ପାଟଣା,୧୯ା୪(ବୀର କିଶୋର ଦାଶ):କେନ୍ଦୁଝର ଜିଲା ପାଟଣା ବିଧାନସଭା କ୍ଷେତ୍ର ପାଇଁ ମଙ୍ଗଳବାର ଭାଜପା ଅବସରପ୍ରାପ୍ତ ପ୍ରଶାସନିକ ଅଧିକାରୀ ଅଖିଳ ଚନ୍ଦ୍ର ନାୟକଙ୍କ ନାମ ଘୋଷଣା କରିଛି। ଏହା ପରେ ଅଖିଳଙ୍କ ସମର୍ଥକଙ୍କ ମଧ୍ୟରେ ଖୁସି ପ୍ରକାଶ ପାଇଛି। ତେବେ ଅନ୍ୟ ଏକ ଗୋଷ୍ଠୀ ଅଖିଳଙ୍କ ପ୍ରାର୍ଥିତ୍ୱକୁ ବିରୋଧ କରି ଇସ୍ତଫା ଦେଇଛନ୍ତି। ଯଦିଓ ସବୁ ଦଳରେ କନ୍ଦଳ ଲାଗିରହିଛି ହେଲେ ଭାଜପାର ଗୋଷ୍ଠୀ କନ୍ଦଳ ତୀବ୍ର ହେଉଥିବା ପରିଲକ୍ଷିତ ହେଉଛି। ଏହାର ସମାଧାନ ନ ହେଲେ ଏହା ଦଳ ପାଇଁ ବିପର୍ଯ୍ୟୟର କାରଣ ସାଜିବ ବୋଲି ରାଜନୈତିକ ସମୀକ୍ଷକମାନେ କହୁଛନ୍ତି।
ସୂଚନା ମୁତାବକ, ଅତୀତରେ ପାଟଣା ନିର୍ବାଚନ ମଣ୍ଡଳୀକୁ ଭାଜପାର ଗଡ଼ କୁହାଯାଉଥିଲା। ମାତ୍ର ଦଳୀୟ ଅନ୍ତର୍ଘାତୀ କାର୍ଯ୍ୟ ଓ ଗୋଷ୍ଠୀ କନ୍ଦଳ ଭାଜପାର ବିଜୟ ପଥରେ ଅନ୍ତରାୟ ସୃଷ୍ଟି କରୁଛି। ଏଠାରେ ୨୦୧୯ ନିର୍ବାଚନ ସମୟରେ ଭାଜପା ୨ ଗୋଷ୍ଠୀରେ ବିଭକ୍ତ ହୋଇଯାଇଥିଲା। ଯାହା ସେଥର ନିର୍ବାଚନରେ ପ୍ରତିଫଳିତ ହୋଇଥିଲା। ଚଳିତ ନିର୍ବାଚନରେ ପୁଣି ଅଖିଳଙ୍କ ବିରୋଧୀ ଗୋଷ୍ଠୀ ପ୍ରତିବାଦ ଆରମ୍ଭ କରିସାରିଲେଣି। ତାଙ୍କ ପ୍ରାର୍ଥିତ୍ୱ ପରିବର୍ତ୍ତନ ଦାବିରେ ଜିଲା କାର୍ଯ୍ୟାଳୟରେ ହୋ ହଲ୍ଲା କରିଛନ୍ତି। ଦଳର ରାଜ୍ୟସ୍ତରୀୟ ନେତୃବୃନ୍ଦ କନ୍ଦଳକୁ ପ୍ରଶମିତ ନ କଲେ ୨୦୧୯ ପରି ଦଶା ଭୋଗିବାକୁ ପଡ଼ିବ ବୋଲି ରାଜନୈତିକ ସମୀକ୍ଷକମାନେ କହୁଛନ୍ତି। ବିଜେଡି ପକ୍ଷରୁ ବିଧାୟକ ଜଗନ୍ନାଥ ନାଏକଙ୍କୁ ଦଳ ପୁଣି ଭରସା କରିଛି। ବିଜେଡିରେ ଅନ୍ତର୍ଦ୍ୱନ୍ଦ୍ୱ ଥିଲେ ବି ଦଳର ସୁପ୍ରିମୋଙ୍କ ଭୟରେ ତାହା ପଦାକୁ ଆସୁ ନ ଥିବା ଚର୍ଚ୍ଚା ହେଉଛି। କଂଗ୍ରେସ ପକ୍ଷରୁ ଦଳର ହାଇକମାଣ୍ଡ ପୂର୍ବତନ ବିଧାୟକ ହୃଷୀକେଶ ନାଏକଙ୍କ ପ୍ରାର୍ଥିତ୍ୱରେ ମୋହର ମାରିଛନ୍ତି। ହୃଷୀକେଶଙ୍କୁ କଂଗ୍ରେସର ଏକ ଗୋଷ୍ଠୀ ଟିକେଟ ପାଇବା ପୂର୍ବରୁ ବିରୋଧ କରି ଆସୁଥିଲେ ହେଁ ଏବେ ଉକ୍ତ ଗୋଷ୍ଠୀ ସୁପ୍ତ ଆଗ୍ନେୟଗିରି ଭଳି ରହିଛି। କେଉଁ ସମୟରେ ବିସ୍ଫୋରକ ରୂପ ନେବ ତାହା କହିହେବ ନାହିଁ। ୩ ପ୍ରମୁଖ ଦଳରେ ଆଭ୍ୟନ୍ତରୀଣ କନ୍ଦଳ ଊଣା ଅଧିକେ ରହିଥିଲେ ହେଁ ମ୍ୟାନେଜମେଣ୍ଟ ଉପରେ ସବୁ କିଛି ନିର୍ଭର କରୁଛି। ଏଠାରେ ନବନିର୍ମାଣ କୃଷକ ସଂଗଠନ ତରଫରୁ ମଧ୍ୟ ସ୍ବାଧୀନ ପ୍ରାର୍ଥୀ ଭାବେ ଇଂ. ଦୀପକ ନାୟକଙ୍କ ନାମ ଘୋଷଣା କରାଯାଇଛି। ତେବେ ବିଜେଡି ସହ ପ୍ରମୁଖ ବିରୋଧୀ ଦଳ ଭାଜପା ମଧ୍ୟରେ ଟକ୍କର ହେବ ବୋଲି କୁହାଯାଉଛି। ଅପରପକ୍ଷେ ୫ ଥର ବିଧାୟକ ହୋଇଥିବା ଅନୁଭବୀ ନେତା ହୃଷୀକେଶଙ୍କୁ କଂଗ୍ରେସ ଟିକେଟ ଦେଇ ବାଜିମାତ ଲକ୍ଷ୍ୟ ମଧ୍ୟ ରଖିଛି।
