ବଲାଙ୍ଗୀର ଅଫିସ, ୧୬ା୫: ବଲାଙ୍ଗୀର ରାଜ ପରିବାର ସଦସ୍ୟ ତଥା ବିଜେଡି ଯୁବନେତା ଅର୍କେଶ ନାରାୟଣ ସିଂଦେଓଙ୍କ ବିରୋଧରେ ତାଙ୍କ ସ୍ତ୍ରୀ ତଥା ପୂର୍ବତନ ପ୍ରଧାନମନ୍ତ୍ରୀ ଭି.ପି. ସିଂଙ୍କ ନାତୁଣୀ ଆଦ୍ରିଜା ମଞ୍ଜରୀ ସିଂଦେଓ ଗୁରୁତର ନିର୍ଯାତନା ଅଭିଯୋଗ ଆଣିଛନ୍ତି। ଏ ସମ୍ପର୍କିତ ଏକ ନ୍ୟୁଜ୍ କ୍ଲିପ୍ ସୋସିଆଲ ମିଡିଆରେ ଭାଇରାଲ ହେବା ପରେ ଘଟଣା ଚର୍ଚ୍ଚାର ବିଷୟ ହୋଇଛି। ଡେରାଡୁନ୍ଠାରେ ଉତ୍ତରାଖଣ୍ଡ ଡିଜିପିଙ୍କୁ ଭେଟି ତାଙ୍କ ନିର୍ଯାତନା ସମ୍ପର୍କରେ ଆଦ୍ରିଜା ଅଭିଯୋଗ କରିଥିବା ଭାଇରାଲ ନ୍ୟୁଜ୍ କ୍ଲିପ୍ରେ ସୂଚନା ଦିଆଯାଇଛି। ୧.୨୧ ମିନିଟର ନ୍ୟୁଜ୍ କ୍ଳିପ୍ରେ ୨୦୧୭ ମସିହାରେ ଅର୍କେଶ ଓ ଆଦ୍ରିଜାଙ୍କ ବିବାହ ସମ୍ପନ୍ନ ହୋଇଥିଲା। ଶାଶୁଘର ଲୋକେ ତାଙ୍କୁ ନିର୍ଯାତନା ଦେଇଥିବା ଏବଂ ଏ ସମ୍ପର୍କରେ ପୋଲିସକୁ ସୁରକ୍ଷା ପାଇଁ ଆଦ୍ରିଜା ଲିଖିତଭାବେ ଜଣାଇଥିବା କୁହାଯାଇଛି। ସୁରକ୍ଷା ପାଇଁ ଜଣାଇବା ପରେ ମଧ୍ୟ ପୋଲିସ ସହାୟତା ନ ମିଳିବାରୁ ଆଦ୍ରିଜା ଉତ୍ତରାଖଣ୍ଡ ଡିଜିପିଙ୍କୁ ଘଟଣା ସମ୍ପର୍କରେ ଜଣାଇଛନ୍ତି। ଅଭିଯୋଗ ପରେ ଡିଜିପି ଘଟଣା ସମ୍ପର୍କରେ ସମ୍ପୃକ୍ତ ଥାନାକୁ ଜଣାଇ ଆଦ୍ରିଜାଙ୍କ ସୁରକ୍ଷା ପାଇଁ ନିର୍ଦ୍ଦେଶ ଦେଇଥିବା ନ୍ୟୁଜ୍ କ୍ଳିପ୍ରେ କୁହାଯାଇଛି। ସ୍ବାମୀଙ୍କ ସମ୍ମୁଖରେ ଷ୍ଟାଫ୍ ମେମ୍ବର ତାଙ୍କୁ ଦୁର୍ବ୍ୟବହାର ପ୍ରଦର୍ଶନ କରିଥିବା ଆଦ୍ରିଜା ଭାଇରାଲ ଭିଡିଓରେ କହୁଥିବା ଦେଖାଯାଇଛି। ଆଜି ସବୁ ସୀମା ଟପିଗଲା ଏବଂ ଘର ଜଗୁଆଳି ତାଙ୍କ ଗାଡିକୁ ଘରକୁ ପଶିବାକୁ ଦେଇ ନ ଥିବା ସେ କହୁଥିବା ଦେଖାଯାଇଛି। ଏହି ନ୍ୟୁଜ୍ କ୍ଳିପ୍ ଭାଇରାଲ ହେବା ପରେ ବଲାଙ୍ଗୀରରେ ହଇଚଇ ସୃଷ୍ଟି ହୋଇଛି। କିଛିଦିନ ହେଲା ଅର୍କେଶ ଏବଂ ଆଦ୍ରିଜାଙ୍କ ମଧ୍ୟରେ ମତଭେଦ ଥିବାନେଇ ନାନା ଚର୍ଚ୍ଚା ଶୁଣିବାକୁ ମିଳୁଥିଲା। ତେବେ ଏନେଇ କେହି କିଛି ମୁହଁ ଖୋଲୁ ନ ଥିଲେ। ସୋମବାର ଭିଡିଓ କ୍ଲିପ୍ ଭାଇରାଲ ହେବା ପରେ ଘଟଣା ଲୋକଲୋଚନକୁ ଆସିଛି।
୨୦୧୭ ମସିହାରେ ଅର୍କେଶ ଏବଂ ଆଦ୍ରିଜାଙ୍କ ବିବାହ ସମ୍ପନ୍ନ ହୋଇଥିଲା। ପୂର୍ବତନ ମନ୍ତ୍ରୀ ତଥା ବରିଷ୍ଠ ବିଜେଡି ନେତା ଅନଙ୍ଗ ଉଦୟ ସିଂଦେଓଙ୍କ ସାନପୁଅ ଅର୍କେଶ ନାରାୟଣ ସିଂଦେଓ ୨୦୧୯ ବିଧାନସଭା ନିର୍ବାଚନରେ ବିଜେଡି ଟିକେଟରେ ବଲାଙ୍ଗୀରରୁ ପ୍ରାର୍ଥୀ ହୋଇଥିଲେ। ସେହି ସମୟରେ ଆଦ୍ରିଜା ମଞ୍ଜରୀ ଓ ଅର୍କେଶ ଏକାଠି ମିଶି ନିର୍ବାଚନ ପ୍ରଚାର କରିବା ଦେଖାଯାଇଥିଲା। ତେବେ ଅର୍କେଶ ନିର୍ବାଚନରେ ପରାସ୍ତ ହୋଇଥିଲେ। ପରେ ଏହି ଦମ୍ପତି ପୌର ନିର୍ବାଚନ ବେଳେ ପୁଣି ବଲାଙ୍ଗୀର ଫେରି ବିଜେଡି ପ୍ରାର୍ଥୀଙ୍କ ପାଇଁ ପ୍ରଚାର କରିଥିଲେ। ଏହାପରେ ଉଭୟେ ଦୀର୍ଘଦିନ ଧରି ବଲାଙ୍ଗୀରରେ ଅନୁପସ୍ଥିତ ରହିଥିଲେ। ପରବର୍ତ୍ତୀ ସମୟରେ ସେମାନଙ୍କ ମଧ୍ୟରେ ମତଭେଦ ଦେଖାଯାଇଥିବା ଚର୍ଚ୍ଚାର ବିଷୟ ହୋଇଛି। ତେବେ କେଉଁ ନିର୍ଦ୍ଦିଷ୍ଟ କାରଣରୁ ମତଭେଦ ଦେଖାଯାଇଛି ତାହା ଜଣାପଡିନାହିଁ।
ସାମାଜିକ ଗଣମାଧ୍ୟମରେ ନ୍ୟୁଜ୍ କ୍ଳିପ୍ ଭାଇରାଲ ପ୍ରସଙ୍ଗରେ ଅର୍କେଶ ନାରାୟଣ ସିଂଦେଓଙ୍କୁ ପଚାରିବାରୁ ଏସବୁ ମିଥ୍ୟା ଅଭିଯୋଗ ବୋଲି କହିଥିଲେ। ଆଜିକାଲି ଦାମ୍ପତ୍ୟ ଜୀବନରେ ଏ ପ୍ରକାର ଅଭିଯୋଗ କରି ସାଧାରଣରେ ବଦନାମ କରିବା ପାଇଁ ଚାପ ସୃଷ୍ଟି କରାଯାଉଛି। କେସ୍ ଡେରାଡୁନ କୋର୍ଟରେ ଚାଲିଛି। ନ୍ୟାୟପାଳିକା ଉପରେ ମୋର ଭରସା ଅଛି, ଖୁବ୍ଶୀଘ୍ର ଆପଣମାନେ ସତ୍ୟତା କ’ଣ ଜାଣି ପାରିବେ ବୋଲି ସେ କହିଥିଲେ। ସେହିପରି ଆଦ୍ରିଜା ମଞ୍ଜରୀଙ୍କୁ ତାଙ୍କ ଫୋନ୍ ନମ୍ବର (୯୯୯୯୨୪୧୧୧୯)ରେ ଯୋଗାଯୋଗ କରାଯାଇଥିଲା। ରିଂ ହେବାସତ୍ତ୍ୱେ ଫୋନ୍ ଉଠାଇ ନ ଥିଲେ। ୨୦୨୪ ସାଧାରଣ ନିର୍ବାଚନ ପୂର୍ବରୁ ଆଦ୍ରିଜାଙ୍କୁ ନିର୍ଯାତନା ଅଭିଯୋଗ ଅର୍କେଶଙ୍କୁ ଅଡୁଆରେ ପକାଇ ପାରେ ବୋଲି ଚର୍ଚ୍ଚା ଜୋର ଧରିଛି।
