ଭୁବନେଶ୍ୱର,୧୧।୧୨(ବ୍ୟୁରୋ): ଆଇଏଫ୍ଏସ୍ ଅଧିକାରୀ ତଥା ନିଲମ୍ବିତ ଅତିରିକ୍ତ ପିସିସିଏଫ୍ ଅଭୟକାନ୍ତ ପାଠକଙ୍କ ପୁଅ ଆକାଶ ଶୁକ୍ରବାରଠାରୁ ପୁଣି ରିମାଣ୍ଡରେ ଆସିବେ। ତାଙ୍କୁ ୫ ଦିନିଆ ରିମାଣ୍ଡରେ ନେବାକୁ କ୍ରାଇମବ୍ରାଞ୍ଚ ପକ୍ଷରୁ ଏସ୍ଡିଜେଏମ୍ କୋର୍ଟରେ ଆବେଦନ କରାଯାଇଥିବାବେଳେ ଗୁରୁବାର କୋର୍ଟ ଅନୁମତି ପ୍ରଦାନ କରିଛନ୍ତି। ଆୟବହିର୍ଭୂତ ସମ୍ପତ୍ତି ଠୁଳ ଓ ଟାଟା କମ୍ପାନୀ ନିଯୁକ୍ତି ଜାଲିଆତି ଅଭିଯୋଗରେ ଜେଲ ଯାଇଥିବା ଅଭିଯୁକ୍ତ ପାଠକ ବାପପୁଅ ଗତ ୩ ତାରିଖରେ ୩ ଦିନିଆ ରିମାଣ୍ଡରେ ଆସିଥିଲେ। ଏଥିସହ କ୍ରାଇମବ୍ରାଞ୍ଚ ଆକାଶଙ୍କ ବ୍ୟକ୍ତିଗତ ସହାୟକ ଡେଭିଡ୍ ପିଟରଙ୍କୁ ପୁଣେରୁ ଉଠାଇ ଆଣି ଭୁବନେଶ୍ୱରରେ ଜେରା କରି ଛାଡ଼ିଥିଲା। ତାଙ୍କଠାରୁ ମିଳିଥିବା ତଥ୍ୟ ଆଧାରରେ କ୍ରାଇମବ୍ରାଞ୍ଚ ଏବେ ଆକାଶଙ୍କ ଠକେଇ ଗୁମର ଖୋଲିବାକୁ ଯୋଜନା ରଖିଛି।
ଆକାଶ ନିଜକୁ ଟାଟା ମୋଟର୍ସ ପାସେଞ୍ଜର କାର୍ ଡିଭିଜନର ପରିଚାଳନା ନିର୍ଦ୍ଦେଶକ ପରିଚୟ ଦେଇ ଚାକିରି ଦେବା ଆଳରେ ବହୁ ଯୁବତୀଯୁବକଙ୍କୁ ଠକେଇ କରିଥିଲେ। ନିଜ ପରିଚୟର ଜାଲ୍ କାଗଜପତ୍ର ସହ ଜାଲ୍ ନିଯୁକ୍ତିପତ୍ର ଓ ଟାଟା କମ୍ପାନୀର ଏମ୍ଡି ଆଇକାର୍ଡ ହାତେଇବା ଘଟଣାର ଖୋଳତାଡ଼ ହେବ। ଅନ୍ୟପକ୍ଷରେ ଆକାଶଙ୍କ ଭାବି ଶ୍ୱଶୁର ତଥା ବିଜେଡିରୁ ବହିଷ୍କୃତ ଗୋପଳପୁର ବିଧାୟକ ପ୍ରଦୀପ ପାଣିଗ୍ରାହୀଙ୍କ ଆକାଉଣ୍ଟରୁ ଟଙ୍କା ଟ୍ରାନ୍ସଫର ନେଇ ପଚରାଉଚରା କରାଯିବ ବୋଲି ସୂଚନା ମିଳିଛି।
ପ୍ରକାଶ ଥାଉକି, ପାଠକ ବାପପୁଅ ଆସନ୍ତା ୯ ପର୍ଯ୍ୟନ୍ତ ଝାରପଡ଼ା ସ୍ବତନ୍ତ୍ର କାରାଗାରରେ ଅଛନ୍ତି। ସ୍ପେଶାଲ (ଭିଜିଲାନ୍ସ) କୋର୍ଟ ଭୁବନେଶ୍ୱର ସେମାନଙ୍କୁ ୧୪ଦିନିଆ ବିଚାର ବିଭାଗୀୟ ହାଜତକୁ ପଠାଇଥିଲେ। ଆୟବହିର୍ଭୂତ ସମ୍ପତ୍ତି ଠୁଳ ଓ ଠକେଇ ଅଭିଯୋଗରେ ନଭେମ୍ବର ୨୭ରେ ଭିଜିଲାନ୍ସ ସେମାନଙ୍କୁ ଗିରଫ କରିଥିଲା। ଭିଜିଲାନ୍ସ ଏସ୍ଆଇଟି ଟିମ୍, କ୍ରାଇମବ୍ରାଞ୍ଚ, ଇଡି ଓ କମିଶନରେଟ ପୋଲିସ ପକ୍ଷରୁ ମିଳିତ ଭାବେ ତଦନ୍ତ ଜାରି ରହିଛି।
