ପୁରୁଷୋତ୍ତମପୁର,୯ା୯(ସୀମାଞ୍ଚଳ ମିଶ୍ର): ଗଞ୍ଜାମ ଜିଲା ପୋଲସରା ଥାନା ପୋଲିସ ଜଣେ ସାମାଜିକ ବାସନ୍ଦ ଦିବ୍ୟାଙ୍ଗ ପରିବାରକୁ ନ୍ୟାୟ ପ୍ରଦାନ କରିବା ବଦଳରେ ଅସଦ ବ୍ୟବହାର ପ୍ରଦର୍ଶନ କରୁଥିବା ଅଭିଯୋଗ ହୋଇଛି। ପୋଲସରା ଥାନା ଅନ୍ତର୍ଗତ ଡିମ୍ବିରିଆ ଗ୍ରାମର ଦିବ୍ୟାଙ୍ଗ ଅଭିମନ୍ୟୁ ସାହୁ ତାଙ୍କ ପତ୍ନୀ, ପୁଅ, ବୋହୁଙ୍କୁ ନେଇ ପୁରୁଷୋତ୍ତମପୁର ଏସଡିପିଓଙ୍କ ଠାରେ ଶୁକ୍ରବାର ଫେରାଦ ହୋଇ ନ୍ୟାୟ ଭିକ୍ଷା କରିଛନ୍ତି। ଏସଡିପିଓ ରଜନିକାନ୍ତ ସାମଲ ନିଜେ ପୋଲସରା ଯାଇ ଘଟଣାର ତଦନ୍ତ କରି ତୁରନ୍ତ ନ୍ୟାୟ ପ୍ରଦାନ କରିବାଲାଗି ପ୍ରତିଶ୍ରୁତି ଦେଇଛନ୍ତି। ଡିମ୍ବିରିଆର ଅଭିମନ୍ୟୁ ସାହୁ ଓ ସ୍ତ୍ରୀ କସ୍ତୁରୀ, ପୁଅ ପରିକ୍ଷିତ ଝିଅ ପ୍ରତିମା ସମସ୍ତେ ଦିବ୍ୟାଙ୍ଗ ଶ୍ରେଣୀର ଅଟନ୍ତି। ଗତ ୮ ବର୍ଷ ତଳେ ବୋହୁ ସୁନିତା କୁଣ୍ଡୁ ଓ ପୁଅ ପରିକ୍ଷିତଙ୍କ ମଧ୍ୟରେ ପାରିବାରିକ ମନୋମାଳିନ୍ୟ ଘଟିଥିଲା। ଏହାକୁ ନେଇ ବୋହୁ ସୁନିତା ଗ୍ରାମ ସଭାପତିଙ୍କୁ ଜଣାଇଥିଲେ। ସ୍ତ୍ରୀଙ୍କୁ ଫେରାଇ ଘରକୁ ଆଣିବା ଲାଗି ପରକ୍ଷିତ ସେତେବେଳେ ପୋଲିସକୁ ଅନୁରୋଧ କରିଥିଲେ। ଆଉ ପୋଲିସ ମଧ୍ୟ ତାଙ୍କ ସ୍ତ୍ରୀକୁ ବୁଝାଇ ଘରକୁ ଫେରାଇ ଆଣିଥିଲେ। ମାତ୍ର ପୋଲିସକୁ ଜଣାଇବାକୁ ନେଇ ତାଙ୍କ ପରିବାରକୁ ବଳାସୀଜାତି କୁଳ ସମାଜ ପକ୍ଷରୁ ବାସନ୍ଦ କରିଥିବା ନେଇ ପରକ୍ଷିତ ଅଭିଯୋଗ କରିଛନ୍ତି। ଏପରିକି ପୁଅ ବୋହୁ ଓ ପରିବାରର ସମସ୍ତଙ୍କୁ ନେଇ ଅଭିମନ୍ୟୁ ସୁଖ ଶାନ୍ତିରେ ଏକତ୍ର ରହୁଥିଲେ ମଧ୍ୟ ତାଙ୍କ ପରିବାରକୁ କୁଳ ସମାଜରୁ ବାସନ୍ଦ ରଖାଯାଇଛି। ଯାହାଦ୍ୱାରା ତାଙ୍କର ଝିଅ ବିବାହ କରିପାରୁ ନାହାନ୍ତି। ଏହି ଘଟଣାକୁ ନେଇ ଦୀର୍ଘ ଦିନ ହେଲା ଥାନାକୁ ଦୌଡି ଦୌଡି ନିରାଶ ହେବା ସହ ଗଞ୍ଜାମ ଏସପି ଓ ଦକ୍ଷିଣାଞ୍ଚଳ ଡିଆଇଜିଙ୍କୁ ମଧ୍ୟ ଭେଟି ଗୁହାରି ଜଣାଇଛନ୍ତି। ଏପରିକି ୪ ତାରିଖରେ ସମ୍ପୂର୍ଣ୍ଣ ପରିବାର ଛତ୍ରପୁର ଯାଇ ସେଠାରେ ଜିଲାପାଳ ଦିବ୍ୟଜୋତି ପରିଡା ଓ ଏସପି ଜଗମୋହନ ମିନାଙ୍କ ମିଳିତ ଅଭିଯୋଗ ଶୁଣାଣିରେ ଗୁହାରି ଜଣାଇ ତାଙ୍କ ପରିବାର ଉପରେ ହୋଇଥିବା ସାମାଜିକ ବାସନ୍ଦ ଉଠାଇବା ଲାଗି ନିବେଦନ କରିଥିଲେ। ଏସପିଙ୍କ ପରାମର୍ଶ ପ୍ରକାରେ ପୋଲସରା ଥାନାକୁ ଆସିଥିଲେ। ମାତ୍ର ପୋଲସରା ପୋଲିସ ତାଙ୍କୁ ନ୍ୟାୟଦେବା ବଦଳରେ ଅସଦ ବ୍ୟବହାର କରିଥିବା ନେଇ ଦିବ୍ୟାଙ୍ଗ ପରିବାର ଅଭିଯୋଗ କରି ଏସଡିପିଓଙ୍କ ଠାରେ ଫେରାଦ ହୋଇ ଗୁହାରି କରିଛନ୍ତି। ନ୍ୟାୟ ନ ମିଳିଲେ ପୂରା ପରିବାର ସଦସ୍ୟ ଆତ୍ମହତ୍ୟା କରିବେ ବୋଲି କହିଛନ୍ତି।
