ରାଉରକେଲା,୨।୭(ବିପ୍ଳବ ରଞ୍ଜନ ଦାଶ)ରାଉରକେଲା ବେଦବ୍ୟାସ ପ୍ରମୋଦ ନଗର ନଦୀଟୋଲିର ବାସିନ୍ଦା ଚିନ୍ମୟ ତ୍ରିପାଠୀ(୨୫)। ତାଙ୍କ ମା’ ପୁଷ୍ପାଞ୍ଜଳି (୪୮) ଓ ବାପା ବିନୋଦ (୫୪)। ଚିନ୍ମୟ ବର୍ତ୍ତମାନ ରାଉରକେଲା ସରକାରୀ ସ୍ବୟଂଶାସିତ କଲେଜରେ ଅତିଥି ଶିକ୍ଷକ ଭାବେ କାର୍ଯ୍ୟରତ। ଏହାସହ ଜଣେ ମଞ୍ଚ କଳାକାର ଭାବେ ତାଙ୍କର ପ୍ରସିଦ୍ଧି ରହିଛି। ଶିଶୁ କଳାକାର ଭାବେ ଅଭିନୟ ଆରମ୍ଭ କରିଥିବା ଚିନ୍ମୟ ବର୍ତ୍ତମାନ ୨୫ ବର୍ଷ ବୟସରେ ଶହେରୁ ଊର୍ଦ୍ଧ୍ୱ ନାଟକରେ ଅଭିନୟ କରିସାରିଲେଣି। ଏଥିପାଇଁ ସେ ଜାତୀୟ, ଅନ୍ତର୍ଜାତୀୟ ସ୍ତରରେ ପୁରସ୍କୃତ ହୋଇଛନ୍ତି।
ପିଲାଟି ଦିନରୁ ଚିନ୍ମୟ ମା’ଙ୍କଠାରୁ ରାମାୟଣ, ମହାଭାରତ ସମେତ ବିଭିନ୍ନ ପୌରାଣିକ କାହାଣୀ ଶୁଣନ୍ତି। ଏହାସହ ସମାଜରେ ଉଚିତ ଅନୁଚିତ ବ୍ୟବହାରିକ ଚାଲିଚଳନ ଶିକ୍ଷା ଗ୍ରହଣ କରନ୍ତି। ବାପା ବିନୋଦ ତାଙ୍କୁ ସର୍ବଦା ବିବିଧ ଜ୍ଞାନ ଆହରଣ ପାଇଁ ପ୍ରେରଣା ଦେଉଥିଲେ। ଫଳରେ ସେ ଆଜି ଜଣେ ସଫଳ ମଞ୍ଚ କଳାକାର ହୋଇପାରିଥିବା କହିଛନ୍ତି। ସୋନପୁର ଜିଲା ବିନିକା ଉର୍ଲ୍ଲେ ଗାଁର ରାମଳୀଲା ମହୋତ୍ସବ ମଞ୍ଚରୁ ନାଟ୍ୟ ଜଗତରେ ପ୍ରବେଶ କରିବା ପାଇଁ ଚିନ୍ମୟଙ୍କୁ ସୁଯୋଗ ମିଳିଥିଲା। ସେ ୮ବର୍ଷ ବୟସରେ ରାମ ଭୂମିକାରେ ଅଭିନୟ କରିଥିଲେ। ସେହିଦିନଠୁ ସେ ଆଉ ପଛକୁ ଫେରିନାହାନ୍ତି। ତାଙ୍କୁ ବର୍ତ୍ତମାନ ୨୫ବର୍ଷ ବୟସ। ଏତେ କମ୍ ବୟସରେ ସେ ଗୁରୁ ଦକ୍ଷିଣା, ମୋତେ ମାରନି, ସ୍ବସ୍ତି ନ ମନୁ ଚରେମମ୍ (ସଂସ୍କୃତ ନାଟକ), ବାହାର ଲୋକ, ଭଲ ମଣିଷ, ସୂର୍ଯ୍ୟାସ୍ତ ସତୀ, ୟୁ ଆର ଅଣ୍ଡର ଆରେଷ୍ଟ, ଅନୁଭବର ଈଶ୍ୱର, ଓଟ, ହିନ୍ଦୀ ନାଟକ ଇନସାନ, ଯମରାଜାଙ୍କ ମେଲା ଦେଖା, ଦକ୍ଷିଣା ଦାନ ଆଦି ୧୦୦ରୁ ଊର୍ଦ୍ଧ୍ୱ ନାଟକରେ ଅଭିନୟ କରି ରାଜ୍ୟ ଓ ଅନ୍ତର୍ଜାତୀୟ ସ୍ତରରେ ସମ୍ମାନିତ ହୋଇଛନ୍ତି। ଚିନ୍ମୟ ଭବିଷ୍ୟତରେ ଜଣେ ଭଲ ଶିକ୍ଷକ ଓ କଳାକାର ଭାବେ ନିଜକୁ ପ୍ରତିଷ୍ଠା କରିବାକୁ ଆଶା ରଖିଥିବା କହିଛନ୍ତି।
