ନୂଆଦିଲ୍ଲୀ,୪।୧୨: ଭାରତର ପ୍ରତିରକ୍ଷା ଶକ୍ତି ସୁଦୃଢ଼ ହେବାକୁ ଯାଉଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାର ଆତ୍ମ ନିର୍ଭର ଭାରତ ଅନ୍ତର୍ଗତ ଆମେଠିରେ ନିର୍ମିତ ହେବାକୁ ଥିବା ଏକେ-୨୦୩ ରାଇଫଲ ନିର୍ମାଣକୁ ମଞ୍ଜୁରୀ ଦେଇଛନ୍ତି। ଏହି ରାଇଫଲ ୩୦୦ ମିଟର ଦୂରରେ ଥିବା ଶତ୍ରୁଙ୍କର ଲକ୍ଷ୍ୟଭେଦ କରିବାକୁ ସକ୍ଷମ ହେବ। ଉତ୍ପାଦନ ପ୍ରକ୍ରିୟା ଆରମ୍ଭ ହେବାର ୩୨ ମାସ ପରେ ଭାରତୀୟ ସେନାରେ ସାମିଲ କରାଯିବ। ଉତ୍ତରପ୍ରଦେଶର ଆମେଠିରେ ୫ ଲକ୍ଷରୁ ଅଧିକ ଏକେ-୨୦୩ ରାଇଫଲ ଉତ୍ପାଦନ ପାଇଁ ମୋଦି ସରକାର ଅନୁମୋଦନ କରିଛନ୍ତି। ପ୍ରତିରକ୍ଷା ମନ୍ତ୍ରଣାଳୟ ଅନୁସାରେ ଉତ୍ତରପ୍ରଦେଶ ଭାରତର ପ୍ରତିରକ୍ଷା ଉତ୍ପାଦନ ହବ ହେବାକୁ ଯାଉଛି।
ଇଣ୍ଡୋ-ରୁଷିଆ ରାଇଫଲ୍ସ ପ୍ରାଇଭେଟ ଲିମିଟେଡ (ଆଇଆରଆରପିଏଲ) ନାମକ ଏକ ସ୍ବତନ୍ତ୍ର ମିଳିତ ଉଦ୍ୟମରେ ଏହାର ନିର୍ମାଣ କରାଯିବ। ଏହା ଭାରତର ପୂର୍ବ ଓଏଫ୍ବି- ଅର୍ଡିନାନ୍ସ କାରଖାନା ବୋର୍ଡ ଯାହାକି ବର୍ତ୍ତମାନ ଆଡଭାନ୍ସଡ ଅସ୍ତ୍ରଶସ୍ତ୍ର ଏବଂ ଯନ୍ତ୍ରପାତି ଇଣ୍ଡିଆ ଲିମିଟେଡ (ଏଡବ୍ଲ୍ୟୁଇଆଇଏଲ୍) ଏବଂ ମୁନିସନ ଇଣ୍ଡିଆ ଲିମିଟେଡ (ଏମଆଇଏଲ୍) ତଥା ରୁଷିଆର ରୋଜୋବୋରୋନ ଏକ୍ସପୋର୍ଟ (ଆରଓଇ) ଓ କାଲାଶ୍ନିକୋଭ ସହିତ ମିଳିତ ଭାବରେ ନିର୍ମାଣ କରାଯିବ।
ଭାରତ ଏବଂ ରୁଷିଆ ମଧ୍ୟରେ ସାମରିକ ସମ୍ପର୍କକୁ ସୁଦୃଢ଼ କରିବା ଉଦ୍ଦେଶ୍ୟରେ ଉଭୟ ଦେଶର ମୁଖ୍ୟମାନେ ସୋମବାର ଦିନ ସାକ୍ଷାତ କରିବାକୁ ଯାଉଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ରୁଷିଆ ରାଷ୍ଟ୍ରପତି ବ୍ଲାଡିମୀର ପୁଟିନଙ୍କ ସାକ୍ଷାତ ସମୟରେ ୭.୫ଲକ୍ଷ ଏକେ-୨୦୩ ରାଇଫଲ ଯୋଗାଣ ଉପରେ ଏକ ଚୁକ୍ତିନାମା ସ୍ବାକ୍ଷର ହେବାକୁ ଯାଉଛି।
