ମୁମ୍ବାଇ: ଚଳିତବର୍ଷ ସୁପରଷ୍ଟାର ଅଜୟ ଦେବଗନଙ୍କୁ ନୂଆ ରୂପରେ ଦର୍ଶକେ ଦେଖିବେ। ଏହି ବର୍ଷ ଅଜୟ ଜଣେ ଅଭିନେତା, ନିର୍ଦ୍ଦେଶକ ଏବଂ ପ୍ରଯୋଜକ ଭାବରେ ଓଟିଟିରୁ ଆରମ୍ଭ କରି ପ୍ରେକ୍ଷାଳୟ ପର୍ଯ୍ୟନ୍ତ ଛାଇ ରହିବେ।
ଅଜୟ ଦେବଗନଙ୍କ ଫିଲ୍ମସ ବ୍ୟାନରରେ ଏକ ଓ୍ବେବ୍ ସିରିଜ ‘ଗ୍ରେଟ୍ ଇଣ୍ଡିଆନ ମର୍ଡର’ ଫେବୃୟାରୀ ୪ରେ ଡିଜ୍ନି ପ୍ଲସ ହଟଷ୍ଟାରକୁ ଆସୁଛି। ଆଲିଆ ଭଟ୍ଟଙ୍କ ଅଭିନୀତ ତଥା ସଞ୍ଜୟ ଲୀଲା ଭଁସାଲୀଙ୍କ ନିର୍ଦ୍ଦେଶିତ ‘ଗଙ୍ଗୁବାଇ କାଥିଆଓ୍ବାଡି’ରେ ଅଜୟ ଦେବଗନ ନଜର ଆସିବେ। ଏହି ଫିଲ୍ମରେ ତାଙ୍କୁ ଏକ ବିଶେଷ ଭୂମିକାରେ ଦେଖିବାକୁ ମିଳିବ। ୨୫ ଫେବୃୟାରୀରେ ଏହା ପ୍ରେକ୍ଷାଳୟରେ ମୁକ୍ତିଲାଭ କରିବ। ଏହାର ଟ୍ରେଲର ଫେବୃୟାରୀ ୪ରେ ରିଲିଜ ହେବ। ମାତ୍ର ଏହାପୂର୍ବରୁ ଅଜୟ ତାଙ୍କର ଫାଷ୍ଟ୍ ଲୁକ୍ ସୋସିଆଲ ମିଡିଆରେ ଶେୟାର କରିଛନ୍ତି।
ଏହି ଫିଲ୍ମରେ ସେ ଏକ ଦମ୍ଦାର ଭୂମିକାରେ ନଜର ଆସିବେ ବୋଲି ଜଣାପଡୁଛି। ଫିଲ୍ମରେ ମାତ୍ର ୨୦ ମିନିଟ୍ ପାଇଁ ସେ ଆସିବେ। ଅଜୟ ପୋଷ୍ଟର ଶେୟାର କରି କ୍ୟାପ୍ଶନରେ ଲେଖିଛନ୍ତି, ‘ନିଜର ପରିଚୟ ସହିତ ଚାର୍ଚାନ୍ଦ ଲଗାଇବାକୁ ମୁଁ ଆସୁଛି’। ଏଥିରେ ଅଭିନେତା ରଣବୀର ସିଂ ଲେଖିଛନ୍ତି, ପାଓ୍ବାର।
ଗତ ବର୍ଷ ନଭେମ୍ବରରେ ଆସିଥିବା ଅକ୍ଷୟ କୁମାରଙ୍କ ଫିଲ୍ମ ‘ସୂର୍ଯ୍ୟବଂଶୀ’ରେ ଅଜୟ ଦେବଗନଙ୍କୁ ସିଂହମ ଷ୍ଟାଇଲ୍ରେ ଦେଖିବାକୁ ମିଳିଥିଲା। ଯଦି ଆମେ ଅଜୟଙ୍କ ଫିଲ୍ମ ବିଷୟରେ କହିବା ତେବେ ତାଙ୍କର ଶେଷ ଫିଲ୍ମ ହେଉଛି ‘ତାନାଜୀ ଦ ଅନସଙ୍ଗ ଓ୍ବାରିୟର’। ଯାହା କରୋନା ମହାମାରୀ ଆରମ୍ଭ ପୂର୍ବରୁ ୨୦୨୦ରେ ପ୍ରେକ୍ଷାଳୟରେ ମୁକ୍ତିଲାଭ କରିଥିଲା। ଏହା ପରେ ଅଜୟଙ୍କ ‘ଭୁଜ୍ ଦ ପ୍ରାଇଡ୍ ଅଫ୍ ଇଣ୍ଡିଆ’ ଡିଜ୍ନି ପ୍ଲସ ହଟଷ୍ଟାରରେ ଆସିଥିଲା। ‘ଗଙ୍ଗୁବାଇ କାଠିଆଓ୍ବାଡି’ ପରେ ଅଜୟ ମାର୍ଚ୍ଚ ୨୫ରେ ପ୍ରେକ୍ଷାଳୟରେ ମୁକ୍ତିଲାଭ କରୁଥିବା ‘ଆର୍ଆର୍ଆର୍’ରେ ନଜର ଆସିବେ। ଏହି ଫିଲ୍ମରେ ସେ ଅତିଥି କଳାକାର ଭୂମିକାରେ ଦର୍ଶକଙ୍କ ସାମ୍ନାକୁ ଆସିବେ।
