ଭୁବନେଶ୍ୱର,୩୦।୩: ଚଳିତବର୍ଷ ଗ୍ରୀଷ୍ମପ୍ରବାହକୁ ଦୃଷ୍ଟିିରେ ରଖି ଓଡ଼ିଶାରେ କଇଁଛଙ୍କ ଆଗମନ ସର୍ବକାଳୀନ ରେକର୍ଡ ସୃଷ୍ଟି କରିଛି। ୨୦୨୩-୨୪ବର୍ଷ ତୁଳନାରେ ଚଳିତବର୍ଷ ୫ଗୁଣ ଅଧିକ ଆସିଛନ୍ତି। ଏହାକୁ ନେଇ ପରିବେଶପ୍ରେମୀ ଅଧିକ ଉତ୍ସାହିତ ହୋଇଥିବାବେଳେ ପିସିସିଏଫ୍(ବନ୍ୟପ୍ରାଣୀ)ଙ୍କ ପକ୍ଷରୁ ଖୁସିବ୍ୟକ୍ତ କରାଯାଇଛି।
ପିସିସିଏଫ୍(ବନ୍ୟପ୍ରାଣୀ)ଙ୍କ ତଥ୍ୟ ଅନୁଯାୟୀ, ୨୦୨୦-୨୧ ବର୍ଷରେ ରାଜ୍ୟରେ ଗହୀରମଥାରେ ୩.୫୦ଲକ୍ଷ କଇଁଛଙ୍କ ସମାଗମ ହୋଇଥିବାବେଳେ ୨୦୨୧-୨୨ରେ ୧୦.୫୧ଲକ୍ଷ, ୨୦୨୨-୨୩ରେ ୧୧.୪୯ଲକ୍ଷ କଇଁଛଙ୍କ ସମାଗମ ହୋଇଥିଲା। ତେବେ ଗତବର୍ଷ ମାତ୍ର ୩.୦୧ଲକ୍ଷ କଇଁଛ ଆସିଥିବାବେଳେ ଚଳିତବର୍ଷ ଗହୀରମଥାରେ ୬ଲକ୍ଷ ୭ହଜାର, ଋଷିକୁଲ୍ୟାରେ ୬.୯୯ଲକ୍ଷ ଏବଂ ଅନ୍ୟାନ୍ୟ ସ୍ଥାନରେ ଅବଶିଷ୍ଟ ୨.୦୫ ଲକ୍ଷ କଇଁଛଙ୍କ ସମାଗମ ହୋଇଛି।
ସେହିପରି ଚଳିତବର୍ଷ ବଉଳା କୁମ୍ଭୀର ଓ ଘଡ଼ିଆଳ କୁମ୍ଭୀରଙ୍କ ସଂଖ୍ୟା ଅଧିକ ରହିଛି। ବିଭାଗୀୟ ତଥ୍ୟ ଅନୁଯାୟୀ, ୨୦୨୦-୨୧ରେ ରାଜ୍ୟରେ ୧୮୩୦ଟି ବଉଳା କୁମ୍ଭୀର ଭିତରକନିକା ଓ ଏହାର ସଂଲଗ୍ନ ଅଞ୍ଚଳରେ ରହିଥିବା ୨୦୨୧-୨୨ରେ ୧୮୧୯, ୨୦୨୨-୨୩ରେ ୧୮୩୧, ୨୦୨୩-୨୪ରେ ୧୮୫୦ ଏବଂ ଚଳିତବର୍ଷ ଏହି ସଂଖ୍ୟା ୧୮୮୧ରେ ପହଞ୍ଚିଛି। ସେହିପରି ଘଡ଼ିଆଳ କୁମ୍ଭୀରଙ୍କ ସଂଖ୍ୟା ୨୦୨୦-୨୧ରେ ୧୧ ଚିହ୍ନଟ ହୋଇଥିବାବେଳେ ଚଳିତବର୍ଷ ୧୬ଟି ଚିହ୍ନଟ ହୋଇଛିି।
ଅନ୍ୟପକ୍ଷରେ ଚିଲିକା ମୁହଁାଣରେ ଇରଓ୍ବାଡୀ ଡଲ୍ଫିନଙ୍କ ସଂଖ୍ୟା ୧୫୯ ରହିଥିବାବେଳେ ଓଡ଼ିଶାର ଅନ୍ୟାନ୍ୟ ଅଞ୍ଚଳରେ ୭୧୦ଟି ଡଲ୍ଫିନ ରହିଛନ୍ତି। ଏଥିରେ ଇରଓ୍ବାଡୀଙ୍କ ସଂଖ୍ୟା ୧୮୮ ରହିଥିବାବେଳେ ବଟଲନୋଜ ୧୬, ହମ୍ପବ୍ୟାକ୍-୪୯୮ ଏବଂ ୮ଟି ସ୍ପିନର ଡଲଫିନ୍ ରହିଛନ୍ତି।
