ଖୁଣ୍ଟା,୬।୩(ଦେବରଞ୍ଜନ ବେହେରା): ଲୋକଙ୍କୁ ତ୍ୱରିତ ସେବା ଯୋଗାଇ ଦେବାକୁ ନେଇ ସରକାର ବିଭିନ୍ନ ପଦ ପଦବୀ ସୃଷ୍ଟି କରିବା ସହିତ ଅଧିକାରୀ ନିଯୁକ୍ତି କରୁଛନ୍ତି। ମାତ୍ର ମୟୂରଭଞ୍ଜ ଜିଲା ଗୋପବନ୍ଧୁ ନଗର ବ୍ଲକରେ ଏବେ ଏହାର ଓଲଟା ପ୍ରତିଫଳନ ଦେଖିବାକୁ ମିଳୁଛି। ପଦବୀ ଅଛି, ମାତ୍ର କର୍ମଚ଼ାରୀ ନିଯୁକ୍ତ ହେଉନାହାନ୍ତି। ବହୁ ଗୁରୁତ୍ୱ ବହନ କରୁଥିବା ଏକାଧିକ ପଦବୀ ଖାଲି ପଡ଼ିଥିବା ବେଳେ ଜଣେ ଜଣେ ଅଧିକାରୀ ଏକାଧିକ ଦାୟିତ୍ୱ ତୁଲାଉଛନ୍ତି। ଫଳରେ ବିଭିନ୍ନ ସମସ୍ୟା ନେଇ ଆସୁଥିବା ଜନସାଧାରଣଙ୍କୁ ନାହିଁ ନ ଥିବା ଦୁର୍ଦ୍ଦଶା ଭୋଗିବାକୁ ପଡ଼ୁଥିବା ଅଭିଯୋଗ ହେଉଛି। ଏଭଳି ପରିସ୍ଥିତି ମାସ ମାସ ଧରି ଲାଗି ରହିଥିଲେ ମଧ୍ୟ ସମସ୍ୟାର ସମାଧାନ ପାଇଁ ପ୍ରଶାସନିକ ସ୍ତରରେ କୌଣସି ପଦକ୍ଷେପ ଗ୍ରହଣ କରା ଯାଉ ନ ଥିବା ଚିନ୍ତାର କାରଣ ହୋଇଛି।
ସରକାର ୫-ଟି ମାଧ୍ୟମରେ ଟିମ୍ୱାର୍କ କଥା କହୁଥିବା ବେଳେ ଏହା ଏହି ବ୍ଲକ ପାଇଁ ପ୍ରହସନ ପାଲଟିଥିବା ବୁଦ୍ଧିଜୀବୀମାନେ ପ୍ରକାଶ କରିଛନ୍ତି। ସୂଚ଼ନା ଅନୁଯାୟୀ, ଗତ ୨୦୨୩ ମାର୍ଚ୍ଚ ମାସରୁ ଏହି ବ୍ଲକର ଅତିରିକ୍ତ ଗୋଷ୍ଠୀ ଉନ୍ନୟନ ଅଧିକାରୀ(ଏବିଡିଓ) ଅବସର ଗ୍ରହଣ କରିବା ପରଠାରୁ ଅଦ୍ୟାବଧି କୌଣସି ଅଧିକାରୀଙ୍କୁ ନିଯୁକ୍ତି ମିଳିନାହିଁ। ସେହିପରି ଜିପିଓ ପଦବୀ ଦୀର୍ଘ ମାସ ଧରି ଖାଲିଥିବା ବେଳେ ଜଣେ ପିଇଓ ୨ଟି ପଞ୍ଚାୟତ ସମେତ ଅତିରିକ୍ତ ଭାବେ ଜିପିଓ ଦାୟିତ୍ୱ ତୁଲାଉଛନ୍ତି। ଆକାଉଣ୍ଟ୍ସ ଅଧିକାରୀ,ଏନ୍ଆର୍ଇଜିଏସ୍ର ଏସିପି ପଦବୀ ଦୀର୍ଘ ୧ ବର୍ଷରୁ ଊର୍ଦ୍ଧ୍ୱ ସମୟ ଧରି ଖାଲି ପଡ଼ିଛି। ଏଏଫ୍ଓ ଏବଂ ୨ବରିଷ୍ଠ କିରାଣି ପଦବୀ ମଧ୍ୟରୁ ଗୋଟିଏ ଖାଲି ପଡ଼ିଥିବା ଓ ଅନ୍ୟ ପଦବୀଟି ଡେପୁଟେଶନ କର୍ମଚ଼ାରୀଙ୍କ ଦ୍ୱାରା ଚାଲିଛି। ସେହିପରି ୧୩ ପଞ୍ଚାୟତ ମଧ୍ୟରୁ ୨ଟି ପଞ୍ଚାୟତରେ ଜିଆର୍ଏସ୍ ପଦବୀ ଓ ୬ଟି ପଞ୍ଚାୟତରେ କାର୍ଯ୍ୟନିର୍ବାହୀ ଅଧିକାରୀ ପଦ ଖାଲି ରହିଛି। ଆଇପିଓ ପଦବୀଟି ଦୀର୍ଘ ବର୍ଷ ହେବ ଖାଲି ରହିଛି। ୫ ପିଅନ ପଦବୀ ସ୍ଥାନରେ ୩ ଜଣ ପିଅନଙ୍କୁ ନେଇ ଚାଲିଛି କାର୍ଯ୍ୟାଳୟ। ୫ ବର୍ଷରୁ ଊର୍ଦ୍ଧ୍ୱ ହେବ ରାତ୍ରି ଜଗୁଆଳି ପଦବୀ ମଧ୍ୟ ଖାଲି ପଡ଼ିଛି। ଫଳରେ ନାହିଁ ନାହିଁରେ ଚାଲୁଥିବା ଏହି ବ୍ଲକ କାର୍ଯ୍ୟାଳୟ ଲୋକଙ୍କୁ କିଭଳି ଭାବେ ତ୍ୱରିତସେବା ଯୋଗାଇ ପାରୁଛି ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ତେବେ ଏ ସମ୍ପର୍କରେ ବିଡିଓ କରୁଣାକର ଧିନ୍ଦାଙ୍କୁ ପଚାରିବାରୁ ବ୍ଲକ କାର୍ଯ୍ୟାଳୟରେ ବିଭିନ୍ନ ପଦବୀରେ କର୍ମଚାରୀ ଥିବା ନ ଥିବା ସମ୍ପର୍କିତ ସମ୍ପୂର୍ଣ୍ଣ ତଥ୍ୟ ବାର୍ଷିକ ଏଷ୍ଟାବ୍ଲିସମେଣ୍ଟ ରିପୋର୍ଟରେ ଉଚ୍ଚ ଅଧିକାରୀଙ୍କୁ ପ୍ରଦାନ କରାଯାଇଛି ବୋଲି କହିଥିଲେ।
