ଆଳି,୨୭ା୬ (ବନମାଳୀ ସେନାପତି ): କେନ୍ଦ୍ର ଓ ରାଜ୍ୟ ସରକାର ଗ୍ରାମାଞ୍ଚଳର ବିକାଶ ନିମନ୍ତେ ବିଭିନ୍ନ ଉନୟନମୂଳକ କାର୍ଯ୍ୟ କରି ଚାଲିଛନ୍ତି। କୋଟି କୋଟି ଟଙ୍କା ଖର୍ଚ୍ଚ କରାଯାଇ ଉନ୍ନୟନମୂଳକ କାର୍ଯ୍ୟ କରା ଯାଉଥିବା ବେଳେ ଆଳି ବ୍ଲକ ଚଣ୍ଡିଆଗଡି ପଞ୍ଚାୟତରେ ଏକ ପୋଖରୀର ବିକାଶ ଓ ସରଂକ୍ଷଣ ନାମରେ ଦୁର୍ନୀତି ଅଭିଯୋଗ ହୋଇଛି। ପୋଖରୀଟି ଜଣେ ବ୍ୟକ୍ତିଗତ ଲୋକର ହୋଇଥିବା ବେଳେ ସରକାରୀ ଅଧିକାରୀମାନେ ସେହି ସ୍ଥାନରେ ସରକାରୀ ପ୍ରକଳ୍ପ କରାଇ ଏ ବାବଦରେ ଅର୍ଥ ଉଠାଇ ନେଇଥିବା ଅଭିଯୋଗ ହୋଇଛି।
ମିଳିଥିବା ସୂଚନା ମୁତାବକ, ପଞ୍ଚାୟତିରାଜ ଓ ପାନୀୟଜଳ ବିଭାଗ ପକ୍ଷରୁ ଆଳି ବ୍ଲକ ଚଣ୍ଡିଆଗଡି ପଞ୍ଚାୟତର ବଗୁଲିଆ ପୋଖରୀର ସରଂକ୍ଷଣ ଓ ବିକାଶ ନିମନ୍ତେ ୨୦୨୨-୨୩ ଆର୍ଥିକ ବର୍ଷରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍) ରେ ପ୍ରାୟ ୬ ଲକ୍ଷ ୬୩ ହଜାର ଟଙ୍କା ବ୍ୟୟବରାଦ ହୋଇଥିଲା। ଏବେ ଏହି କାର୍ଯ୍ୟ ଶେଷ ହୋଇ ଏ ବାବଦରେ ଥିବା ଅର୍ଥ ରାଶି ଉଠାଇ ନିଆଯାଇଛି। ମାତ୍ର ପୋଖରୀ ଯେଉଁ ଜମିରେ ଖୋଳାଯାଇଛି ସେହି ଜମି ପଞ୍ଚାୟତର ଜଣେ ବ୍ୟକ୍ତିଙ୍କର ବୋଲି ଏବେ ସୂଚନା ମିଳିଛି। ଦୀର୍ଘବର୍ଷ ହେବ ସେହି ବ୍ୟକ୍ତିଙ୍କର ସେହି ସ୍ଥାନରେ ଏକ ଜଳାଶୟ ଥିଲା। କିଛିଦିନ ପୂର୍ବେ ସେହି ଜଳାଶୟର ସଂରକ୍ଷଣ ଓ ବିକାଶ ନିମନ୍ତେ ସରକାରୀ ଯୋଜନାରେ ପ୍ରାୟ ୬ ଲକ୍ଷରୁ ଊର୍ଦ୍ଧ୍ୱ ଅର୍ଥ ଖର୍ଚ୍ଚ କରାଯାଇଛି। ବ୍ୟକ୍ତିଗତ ସ୍ଥାନରେ କିପରି ସରକାରୀ ଅର୍ଥ ଖର୍ଚ୍ଚ କରାଗଲା ତାହା ପୁଣି ଏମ୍ଜିଏନ୍ଆର୍ଇଜିଏସ୍ରେ ଏହାକୁ ନେଇ ଏବେ ସରକାରୀ ଅଧିକାରୀଙ୍କ ଉପରେ ସନ୍ଦେହ ସୃଷ୍ଟି କରିଛି। ଏମ୍ଜିଏନ୍ଆର୍ଇଜିଏସ୍ରେ ପୋଖରୀ ଖୋଳା ଯାଇଥିବା ବେଳେ ସେଠାରେ ସାଧାରଣ ଲୋକଙ୍କ ଅବଗତି ନିମନ୍ତେ ସୂଚନା ଫଳକଟିଏ ମଧ୍ୟ ଲଗାଯାଇନାହିଁ। ବିନା ଫଳକରେ ସରକାରୀ ଅର୍ଥ ଖର୍ଚ୍ଚ କରି ବ୍ୟକ୍ତିଗତ ଜମିରେ ପୋଖରୀ ଖୋଳି ଅର୍ଥ ଉଠାଇ ଯାଇ ଉନ୍ନତି ମୂଳକ କାର୍ଯ୍ୟ ପ୍ରଶାସନିକ ଅଧିକାରୀଙ୍କ ଦ୍ୱାରା ହେଉଛି ତାହା ସ୍ପଷ୍ଟ ବାରି ହୋଇପଡୁଛି। ଏହି ପ୍ରକଳ୍ପର କାର୍ଯ୍ୟାଦେଶ କନିଷ୍ଠଯନ୍ତ୍ରୀ ଶୁଭଦର୍ଶନି ସାହୁଙ୍କ ନାମରେ ଥିବା ବେଳେ ଯନ୍ତ୍ରୀଙ୍କ ତତ୍ତ୍ୱାବଧାନରେ କରାଯାଇଛି। ଏହି କାର୍ଯ୍ୟର ତଦାରଖ ଦାୟିତ୍ୱ ସହକାରୀ ଯନ୍ତ୍ରୀ ଓ ବିଡିଓଙ୍କ ଉପରେ ନ୍ୟସ୍ଥ ଥିବା ବେଳେ ଏବେ ଏହି ଦୁର୍ନୀତି ସାମ୍ନାକୁ ଆସିଛି। ଏହା ପରେ ବ୍ଲକ ସହକାରୀ ଯନ୍ତ୍ରୀ ଓ ବିଡିଓଙ୍କ ଭୂମିକା ଉପରେ ସନ୍ଦେହ ସୃଷ୍ଟି କରୁଛି। କାରଣ ପୋଖରୀ ଖୋଳା ଯାଇଥିବା ଜମି ପଞ୍ଚାୟତର ଜଣେ ଲୋକ ନାମରେ ଥିବା ବେଳେ କିଭଳି ଭାବେ ପ୍ରଶାସନିକ ଅଧିକାରୀ ତାହା ତଦନ୍ତ ନ କରି ବିଲ କରି ଦେଲେ ସେ ନେଇ ଅନେକ ସନ୍ଦେହ ସୃଷ୍ଟି କରୁଛି। ଘଟଣାର କେନ୍ଦ୍ରାପଡ଼ା ଜିଲାପାଳ ତଦନ୍ତ ନିମନ୍ତେ ଗ୍ରାମବାସୀ ଦାବି କରିଛନ୍ତି। ଏ ନେଇ ଆଳି ବିଡିଓ ଦିବେନ୍ଦୁ ଦାସଙ୍କୁ ପଚାରିବାରୁ ଅଭିଯୋଗ ଆସିଛି, ତେଣୁ ସେହି ଜମି ପ୍ରକୃତରେ ବ୍ୟକ୍ତିଗତ କିମ୍ବା ସରକାରୀ ତାହା ଆଳି ତହସିଲ ପକ୍ଷରୁ ରେକର୍ଡ ମଗାଯାଇ ଦେଖାଯିବ। ଯଦି ଏହା ବ୍ୟକ୍ତିଗତ ଜମି ହୋଇଥାଏ ତେବେ ଯେଉଁ ଅର୍ଥ ଖର୍ଚ୍ଚ କରାଯାଇଛି ତାହା ପୁନର୍ବାର ଭରଣ କରାଯିବ ବୋଲି ସେ କହିଛନ୍ତି।
