ପାଣିକୋଇଲି,୧୨ା୬(ଡି.ଏନ.ଏ.): ପାଣିକୋଇଲି ଥାନା ଅନ୍ତର୍ଗତ ମୂଳାପାଳ ମୌଜାର ରୁଢ଼ିଆ ଗ୍ରାମ ନିକଟସ୍ଥ ଅଲେଖ ଶୂନ୍ୟବ୍ରହ୍ମ ମଠ ଶତାଧିକ ବର୍ଷ ହେଲା ରହି ଆସିଛି। ମାତାବାବାଙ୍କ ସମାଧି ପୀଠ ସହ କରଦା, ମୂଳାପାଳ, ମାଳଆନନ୍ଦପୁର ପଞ୍ଚାୟତର ଅଧିବାସୀ ଏହାର ବାର୍ଷିକ ପୂଜାର୍ଚ୍ଚନା କରିଥାନ୍ତି। ଏହି ଆଶ୍ରମ ପ୍ରତି ସାଧାରଣରେ ଅହେତୁକ ଶ୍ରଦ୍ଧା ଓ ସମ୍ମାନ ରହିଛି। ବର୍ତ୍ତମାନ ଷଠିପୁରଠାରୁ ମାଳଆନ୍ଦପୁର ପର୍ଯ୍ୟନ୍ତ ରାସ୍ତା ଦୋହରାକରଣ ଚାଲିଛି। ରାସ୍ତା ଏହି ମଠ ଦେଇଯାଉଛି। ତେଣୁ ଠିକାସଂସ୍ଥା ପକ୍ଷରୁ ଏହାକୁ ଭଙ୍ଗାଯିବାକୁ ମସୁଧା କରାଯାଉଛି। ୧୨ ତାରିଖରେ ଏହାକୁ ଉଚ୍ଛେଦ କରିବାକୁ ବ୍ୟାସନଗର ତହସିଲଦାର ପାଣିକୋଇଲି ଥାନାକୁ ଜଣାଇଛନ୍ତି। ଉଚ୍ଚ ନ୍ୟାୟାଳୟଙ୍କ ନିର୍ଦ୍ଦେଶକୁ ବେଖାତିର କରି ବ୍ୟାସନଗର ତହସିଲଦାର ଉଚ୍ଛେଦ କରିବେ ବୋଲି ଜାଣିବା ପରେ ସାଧାରଣରେ ଅସନ୍ତୋଷ ଦେଖାଦେଇଛି। ରାସ୍ତାଯିବାକୁ କେହି ବିରୋଧ କରୁ ନ ଥିବାବେଳେ କେବଳ ସ୍ଥାନାନ୍ତର ପାଇଁ ଜନସାଧାରଣଙ୍କ ଦାବି ସତ୍ତ୍ୱେ ତହସିଲ ପ୍ରଶାସନର ଏପରି କଠୋର ନିଷ୍ପତ୍ତିକୁ ସାଧାରଣରେ ବିରୋଧ କରାଯାଇଛି। ଉଚ୍ଚ ନ୍ୟାୟାଳୟଙ୍କ ରହିତାଦେଶ ସତ୍ତ୍ୱେ ବ୍ୟାସନଗର ତହସିଲଦାର କିଭଳି ଏଭଳି ଉଦ୍ୟମ କରୁଛନ୍ତି ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ପ୍ରଶାସନର ମନମାନିକୁ ନେଇ ଅସନ୍ତୋଷ କୁହୁଳିବାରେ ଲାଗିଛି। ଜନସାଧାରଣଙ୍କ ଭାବାବେଗକୁ ଦେଖି ପ୍ରଶାସନ ଏହାକୁ ସ୍ଥାନାନ୍ତର କରି ରାସ୍ତା ନେଲେ କେହି ବିରୋଧ କରିବା ପ୍ରଶ୍ନ ଉଠୁନି। କିନ୍ତୁ ଶହଶହ ବର୍ଷର ଧର୍ମୀୟ ଭାବନାକୁ କୁଠାରାଘାତ କରି ଉଚ୍ଛେଦ ନିଷ୍ପତ୍ତି କାହା ସ୍ବାର୍ଥରେ ବୋଲି ପ୍ରଶ୍ନ ଉଠିଛି। ଏଦିଗରେ ଜିଲା ପ୍ରଶାସନ ଦୃଷ୍ଟି ଦେବା ସହ ଉଚ୍ଛେଦ ପ୍ରକ୍ରିୟା ବନ୍ଦ ରଖି ପ୍ରଥମେ ସ୍ଥାନାନ୍ତର କରିବାକୁ ସାଧାରଣରେ ଦାବି ହୋଇଛି।
ପୂର୍ବରୁ ମଧ୍ୟ ମଠ ଉଚ୍ଛେଦ କରାଯିବାକୁ କୁହାଯାଇଥିବାରୁ ରୁଢ଼ିଆ ଗ୍ରାମବାସୀ ବିରୋଧ କରି ଉଚ୍ଚ ନ୍ୟାୟାଳୟଙ୍କ ଦ୍ୱାରସ୍ଥ ହୋଇଥିଲେ। ମଠ ପଛରେ ସରକାରୀ ଜମିଥିବାରୁ ଜନସାଧାରଣଙ୍କ ବିଶ୍ୱାସ ଓ ଭାବାବେଗକୁ ଦେଖି ଏହାକୁ ସ୍ଥାନାନ୍ତର କରିବା ପରେ ରାସ୍ତା ଯିବାକୁ ଉଚ୍ଚ ନ୍ୟାୟଳୟରେ ଅପିଲ କରାଯାଇଥିଲା। ତେଣୁ ଉଚ୍ଚ ନ୍ୟାୟାଳୟ ଯାଜପୁର ତହସିଲଦାରଙ୍କୁ ଉଚ୍ଛେଦ ପ୍ରକିୟା ବନ୍ଦ କରିବାକୁ ନିର୍ଦ୍ଦେଶ ଦେଇଥିଲେ। ଏହାର ସ୍ଥିତାବସ୍ଥା ସମ୍ପର୍କରେ ଜଣାଇବାକୁ ନିର୍ଦ୍ଦେଶ ଦେବା ପରେ ଯାଜପୁର ତହସିଲ ପକ୍ଷରୁ ଏହା ବ୍ୟାସନଗର ତହସିଲ ଅନ୍ତର୍ଗତ ମୂଳାପାଳ ମୌଜାର ଖାତା ନମ୍ବର ୧୩୪ ପ୍ଲଟ ନମ୍ବର ୮୯୮, ୮୯୯, ୯୦୦ରେ ଅବସ୍ଥିତ ବୋଲି ଅବଗତ କରାଯାଇଥିଲା। ଗତ ଏପ୍ରିଲ ୨୩ ତାରିଖରେ ଏସମ୍ପର୍କରେ ଜିଲାପାଳଙ୍କୁ ତଥ୍ୟ ମାଗିଥିଲେ ଉଚ୍ଚ ନ୍ୟାୟାଳୟ। ଜିଲାପାଳଙ୍କ ଦ୍ୱାରା ଏହା ମୂଳାପାଳ ମୌଜାରେ ବୋଲି ଜଣାଇବା ପରେ ମଧ୍ୟ ଉଚ୍ଚ ନ୍ୟାୟାଳୟ ସ୍ଥିତାବସ୍ଥା ବଜାୟ ରଖିବାକୁ କହିଥିଲେ।
