ବରଗଡ଼,୯ା୩(ପ୍ରେମାନନ୍ଦ ଖମାରୀ): ଆକାଶବାଣୀର ବିକଳ୍ପ ନାହିଁ, କଳା ଓ କଳାକାରଙ୍କୁ ବଞ୍ଚାଇବା ସହ ସେମାନଙ୍କ କଳାକୁ ଉଦ୍ଜୀବିତ ରଖିବା ପାଇଁ ଆକାଶବାଣୀର ଉଦ୍ୟମ ଅତୁଳନୀୟ ବୋଲି ରବିବାର ଆକାଶବାଣୀ ଶ୍ରୋତା ସଂଘର ୩୧ତମ ବାର୍ଷିକ ଉତ୍ସବରେ ବକ୍ତାମାନେ ମତପ୍ରକାଶ କରିଛନ୍ତି। କାର୍ଯ୍ୟକ୍ରମରେ ସଂଘର ସଭାପତି କୃଷ୍ଣଚନ୍ଦ୍ର ପ୍ରଧାନଙ୍କ ଅଧ୍ୟକ୍ଷତା କରିଥିଲେ। ଶିକ୍ଷକ ଗୋପବନ୍ଧୁ ପୁରୋହିତ ଓ ଅଶୋକ ସାହୁଙ୍କ ସଂଯୋଜନାରେ ବରଗ ଅଗ୍ରଗାମୀ ଯୁବକ ସଂଘଠାରେ ଅନୁଷ୍ଠିତ ଉତ୍ସବରେ ପ୍ରସାର ଭାରତୀର ପୂର୍ବତନ ସହକାରୀ ନିର୍ଦ୍ଦେଶକ ଅଶୋକ ପାଣିଗ୍ରାହୀ ମୁଖ୍ୟ ଅତିଥି, ପୂର୍ବତନ କାର୍ଯ୍ୟକ୍ରମ ନିଷ୍ପାଦକ ରନ୍ଦୀପ ପ୍ରଧାନ ମୁଖ୍ୟବକ୍ତା, ଆକାଶବାଣୀ ସମ୍ବଲପୁରର କାର୍ଯ୍ୟକ୍ରମ ନିଷ୍ପାଦକ ସନ୍ତୋଷ ପିଙ୍କ, ପୂର୍ବତନ ପ୍ରଶାସନିକ ଅଧିକାରୀ ତଥା ସିନେ ଅଭିନେତ୍ରୀ ତପସ୍ବିନୀ ଗୁରୁ, ଆକାଶବାଣୀ ସ୍ବୀକୃତିପ୍ରାପ୍ତ ଗୀତିକାର ଧନପତି ମହାପାତ୍ର, ସଂଘର ସାଧାରଣ ସମ୍ପାଦକ ଯୁଧିଷ୍ଠିର ମହାପାତ୍ର, ଗଣଦୃଷ୍ଟିର ସମ୍ପାଦକ ଉମେଶ ବିଶାଳ ପ୍ରମୁଖ ଉପସ୍ଥିତ ରହି ଆକାଶବାଣୀର ଗୁରୁତ୍ୱ ଉପରେ ଉଲ୍ଲେଖ କରିଥିଲେ।
ଏହି ଅବସରରେ ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ସ୍ବର୍ଗତ ବିଷ୍ଣୁ ସାହୁ ଶ୍ରେଷ୍ଠ ଶ୍ରୋତା ସମ୍ମାନ ପ୍ରଦାନ କରାଯାଇଥିଲା। ସମ୍ବଲପୁର ଜିଲା ମହୁକୁଦ ଗ୍ରାମର ନିୟମିତ ଶ୍ରୋତା ଅଚ୍ୟୁତାନନ୍ଦ ବିଶ୍ୱାଳଙ୍କୁ ଏହି ସମ୍ମାନ ପ୍ରଦାନ କରାଯାଇଥିଲା। ସେହିପରି, ନାଟ୍ୟାଚାର୍ଯ୍ୟ ହରେକୃଷ୍ଣ ପୂଜାରୀ ସ୍ମୃତି ସମ୍ମାନରେ ବରଗଡ଼ ଜିଲା ଅମ୍ବାପାଲି ଗ୍ରାମର ସତ୍ୟନାରାୟଣ ପୋଢ଼, ସମାଜସେବୀ ସ୍ବର୍ଗତ ବିପିନ ବିହାରୀ ପ୍ରଧାନଙ୍କ ସ୍ମୃତିରେ ସମାଜସେବୀ ସମ୍ମାନରେ ବଲାଙ୍ଗୀର ଜିଲା କଣ୍ଟାବାଞ୍ଜି ବ୍ଲକର ନୂଆପଡା ଗ୍ରାମର ବିରଞ୍ଚି ନାରାୟଣ ଦାଶ ଏବଂ ସ୍ବର୍ଗତ ଗୀତିକାର କ୍ଷିତିପତି ସାହୁ ଗୀତିକାର ସମ୍ମାନରେ ବରଗଡ଼ ଧନପତି ମହାପାତ୍ରଙ୍କୁ ମାନପତ୍ର, ଉପଢୌକନ ଓ ସ୍ମାରକ ଦେଇ ସମ୍ବର୍ଦ୍ଧିତ କରାଯାଇଥିଲା l ଠିକ୍ ସେହିପରି ପୂର୍ବାଞ୍ଚଳରୁ ଆକାଶବାଣୀ କଟକ କେନ୍ଦ୍ରର ଉଦ୍ଘୋଷକ ନଳିନୀକାନ୍ତ ବିଶାଳ, ନିୟମିତ ଶ୍ରୋତା ଗରିବ ଖାନ ଓ ନାରାୟଣ ପ୍ରଧାନଙ୍କୁ ସ୍ବତନ୍ତ୍ର ଶ୍ରୋତା ସମ୍ମାନରେ ସମ୍ମାନିତ କରାଯାଇଥିଲା। ଏହି ଅବସରରେ ବିଶିଷ୍ଟ କଣ୍ଠଶିଳ୍ପୀ ଶରତ ଚନ୍ଦ୍ର ପାଢ଼ୀ ସାଗତ ସଙ୍ଗୀତ ପରିବେଷଣ କରିଥିଲେ। ସଂଘର ଉପସଭାପତି ସୁଦାମ ସାହୁ ସାଗତ ଅଭିଭାଷଣ ପ୍ରଦାନ କରିଥିବା ବେଳେ ସଂଗୀତା ଦୀପ, ଉମେଶ ପ୍ରଧାନ, ସୁଜାତା ପଣ୍ଡା, ଲକ୍ଷ୍ମଣ ସୁନା ପ୍ରମୁଖ କବିତା ପାଠ କରିଥିଲେ। ସଂଘର ବରିଷ୍ଠ ସଦସ୍ୟ ଜଗନ୍ନାଥ ସାହୁ ଧନ୍ୟବାଦ ଅର୍ପଣ କରିଥିଲେ।
