ବଲାଙ୍ଗୀର ଅଫିସ/ ଲାଠୋର, ୧୯ା୯ (ଡି.ଏନ୍.ଏ.): ଜଣେ ଯୁବକଙ୍କୁ ଘରୁ ଅପହରଣ କରାଯାଇଥିବା ନେଇ ବଲାଙ୍ଗୀର ଜିଲା ଲାଠୋର ଥାନାରେ ଲିଖିତ ଅଭିଯୋଗ ହେବାପରେ ଜିଲାବ୍ୟାପୀ ଚର୍ଚ୍ଚାର ବିଷୟ ହୋଇଛି। ଏହି ଘଟଣାରେ ଅଭିଯୋଗକାରିଣୀ ୩ଜଣଙ୍କ ନଁାରେ ଏବଂ ଜଣେ ଅଜଣା ବ୍ୟକ୍ତିଙ୍କ ସମ୍ପୃକ୍ତି ନେଇ ଅଭିଯୋଗ କରିଛନ୍ତି। ଏହି ଘଟଣାରେ ଜଣେ ଏନଏସି ଅଧ୍ୟକ୍ଷଙ୍କ ସମ୍ପୃକ୍ତି ରହିଥିବା ଚର୍ଚ୍ଚା ହେବା ପରେ ଘଟଣାଟି ଆଲୋଡନ ଖେଳାଇ ଦେଇଛି। ଲାଠୋର ଥାନା ପୋଲିସ ଏହି ଘଟଣା ସମ୍ପର୍କରେ ୪ଜଣଙ୍କ ନଁାରେ ମାମଲା ରୁଜୁ କରିଥିଲେ ମଧ୍ୟ ଗଣମାଧ୍ୟମ ସମ୍ମୁଖରେ ଘଟଣାକୁ ନେଇ ପାଟି ଖୋଲୁନାହିଁ।
ଲାଠୋର ନିବାସୀ କୌଶଲ୍ୟାଦେବୀ ଅଗ୍ରୱାଲ(୪୬) ଥାନାରେ ରବିବାର ତାଙ୍କ ପୁଅ ଦୀନଦୟାଲ ଅଗ୍ରୱାଲ(୨୮)ଙ୍କୁ ୪ ଜଣ ବ୍ୟକ୍ତି ଅପହରଣ କରିନେଇଥିବା ଅଭିଯୋଗ କରିଥିଲେ। ଅଭିଯୋଗପତ୍ରରେ ସେ ଉଲ୍ଳେଖ କରିଥିଲେ ଯେ, ରବିବାର ମଧ୍ୟାହ୍ନ ୧୨ଟା ୩୦ରେ ତାଙ୍କ ଘରକୁ ରାୟପୁରର ସୁନୀଲ ଅଗ୍ରୱାଲ, ଅଜୟ ଅଗ୍ରୱାଲ, କଣ୍ଟାବାଞ୍ଜିର ନାଗୁ ସିଂ ସାଲୁଜା ଏବଂ ଅନ୍ୟ ଜଣେ ବ୍ୟକ୍ତି ଆସି ତାଙ୍କ ପୁଅ ଦୀନଦୟାଲଙ୍କୁ ମାଡ ମାରି ଜୋର ଜବରଦସ୍ତି ଏକ କାରରେ ଉଠାଇ ନେଇଥିଲେ। ସେମାନଙ୍କୁ ଅଟକାଇବାକୁ ଚେଷ୍ଟା କରିବାରୁ ତାଙ୍କୁ ମଧ୍ୟ ଧକ୍କା ଦେଇଥିବା କୌଶଲ୍ୟାଦେବୀ ଅଭିଯୋଗ କରିଥିଲେ। ତାଙ୍କ ପୁଅକୁ ଜୀବନରେ ମାରିଦେବାର ଧମକ ଦିଆଯାଇଥିବା କହିଥିଲେ। ଅଭିଯୋଗ ପାଇବା ପରେ ପୋଲିସ ଲାଠୋର ଥାନାରେ ଏକ ମାମଲା (୧୦୮/୨୨) ରୁଜୁ କରିଥିଲା। ଅପହରଣ ପଛର କାରଣ ସମ୍ପର୍କରେ ଅଭିଯୋଗପତ୍ରରେ କିଛି ଲେଖାଯାଇନାହିଁ। ତେବେ ପୋଲିସ ଦଫା ୩୪୧, ୩୬୫, ୩୨୩, ୫୦୬, ୩୪ରେ ମାମଲା ରୁଜୁ କରିଛି। ପୋଲିସ ମାମଲା ରୁଜୁ କରିଥିଲେ ମଧ୍ୟ ଗଣମାଧ୍ୟମକୁ କିଛି ବି ସୂଚନା ଦେଇନାହିଁ। ଅନ୍ୟପକ୍ଷେ ଏହି ମାମଲାରେ ଜଣେ ଏନ୍ଏସି ନଗରପାଳଙ୍କ ସମ୍ପୃକ୍ତି ଚର୍ଚ୍ଚା ପ୍ରଚାରିତ ହେବା ପରେ ଘଟଣାଟି ରାଜନୈତିନ ନଁା ବ୍ୟବସାୟିକ ତାକୁ ନେଇ ସାଧାରଣରେ ଆଲୋଚନା ପର୍ଯ୍ୟାଲୋଚନା ଆରମ୍ଭ ହୋଇଛି। ପାଟଣାଗଡ ଏସ୍ଡିପିଓ ଜ୍ୟୋତିର୍ମୟ ଭୁକ୍ତାଙ୍କୁ ତାଙ୍କ ମୋବାଇଲ ନମ୍ବର ୯୪୩୭୯୦୬୦୬୦ରେ ଯୋଗାଯୋଗ କରାଯାଇଥିଲା। ହେଲେ ରିଙ୍ଗ୍ ହେବା ସେତ୍ତ୍ୱ ସେ ଫୋନ୍ ରିସିଭ ନ କରିବାରୁ ତାଙ୍କ ପ୍ରତିକ୍ରିୟା ମିଳିପାରିନାହିଁ। ଲାଠୋର ଥାନାଧିକାରୀ ଏନେଇ କିଛି କହିବାକୁ ମନା କରିଦେଇଛନ୍ତି। ତେବେ ଅସମର୍ଥିତ ସୂତ୍ରରୁ ମିଳିଥିବା ଖବର ମୁତାବକ ପୋଲିସ ଅପହୃତ ଯୁବକଙ୍କୁ ଉଦ୍ଧାର କରି ଘରେ ଛାଡିଥିବା ଜଣାପଡିଛି।
