ଦୁବାଇ,୩୦।୮: ଆଇପିଏଲ ୨୦୨୧ର ଦ୍ୱିତୀୟ ପର୍ଯ୍ୟାୟ ଆସନ୍ତା ମାସରେ ୟୁଏଇରେ ଆରମ୍ଭ ହେବ। ଏହି ଟୁର୍ନାମେଣ୍ଟ ପାଇଁ ଅଧିକାଂଶ ଦଳ ୟୁଏଇରେ ପହଞ୍ଚିଛନ୍ତି। ବିରାଟ କୋହଲି, ରୋହିତ ଶର୍ମା, କେ.ଏଲ ରାହୁଲଙ୍କ ପରି କିଛି ଭାରତୀୟ ଖେଳାଳି ବିଳମ୍ବରେ ୟୁଏଇରେ ସେମାନଙ୍କ ଫ୍ରାଞ୍ଚାଇଜରେ ଯୋଗଦେବେ। ଏହି ଖେଳାଳିମାନେ ଏବେ ଇଂଲଣ୍ଡ ଗସ୍ତରେ ଅଛନ୍ତି। ଆଇପିଏଲ ୨୦୨୧ର ଦ୍ୱିତୀୟ ପର୍ଯ୍ୟାୟ ଆରମ୍ଭ ହେବାକୁ ମାତ୍ର ୨୦ ଦିନ ବାକି ଥିବାବେଳେ ବିରାଟ କୋହଲିଙ୍କ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଦଳ ଏକ ବଡ଼ ଝଟକା ଲାଗିଛି। ଆଙ୍ଗୁଠିରେ ଆଘାତ ଲାଗିଥିବାରୁ ଆରସିବିର ତାରକା ଅଲରାଉଣ୍ଡର ୱାଶିଂଟନ ସୁନ୍ଦର ଆଇପିଏଲ ୨୦୨୧ର ଦ୍ୱିତୀୟ ପର୍ଯ୍ୟାୟରୁ ବାଦ ପଡିଛନ୍ତି। ସୁନ୍ଦର ବାଦ୍ ପଡିବା ପରେ ଶାହାବାଜ ଅହମ୍ମଦଙ୍କୁ ଅଧିକ ମ୍ୟାଚ ମିଳିବ ବୋଲି ଆଶା କରାଯାଉଛି। ସୁନ୍ଦରଙ୍କ ସ୍ଥାନରେ ବେଙ୍ଗଲ କ୍ରିକେଟର ଏବଂ ଆରସିବି ନେଟ ବୋଲର ଆକାଶଦୀପଙ୍କୁ ସ୍ଥାନ ଦିଆଯାଇଛି। ଆରସିବି ୨୦ ସେପ୍ଟେମ୍ବରରେ କୋଲକାତା ନାଇଟ ରାଇଡର୍ସ ବିପକ୍ଷରେ ଆଇପିଏଲ ୨୦୨୧ର ଦ୍ୱିତୀୟ ପର୍ଯ୍ୟାୟରେ ଅଭିଯାନ ଆରମ୍ଭ କରିବ।
ଜୁଲାଇରେ ଭାରତ ଇଂଲଣ୍ଡ ଗସ୍ତରେ ପ୍ରଥମ ଶ୍ରେଣୀ ଅଭ୍ୟାସ ମ୍ୟାଚରେ ସୁନ୍ଦର ଆହତ ହୋଇଥିଲେ। ସେ ୱାର୍ମ ଅପ ମ୍ୟାଚରେ କାଉଣ୍ଟି ସିଲେକ୍ଟ ଏକାଦଶରେ ଖେଳୁଥିବାବେଳେ ମହମ୍ମଦ ସିରାଜଙ୍କ ବାଉନ୍ସର୍ ଦ୍ୱାରା ଆହତ ହୋଇଥିଲେ ଏବଂ ଏହା ଇଂଲଣ୍ଡ ବିପକ୍ଷ ପାଞ୍ଚ ଟେଷ୍ଟ ସିରିଜରେ ଭାରତ ପାଇଁ ଖେଳିବାର ସ୍ବପ୍ନକୁ ମଧ୍ୟ ଭାଙ୍ଗି ଦେଇଥିଲା। ଏହି ସିରିଜ ପାଇଁ ସୁନ୍ଦରଙ୍କୁ ଅଲରାଉଣ୍ଡର ଭାବରେ ମନୋନୀତ କରାଯାଇଥିଲା। ଆଇପିଏଲରେ ୪୨ଟି ମ୍ୟାଚରେ ସୁନ୍ଦର୨୭ଟି ଉଇକେଟ ନେଇଛନ୍ତି। ସେ ରାଇଜିଂ ପୁଣେ ସୁପରଜିଆଣ୍ଟସ ସହିତ ନିଜର ଆଇପିଏଲ କ୍ୟାରିୟର ଆରମ୍ଭ କରିଥିଲେ ଏବଂ ପରେ ୨୦୧୮ରେ ଆରସିବିରେ ଯୋଗ ଦେଇଥିଲେ।
