାରୀଙ୍କ ନାମ ୨ ଥର ପେନ୍ସନ୍ ରେଜିଷ୍ଟ୍ରରରେ ଦର୍ଶାଇ ଉକ୍ତ ଟଙ୍କା ହଡ଼ପ ହୋଇଥିବା ଜଣାପଡ଼ିଛି। ଏ ନେଇ ତଦନ୍ତ ସମୟରେ ଶୁକଦେବ ମହାନ୍ତ ୭୪ ହଜାର ୨୦୦ ଟଙ୍କା, ପୂର୍ଣ୍ଣଚନ୍ଦ୍ର ପାତ୍ର ୧୧ହଜାର ୫୦୦ ଟଙ୍କା ଏବଂ କୁନ୍ତଳା ଦେହୁରୀ ୩ ଲକ୍ଷ ୬୮ ହଜାର ୯୦୦ ଟଙ୍କା ଠକି ନେଇଥିବା ଜଣାପଡ଼ିଥିଲା। ଏହି ଠକେଇ ୨୦୧୪-୧୫ ଏବଂ ୨୦୧୫-୧୬ମସିହାରେ ହୋଇଥିବା ଜଣାପଡ଼ିଛି।
