ନୂଆଦିଲ୍ଲୀ, ୨୫।୧୨: କେନ୍ଦ୍ରୀୟ କୃଷିମନ୍ତ୍ରୀ ନରେନ୍ଦ୍ର ସିଂ ତୋମରଙ୍କ ମନ୍ତବ୍ୟ ନେଇ ଏବେ ରାଜନୈତିକସ୍ତରରେ ଚର୍ଚ୍ଚା ଆରମ୍ଭ ହୋଇଛି। ସେ ମହାରାଷ୍ଟ୍ରର ନାଗପୁର ଠାରେ ଏକ କାର୍ଯ୍ୟକ୍ରମରେ ଯୋଗଦେଇ ଆଶ୍ଚର୍ଯ୍ୟଜନକ ମନ୍ତବ୍ୟ ଦେଇଛନ୍ତି। ଗତ ମାସରେ ସରକାର ପ୍ରତ୍ୟାହାର କରି ନେଇଥିବା ତିନି କୃଷି ଆଇନକୁ ପୁଣି ନୂଆ ରୂପରେ ଫେରାଇ ଅଣାଯିବ ବୋଲି ତୋମର କହିଛନ୍ତି।
ସେ କହିଛନ୍ତି ଯେ ଆମେ କେବଳ ଗୋଟିଏ ପାଦ ପଛକୁ ହଟିଛୁ। କିନ୍ତୁ ଆମେ ପୁଣି ଆଗେଇବୁ। କାରଣ କୃଷକମାନେ ହେଉଛନ୍ତି ଭାରତର ମେରୁଦଣ୍ଡ।
ସରକାର ନିରାଶ ନୁହଁନ୍ତି ବରଂ ଆଗକୁ ଅପେକ୍ଷା କରି ରହିଛନ୍ତି। ତୋମର ତାଙ୍କ ସମ୍ବୋଧନରେ ବିବାଦୀୟ କୃଷି ଆଇନକୁ ପ୍ରତ୍ୟାହାର ପାଇଁ କିଛି ଲୋକଙ୍କୁ ଦାୟୀ କରିଛନ୍ତି। କୃଷି ମନ୍ତ୍ରୀ କହିଛନ୍ତି ଯେ ଆମେ କୃଷି ସଂଶୋଧନ ଆଇନ ଆଣିଛୁ। କିନ୍ତୁ କିଛି ଲୋକ ଏହି ଆଇନକୁ ପସନ୍ଦ କରନ୍ତି ନାହିଁ। ସ୍ବାଧୀନତାର ୭୦ ବର୍ଷ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଏହା ଏକ ଗୁରୁତ୍ୱପୂର୍ଣ୍ଣ ସଂସ୍କାର ଥିଲା।
ସୂଚନାଯୋଗ୍ୟ, ନଭେମ୍ବର ୨୯ ରେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉତ୍ତରପ୍ରଦେଶ ଏବଂ ପଞ୍ଜାବରେ ନିର୍ବାଚନର ତିନି ମାସ ପୂର୍ବରୁ ତିନି କୃଷି ଆଇନ ପ୍ରତ୍ୟାହାର ଘୋଷଣା କରିଥିଲେ। ତେବେ ସରକାରଙ୍କ ଏହି ଘୋଷଣା ପରେ ହଠାତ୍ ବିରୋଧୀମାନେ ପ୍ରଶ୍ନ ଉଠାଇବା ଆରମ୍ଭ କରିଥିଲେ। ନିର୍ବାଚନ ପାଇଁ ଏଭଳି କରାଯାଇଥିବା ବିରୋଧି ଅଭିଯୋଗ କରିଥିଲେ।
