ବାଲେଶ୍ୱର ଅଫିସ,୧୬।୧୧: ଓଡ଼ିଶା ଅମଲା ସଂଘର ବାଲେଶ୍ୱର ଶାଖା ପକ୍ଷରୁ କନିଷ୍ଠ ସହାୟକମାନଙ୍କ ଯୋଗ୍ୟତା ଭିତ୍ତିକ ଦରମା ଓ ଗ୍ରେଡ୍ ପେ ବୃଦ୍ଧି କରିବା ପାଇଁ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ସ୍ମାରକପତ୍ର ଜିଲାପାଳ ଦତ୍ତାତ୍ରୟ ଭାଉସାହେବ ଶିନ୍ଦେଙ୍କ ଜରିଆରେ ମଙ୍ଗଳବାର ପ୍ରଦାନ କରାଯାଇଛି। ଶତାଧିକ କର୍ମଚାରୀ ସ୍ଥାନୀୟ ଖ୍ରୀଷ୍ଟିଆନ ହାଇସ୍କୁଲଠାରୁ ଏକ ଶୋଭାଯାତ୍ରାରେ ବାହାରି ଜିଲାପାଳଙ୍କ ଅଫିସ୍ ସମ୍ମୁଖରେ ପହଞ୍ଚତ୍ ବିକ୍ଷୋଭ ପ୍ରଦର୍ଶନ କରିଥିଲେ। ଜିଲାର ୧୨ଟି ବ୍ଲକରୁ ବିଭିନ୍ନ ବିଭାଗର କନିଷ୍ଠ,ବରିଷ୍ଠ ସହାୟକ ଓ ବିଭାଗୀୟ ଅଧିକାରୀ ଯୋଗଦେଇଥିଲେ। ସଂଘର ଅଧ୍ୟକ୍ଷ ପତିତ ପାବନ ଦାସ, ସଭାପତି ଲକ୍ଷ୍ମୀଧର ଦାସ, କାର୍ଯ୍ୟକାରୀ ସଭାପତି ହିମାଂଶୁ ଶେଖର ଦାସ, ସମ୍ପାଦକ ରାଜେନ୍ଦ୍ର କୁମାର ମହାନ୍ତି ଓ ମୁଖ୍ୟ ସଂଯୋଜକ ବରେନ କୁମାର ପାତ୍ରଙ୍କ ନେତୃତ୍ୱରେ ଏକ ୬ଜଣିଆ ଟିମ୍ ଜିଲାପାଳଙ୍କୁ ଦାବି ସମ୍ପର୍କରେ ସ୍ମାରକପତ୍ର ପ୍ରଦାନ କରିଥିଲେ।
ମସିହା ଦରମା ବୃଦ୍ଧି ପୂର୍ବରୁ ରାଜସ୍ବ ନୀରିକ୍ଷକଙ୍କ ଜିଲାସ୍ତରୀୟ ସହାୟକମାନଙ୍କ ସହିତ ଶିକ୍ଷାଗତ ଯୋଗ୍ୟତା ଓ ଦରମା, ଗ୍ରେଡ୍ ପେ ସମାନ ଥିବା ଜାଗାରେ ପରବର୍ତ୍ତୀ ସମୟରେ ସମାନ ଶିକ୍ଷାଗତ ଯୋଗ୍ୟତା ଥାଇ ମଧ୍ୟ ରାଜସ୍ବ ନିରୀକ୍ଷକଙ୍କ ଦରମା ୯,୩୦୦- ୪୨,୦୦୦ ଓ ଗ୍ରେଡ୍ ପେ ୪,୨୦୦କୁ ସରକାର ବୃଦ୍ଧି କରିଥିଲେ ମଧ୍ୟ ଜିଲାସ୍ତରୀୟ ଅମଲାମାନଙ୍କର ଦରମା ସେହି ପରିମାଣରେ ବୃଦ୍ଧି କରାଯାଇ ନାହଁି। ଓଡ଼ିଶା ସଚିବାଳୟ ଓ ବିଭାଗୀୟ ମୁଖ୍ୟରେ କାର୍ଯ୍ୟରତ କନିଷ୍ଠ ସହାୟକମାନଙ୍କ ଦରମା ଜିଲାସ୍ତରୀୟ ଉପବିଭାଗୀୟ ଅଧିକାରୀମାନଙ୍କ ଦରମା ସମାନ ରଖାଯାଇ ଥିବାରୁ କର୍ମକର୍ତ୍ତାମାନେ ଉଦ୍ବେଗ ପ୍ରକାଶ କରିଛନ୍ତି। ଜିଲାସ୍ତରୀୟ ସହାୟକ (ଅମଲା)ମାନେ ସରକାରଙ୍କ ବିଭିନ୍ନ ଜନକଲ୍ୟାଣ କାର୍ଯ୍ୟକ୍ରମ ସୂଚାରୁ ରୂପେ ତୁଲାଉ ଥିଲେ ମଧ୍ୟ ସେମାନଙ୍କୁ ବହୁଦିନ ଧରି ଉପେକ୍ଷିତ କରାଯାଇଛି। ସରକାର ଜିଲାସ୍ତରୀୟ ଅମଲାମାନଙ୍କ ଚାକିରିରେ ପ୍ରବେଶ ଶିକ୍ଷାଗତ ଯୋଗ୍ୟତା ସ୍ନାତ୍ତକ ସହିତ କମ୍ପ୍ୟୁଟର ଶିକ୍ଷା ୨୦୧୭କୁ ସ୍ଥିର କରିଥିଲେ ସୁଦ୍ଧା ସମାନ ଶିକ୍ଷାଗତ ଯୋଗ୍ୟତା ଥାଇ ରାଜ୍ୟସ୍ତରୀୟ ଅମଲାମାନଙ୍କ ଦରମା ଓ ଗ୍ରେଡ୍ ପେରେ ତାରତମ୍ୟ ସୃଷ୍ଟି କରାଯାଇଥିବାରୁ ଜିଲାସ୍ତରୀୟ ଅମଲାମାନଙ୍କ କାର୍ଯ୍ୟ କରିବାର ସ୍ପୃହା ଧୀରେ ଧୀରେ କମିବାରେ ଲାଗୁଛି ଓ ମାନସିକ ଚାପ ମଧ୍ୟରେ କାର୍ଯ୍ୟ ସମ୍ପାଦନ କରୁଛନ୍ତି। ଏହି ପରିପ୍ରେକ୍ଷୀରେ ରାଜ୍ୟ ସଂଘ ଆସନ୍ତା ୨୭ ତାରିଖରେ ଭୁବନେଶ୍ୱର ସ୍ଥିତ ଲୋୟର ପିଏମ୍ଜିଠାରେ ରାଜ୍ୟର ସମସ୍ତ ଜିଲାର ବିଭିନ୍ନ ବିଭାଗର ଅମଲାମାନେ ନିଜର ନାର୍ଯ୍ୟ ଦାବି ସରକାରଙ୍କୁ ଜଣାଇବା ସହିତ ଦାବି ପୂରଣ ନ ହେଲେ ବାଧ୍ୟ ହୋଇ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।
