ଫୁଲବାଣୀ ଅଫିସ, ୧୭ା୩: ଫୁଲବାଣୀ ପୌର ପରିଷଦ ଅଧ୍ୟକ୍ଷା ପଦବୀ ହାତେଇବା ଲାଗି ତିନି ପ୍ରମୁଖ ଦଳ ବିଜେଡି, କଂଗ୍ରେସ ଓ ଭାଜପା ପକ୍ଷରୁ ଜୋରଦାର ପ୍ରୟାସ ଚାଲିଛି। ହେଲେ ଏଠାରେ ତ୍ରିମୁଖୀ ନୁହେଁ ଦ୍ୱିମୁଖୀ ଶାସକ ବିଜେଡି ଏବଂ କଂଗ୍ରେସ ମଧ୍ୟରେ ଲଢ଼େଇ ହେବା ଏକ ପ୍ରକାର ସ୍ପଷ୍ଟ ହୋଇଛି।
ଅଧ୍ୟକ୍ଷା ପଦବୀ ଲାଗି ବିଜେଡି ପ୍ରାର୍ଥିନୀ ପୁନମ କହଁର ଏବଂ କଂଗ୍ରେସ ପ୍ରାର୍ଥିନୀ ସବିତା ମହାନ୍ତି ସେମାନଙ୍କ ସମର୍ଥକଙ୍କୁ ଧରି ପ୍ରଚାର ଚଳାଇଛନ୍ତି। ଶାସକ ଦଳରେ ପୁନମଙ୍କ ପାଇଁ ପଞ୍ଚାୟତିରାଜ ମନ୍ତ୍ରୀ ତଥା ଜିଲା ପର୍ଯ୍ୟବେକ୍ଷକ ପ୍ରତାପ ଜେନା, ଏମ୍ପି ଅଚ୍ୟୁଚ ସାମନ୍ତ, ସହ ପର୍ଯ୍ୟବେକ୍ଷକ କିଶୋର ମେହେର ପ୍ରଚାର ମଙ୍ଗ ଧରିଛନ୍ତି। କଂଗ୍ରେସ ପକ୍ଷରୁ ଜିଲା ପ୍ରଭାରୀ ବିସ୍ମୟ ମହାପାତ୍ର, ଜିଲା ସଭାପତି ଅନାମ ନାୟକ, ରାଜ୍ୟ ପ୍ରଦେଶ କଂଗ୍ରେସ କମିଟି ସମ୍ପାଦକ ଚନ୍ଦ୍ରଶେଖର ପରିଡା, ପୂର୍ବତନ ଏମ୍ପି ରାଧାକାନ୍ତ ଦିଗାଲ, ପୂର୍ବତନ ବିଧାୟକ ଅଭିମନ୍ୟୁ ବେହେରା ସେମାନଙ୍କ ସମର୍ଥକଙ୍କୁ ଧରି ପ୍ରଚାର କରୁଛନ୍ତି। ବୁଧବାର କଂଗ୍ରେସ ୬ନଂ. ୱାର୍ଡରେ ପ୍ରଚାର ଜୋରଦାର କରିଛି।
ଅନୁରୁପ ଭାବେ ବିଜେଡି ମଧ୍ୟ ପ୍ରଚାର କାର୍ଯ୍ୟରେ ଆଗୁଆ ରହିଛି। ପ୍ରାୟ ସମସ୍ତ ୱାର୍ଡରେ ପ୍ରଚାର ଏବଂ ଭୋଟ ହାତେଇବାକୁ ଦଳ ଉଦ୍ୟମ ଜାରି ରଖିଛି।
ଅନ୍ୟପଟେ ଭାଜପାର କେହି ରାଜ୍ୟ ସ୍ତରୀୟ ନେତା ପ୍ରଚାରକୁ ଓହ୍ଲାଇ ନ ଥିଲେ ମଧ୍ୟ ଅଧ୍ୟକ୍ଷା ପ୍ରାର୍ଥୀ ସ୍ମିତା ମହାନ୍ତି ଦଳୀୟ ସମର୍ଥକ ଏବଂ ଜିଲାର କାର୍ଯ୍ୟକର୍ତ୍ତାଙ୍କୁ ନେଇ ଭୋଟଭିକ୍ଷା କରୁଛନ୍ତି। ବିଜେଡିର ଗୋଷ୍ଠୀ କନ୍ଦଳ ଦୂର ହୋଇଥିବା କୁହାଯାଉଥିଲେ ହେଁ ତାହା ଦଳ ପାଇଁ ବୁମେରାଂ ସାଜିବ ବୋଲି ଅନୁମାନ କରାଯାଉଛି। ସେହିପରି ଭାଜପାର ଗୋଷ୍ଠୀ କନ୍ଦଳ ଦଳକୁ ତଳ ସ୍ତରକୁ ନେଇଯାଇଛି। କଂଗ୍ରେସ ତାର ନିଜସ୍ବ ଭୋଟ ବ୍ୟାଙ୍କ ସହ ବିପକ୍ଷ ବିରୋଧୀଙ୍କୁ ଧରି ଏହି ଆସନ ହାତେଇବ ବୋଲି ପୂର୍ବାନୁମାନ କରାଯାଉଥିବା ବେଳେ ବିଜେଡି ଲୋକଙ୍କ ପାଇଁ କରିଥିବା ବିଭିନ୍ନ ଯୋଜନାକୁ ପାଥେୟ କରି ନିର୍ବାଚନ ଜିତିବ ବୋଲି ମଧ୍ୟ ଆଲୋଚନା ହେଉଛି।
ସୂଚନାଯୋଗ୍ୟ, ୧୩ଟି ୱାର୍ଡକୁ ନେଇ ଗଠିତ ଫୁଲବାଣୀ ମ୍ୟୁନିସିପାଲିଟିରେ ଚଳିତଥର ୨୫,୫୨୦ ମତଦାତା ଅଛନ୍ତି। ଆସନ୍ତା ୨୪ରେ ମତଦାନ ପାଇଁ ୧୩ଟି ୱାର୍ଡରେ ୨୮ଟି ବୁଥ୍ର ବ୍ୟବସ୍ଥା କରାଯାଇଛି। ୨୦୦୧ରେ ବିଜ୍ଞାପିତ ଅଞ୍ଚଳରୁ ଫୁଲବାଣୀ ମ୍ୟୁନିସିପାଲିଟି ହେବା ପରେ କ୍ରମାଗତ ଭାବେ ୩ ଥର ଏହି ପୌର ପରିଷଦ ବିଜେଡି ହାତରେ ରହିଛି।
