ଭୁବନେଶ୍ୱର,୨୩।୬: ଓଡ଼ିଶା ସରକାରଙ୍କ ଅଧୀନରେ ଥିବା ଗ୍ରୀଡ୍କୋ ଲିମିଟେଡ୍ ଏବଂ ମଧ୍ୟପ୍ରଦେଶ ଶକ୍ତି ନିଗମ ଲିମିଟେଡ୍ (ଏମ୍ପିପିସିଏଲ୍) ମଧ୍ୟରେ ନିକଟରେ ଏକ ଦ୍ୱିପାକ୍ଷିକ ଚୁକ୍ତିନାମା ହୋଇଥିବା ଜଣାପଡିଛି। ବିଶେଷକରି ୩୫୦ ମେଗାଓ୍ବାଟ୍ ପର୍ଯ୍ୟନ୍ତ ବିଦ୍ୟୁତ୍ ଶକ୍ତି ବିନିମୟ ବ୍ୟବସ୍ଥା ମାଧ୍ୟମରେ ଆଣିବା ପାଇଁ ଉଭୟ ପକ୍ଷଙ୍କ ମଧ୍ୟରେ ଏକ ପାଓ୍ବାର ବ୍ୟାଙ୍କିଙ୍ଗ୍ ଚୁକ୍ତିନାମା ସ୍ବାକ୍ଷର ହୋଇଛି। ଏପରିକି ଓଡ଼ିଶାରେ ସାମ୍ପ୍ରତିକ ପ୍ରଚଣ୍ଡ ଗ୍ରୀଷ୍ମପ୍ରବାହ ପରିପ୍ରେକ୍ଷୀରେ ବିଦ୍ୟୁତ୍ ଶକ୍ତିର ସର୍ବୋଚ୍ଚ ଚାହିଦା ୫୪୦୦ ମେଗାଓ୍ବାଟରେ ପହଞ୍ଚିଛି। ଏହି ପରିବର୍ତ୍ତିତ ଚାହିଦାକୁ ପୂରଣ କରିବା ପାଇଁ ସମ୍ପ୍ରତି ଆବଶ୍ୟକ ବିଦ୍ୟୁତ୍ ଶକ୍ତି ଉପଲବ୍ଧ ରହିଛି। ତେବେ ଉତ୍ପାଦନ କେନ୍ଦ୍ରଗୁଡିକର ଆକସ୍ମିକ ବ୍ରେକ୍ ଡାଉନ୍ ଓ ଅନ୍ୟାନ୍ୟ ଜରୁରିକାଳୀନ ପରିସ୍ଥିତିର ସମ୍ଭାବନାକୁ ଦୃଷ୍ଟିରେ ରଖି ରାଜ୍ୟବାସୀଙ୍କୁ ସ୍ଥିର ଓ ନିରବଚ୍ଛିନ୍ନ ବିଦ୍ୟୁତ୍ ଶକ୍ତି ଯୋଗାଇ ଦେବା ପାଇଁ ସମ୍ପ୍ରତି ଗ୍ରୀଡ୍କୋ ଏମ୍ପିପିସିଏଲ୍ଠାରୁ ୩୫୦ ମେଗାଓ୍ବାଟ୍ ପର୍ଯ୍ୟନ୍ତ ବିଦ୍ୟୁତ୍ ଶକ୍ତି ବିନିମୟ ବ୍ୟବସ୍ଥା ମାଧ୍ୟମରେ ଆଣିବା ପାଇଁ ଏକ ପାଓ୍ବାର ବ୍ୟାଙ୍କିଙ୍ଗ୍ ଚୁକ୍ତିନାମା ସ୍ବାକ୍ଷର କରିଛି। ଏହି ଚୁକ୍ତି ଅନୁଯାୟୀ ଚଳିତ ବର୍ଷ ଏପ୍ରିଲ ଓ ଜୁଲାଇ ମଧ୍ୟରେ ଗ୍ରୀଡ୍କୋ ଏମ୍ପିପିସିଏଲ୍ଠାରୁ ୧୦୦ ମେଗାଓ୍ବାଟ୍ ବିଦ୍ୟୁତ୍ ଶକ୍ତି ନିଶ୍ଚୟ ସଂଗ୍ରହ କରିବ ଏବଂ ଆବଶ୍ୟକ ସ୍ଥଳେ ଏହି ଅବଧି ମଧ୍ୟରେ ଯେକୌଣସି ସମୟରେ ଶକ୍ତି ବିନିମୟ ବ୍ୟବସ୍ଥା ମାଧ୍ୟମରେ ଗ୍ରୀଡ୍କୋ ଅଧିକ ୨୫୦ ମେଗାଓ୍ବାଟ୍ ପର୍ଯ୍ୟନ୍ତ ବିଦ୍ୟୁତ୍ ଶକ୍ତି ଆଣିପାରିବ ବୋଲି ଗ୍ରୀଡ୍କୋର ପରିଚାଳନା ନିର୍ଦ୍ଦେଶକ ତ୍ରିଲୋଚନା ପଣ୍ଡା ଏକ ପ୍ରେସ୍ ବିବୃତିରେ ବିସ୍ତୃତ ସୂଚନା ଦେଇଛନ୍ତି। ଏହି ପାଓ୍ବାର ବ୍ୟାଙ୍କିଙ୍ଗ୍ ଏକ ନଗଦରହିତ ବ୍ୟବସ୍ଥା, ଯେଉଁଥିରେ କି କୌଣସି ଶୁଳ୍କର ଓ ଦେୟ ପୈଠ ଭିତ୍ତିକ କ୍ରୟବିକ୍ରୟ କରାଯାଏ ନାହିଁ।
