କୁଆଲାଲମ୍ପୂର: ସୁଲଭ ମୂଲ୍ୟରେ ବିମାନ ସେବା ଯୋଗାଣକାରୀ ମାଲେସିଆ ଭିତ୍ତିକ କମ୍ପାନୀ ଏୟାର ଏସିଆ ଗ୍ରୁପ ଭାରତ ନିବେଶ ପ୍ରସ୍ତାବ ଉପରେ ବର୍ତ୍ତମାନ ବିଚାର କରୁଛି। ଭାରତରେ ଟାଟା ସହ ମିଳିତ ହୋଇ ଏହି କମ୍ପାନୀ ସେବା ଯୋଗାଣ କରୁଥିବା ବେଳେ ଘରୋଇ ବଜାର ଛାଡିପାରେ ବୋଲି ଆଲୋଚନା ଜୋର ଧରିଛି। ଘରୋଇ ବଜାରରେ ନିବେଶ ପ୍ରସଙ୍ଗ ଉପରେ ଏହି କମ୍ପାନୀ ବର୍ତ୍ତମାନ ତର୍ଜମା କରୁଛି। କମ୍ପାନୀ ବର୍ତ୍ତମାନ ଆର୍ଥତ୍କ ଚାପ ଦେଇ ଗତି କରୁଛି। ଫଳରେ ଏହା ଅଧିକ କ୍ଷତି ଭରଣା କରିବା ସପକ୍ଷରେ ନାହିଁ। କାରବାରକୁ ବ୍ୟବସ୍ଥିତ କରି କମ୍ପାନୀର ଆର୍ଥତ୍କ ଚାପ କମାଇବା ସପକ୍ଷରେ ଏହା କାମ କରୁଥିବା କହିଛି। ନିକଟରେ ଜାପାନରେ ରହିଥିବା କାରବାରକୁ ଏହା ବନ୍ଦ କରିଛି। କମ୍ପାନୀ ଭାରତ ପାଇଁ ସମାନ ନୀତି ଆପଣାଇ ପାରେ ବୋଲି ଚର୍ଚ୍ଚା ଜୋର ଧରିଛି। ଟାଟାସନ୍ସ ସହ ମିଳିତ ହୋଇ ଏୟାର ଏସିଆ ଇଣ୍ଡିଆ ନାମରେ ଏହା ସେବା ଦେଉଛି। ଏହି ଯୌଥ ଉଦ୍ୟୋଗରେ ଏୟାର ଏସିଆର ଗ୍ରୁପର ୪୯% ଅଂଶଧନ ରହିଛି। ଟାଟା ନିକଟରେ ୫୧% ଅଂଶଧନ ରହିଛି।
ଯୌଥ ଉଦ୍ୟୋଗରେ ରହିଥିବା ଅଧିକାଂଶ ଅଂଶଧନକୁ ନିଜ ନିକଟରେ ରଖିବା ଲାଗି ଟାଟାସନ୍ସ ପ୍ରକ୍ରିୟା ଜାରି କରିଥିବା ବେଳେ ଗତ ମାସରେ ଆଲୋଚନାରେ ସାମିଲ ହୋଇଥିବା ଏକ ଖବର ଗଣମାଧ୍ୟମରେ ପ୍ରକାଶ ପାଇଥିଲା। ଆସିଆନ ଅଞ୍ଚଳରେ ସ୍ଥିତି ଦୃଢ କରିବା ଲାଗି କାରବାର ବ୍ୟବସ୍ଥିତ କରିବା ଯୋଜନା ରହିଥିବା ଗତ ସେପ୍ଟେମ୍ବରରେ ଗ୍ରୁପ ଚିଫ୍ ଏକଜିକ୍ୟୁଟିଭ ଟୋନି ଫର୍ନାଣ୍ଡିଜ କହିଥିଲେ। ପୁଣି ବଜାରକୁ ଦୃଢ ହୋଇ ଫେରିବା ନେଇ କମ୍ପାନୀର ଯୋଜନା ରହିଛି। କରୋନା ସ୍ଥିତି ସୁଧୁରିଲେ କମ୍ପାନୀ ଏ ଦିଗରେ ଯୋଜନା ହାତକୁ ନେବ। କରୋନା ଯୋଗୁ ସାରା ବିଶ୍ୱର ବିମାନ ଶିଳ୍ପ ବଜାର ପ୍ରଭାବିତ ହୋଇ ରହିଛି। ଏହି ସ୍ଥିତି ସୁଧୁରିବାକୁ ୨୦୨୧ ମଧ୍ୟ ଭାଗ ହୋଇଯିବ ବୋଲି ଏୟାର ଏସିଆ ଗ୍ରୁପର ସଭାପତି ବୋ ଲିଙ୍ଗମ କହିଛନ୍ତି।
