ମୁମ୍ବାଇ: ବମ୍ପର କଲେକସନ ପରେ ଏବେ ଏସଏସ ରାଜମୌଳିଙ୍କ ମୁଭି ଆରଆରଆର ଆୱାର୍ଡସ ପାଇବାରେ ଲାଗିଛି । ହଲିଉଡ କ୍ରିଟିକ୍ସ ଆସୋସିଏଶନର ୨୦୨୩ ବର୍ଷର ଇଭେଣ୍ଟରେ ଏହି ଫିଲ୍ମ ଏକା ସାଙ୍ଗେ ୫ଟି ଆୱାର୍ଡ ନିଜ ନାଁରେ କରିଛି । ଆଲିଆ ଭଟ୍ଟଙ୍କୁ ଫିଲ୍ମ ଆରଆରଆର ପାଇଁ ସ୍ପଟଲାଇଟ ଆୱାର୍ଡରେ ସମ୍ମାନୀତ କରାଯାଇଛି । ସେମିତି ଜୁନିୟର ଏନଟିଆରଙ୍କୁ ବି ସ୍ପଟଲାଇଟ ଆୱାର୍ଡ ମିଳିଛି । ହଲିଉଡ କ୍ରିଟିକ୍ସ ଆସୋସିଏଶନର ଟୁଇଟର ହ୍ୟାଣ୍ଡେଲରୁ ଏହା ଜଣାପଡିଛି ।
ଅନ୍ୟପଟେ ଆଲିଆ ଓ ଜୁନିୟର ଏନଟିଆରଙ୍କୁ ଏହି ଟ୍ରଫି ପଠାଇବାକୁ ନେଇ ଅପଡେଟ ଦେଇ ଏଚସିଏର ଟୁଇଟର ହ୍ୟାଣ୍ଡେଲରେ ଲେଖାଯାଇଛି, ଆରଆରଆରର ପ୍ରଶଂସକ, ଆମେ ଆପଣଙ୍କ ସହ ଜୁନିୟର ଏନଟିଆର ଓ ଆଲିଆ ଭଟ୍ଟଙ୍କ ସହ ଆୱାର୍ଡ ଶେୟାର କରିବାକୁ ଚାହୁଁଛୁ, ଯାହାକୁ ଆମେ ଆସନ୍ତା ସପ୍ତାହରେ ପଠାଇଦେବୁ । ଆପଣ ସମସ୍ତଙ୍କର ଭଲ ପାଇବା ଓ ସପୋର୍ଟ ପାଇଁ ବହୁତ ବହୁତ ଧନ୍ୟବାଦ…ହଲିଉଡ କ୍ରିଟିକ୍ସ ଆସୋସିଏଶନ । ସୂଚନାଯୋଗ୍ୟ, ଏହି ଫିଲ୍ମର ଗୀତ ‘ନାଟୁ-ନାଡୁ’ ଓସ୍କାର ୨୦୨୩ରେ ବେଷ୍ଟ ସଙ୍ଗ ପାଇଁ ନୋମିନେଟ ହୋଇଛି । ଏହାର ଫଳାଫଳ ୧୨ ମାର୍ଚ୍ଚରେ ହେବ ।
ଫିଲ୍ମ ଆରଆରଆର ମାର୍ଚ୍ଚ ୨୦୨୨ରେ ରିଲିଜ୍ ହୋଇଥିଲା । ଏଥିରେ ରାମ ଚରଣ ଓ ଜୁନିୟର ଏନଟିଆର ମୁଖ୍ୟ ଭୂମିକାରେ ନଜର ଆସିଥିଲେ । ଏଥିରେ ଆଲିଆ ଭଟ୍ଟ ରାମ ଚରଣଙ୍କ ପତ୍ନୀ ଭୂମିକାରେ ନଜର ଆସିଥିଲେ । ଏହା ବ୍ୟତୀତ ବଲିଉଡ କଳାକାର ଅଜୟ ଦେବଗନ ଫିଲ୍ମରେ କୈମିୟୋ କରିଥିଲେ । ବିଜନେସରେ ଫିଲ୍ମଟି ଅନେକ ରେକର୍ଡ ଭାଙ୍ଗିଛି ।
