କଟକ ଅଫିସ,୧୯/୮: କଟକ ମହାନଗର ନିଗମ ଅନ୍ତର୍ଗତ ଓ୍ବାର୍ଡ ନଂ. ୨୬ ଭଗତପୁର ଅଞ୍ଚଳର ଡେଙ୍ଗୁରେ ଆକ୍ରାନ୍ତ ଜଣେ ଯୁବକଙ୍କ ବୁଧବାର ମୃତ୍ୟୁ ହୋଇଥିବା ଅଭିଯୋଗ ହୋଇଛି। ମୃତକଙ୍କ ନାମ ଦୀପକ ମୁଦୁଲି (୩୬)। ପରିବାର ସୂତ୍ରରୁ ମିଳିଥିବା ସୂଚନାନୁସାରେ, ଗତ ସପ୍ତାହରେ ଦୀପକଙ୍କୁ ଜ୍ୱର ହୋଇଥିଲା। ସେ ସ୍ଥାନୀୟ ଏକ ଘରୋଇ ହସ୍ପିଟାଲରେ ଚିକିତ୍ସିତ ହୋଇଥିଲେ। ଗତ ୧୫ ତାରିଖରେ ରକ୍ତ ନମୁନା ପରୀକ୍ଷାରୁ ସେ ଡେଙ୍ଗୁରେ ଆକ୍ରାନ୍ତ ହୋଇଥିବା ଜଣାପଡ଼ିଥିଲା। ତେବେ ତାଙ୍କର ସ୍ବାସ୍ଥ୍ୟାବସ୍ଥା ଗୁରୁତର ହେବାରୁ ପରିବାର ଲୋକେ ତାଙ୍କୁ ବୁଧବାର ସକାଳେ ଏସ୍ସିବି ମେଡିକାଲରେ ଭର୍ତ୍ତି କରିଥିଲେ। ସେଠାରେ ଚିକିତ୍ସାଧୀନ ଅବସ୍ଥାରେ ଅପରାହ୍ନରେ ତାଙ୍କର ମୃତ୍ୟୁ ହୋଇଛି। ତେବେ ଏସମ୍ପର୍କରେ ସରକାରୀ ଭାବେ କୌଣସି ସୂଚନା ଦିଆଯାଇ ନାହିଁ। ଜିଲା ମୁଖ୍ୟ ଚିକିତ୍ସାଧିକାରୀ ଡା. ସତ୍ୟବ୍ରତ ଛୋଟରାୟଙ୍କୁ ପଚାରିବାରୁ ଏନେଇ ତାଙ୍କ ନିକଟରେ କୌଣସି ତଥ୍ୟ ହସ୍ତଗତ ହୋଇନାହିଁ। ଏସ୍ସିବି ମେଡିକାଲରୁ ତଥ୍ୟ ମିଳିଲେ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି। ସହରରେ ଏହା ପୂର୍ବରୁ କୌଣସି ଡେଙ୍ଗୁ ମୃତ୍ୟୁ ହୋଇନାହିଁ। ସରକାରୀ ଭାବେ ଘୋଷଣା କରାଗଲେ ଚଳିତ ବର୍ଷର ଏହା ପ୍ରଥମ ଡେଙ୍ଗୁ ମୃତ୍ୟୁ ହେବ ବୋଲି ଡା. ଛୋଟରାୟ କହିଛନ୍ତି। ଅପରପକ୍ଷରେ କଟକ ମହାନଗର ନିଗମ(ସିଏମ୍ସି)ର ଖାମଖିଆଲ ମନୋଭାବ ଯୋଗୁ ଜଣେ ଯୁବକଙ୍କ ଡେଙ୍ଗୁରେ ଜୀବନ ଗଲା ବୋଲି ୨୬ ନଂ. ଓ୍ବାର୍ଡ କର୍ପୋରେଟର ଗଗନ ଓଝା କହିଛନ୍ତି। ଏହି ଓ୍ବାର୍ଡ ଡେଙ୍ଗୁ ପ୍ରଭାବିତ ହୋଇଥିବା ନେଇ ସିଏମ୍ସିକୁ ବାରମ୍ବାର ଅବଗତ କରାଯାଇଥିଲେ ସୁଦ୍ଧା କିଛି ସୁଫଳ ମିଳୁ ନାହିଁ। ମଶା ତେଲ ମଧ୍ୟ ଠିକ୍ରେ ପକାଯାଉ ନାହିଁ ବୋଲି ଗଗନ କହିଛନ୍ତି। ତେବେ ଏଭଳି ଅଭିଯୋଗକୁ ସିଏମ୍ସି ସ୍ବାସ୍ଥ୍ୟ ଅଧିକାରୀ ସତ୍ୟବ୍ରତ ମହାପାତ୍ର ଖଣ୍ଡନ କରିଛନ୍ତି। ସେ କହିଛନ୍ତି, ପ୍ରତ୍ୟେକ ଦିନ ସହରର ସବୁ ସ୍ଥାନରୁ ପରିତ୍ୟକ୍ତ ଅବସ୍ଥାରେ ପଡ଼ିଥିବା ଟାୟାର ଉଠାଯାଉଛି ା ସେହିପରି ଲୋକଙ୍କୁ ସଚେତନ କରିବା ପାଇଁ ଆଶା କର୍ମୀଙ୍କୁ ନିୟୋଜିତ କରାଯାଇଛି ା ପ୍ରତ୍ୟେକ ରବିବାର ଡ୍ରାଏ ଡେ’ ମଧ୍ୟ ପାଳନ କରାଯାଉଛି। ସବୁ ପ୍ରକାର କାର୍ଯ୍ୟ ଜାରି ରହିଥିବାରୁ ଗତ ଜାନୁୟାରୀରୁ ବର୍ତ୍ତମାନ ପର୍ଯ୍ୟନ୍ତ ମାତ୍ର ୧୯ ଜଣ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି। ସେହିପରି ଉପଯୁକ୍ତ ଚିକିସତ୍ା ନ ମିଳିବା କାରଣରୁ ଲୋକଙ୍କ ମୃତ୍ୟୁ ହୋଇଛି ା ଏଥିପାଇଁ ମହାପାତ୍ର ଘରୋଇ ହସ୍ପିଟାଲକୁ ଦାୟୀ କରିଛନ୍ତି। କାରଣ ଘରୋଇ ହସ୍ପିଟାଲରେ ଆବଶ୍ୟକ ଚିକିତ୍ସା ସୁବିଧା ନ ଥାଇ ଡେଙ୍ଗୁ ରୋଗୀଙ୍କୁ ଚିକିତ୍ସା କରାଯାଉଛି, ରୋଗୀ ଗୁରୁତର ହେବା ପରେ ତାଙ୍କୁ ସରକାରୀ ଡାକ୍ତରଖାନାକୁ ସ୍ଥାନାନ୍ତର କରାଯାଉଛି। ଯଦି କୌଣସି ଡେଙ୍ଗୁ ରୋଗୀ ଆସୁଛନ୍ତି, ତେବେ ତୁରନ୍ତ ତାଙ୍କୁ ଏସ୍ସିବି ପଠାଇବାକୁ ସହରର ସମସ୍ତ ଘରୋଇ ହସ୍ପିଟାଲ୍କୁ ନୋଟିସ କରାଯାଇଥିବା ମହାପାତ୍ର କହିଛନ୍ତି।
