ଗୁଣୁପୁର, ୩।୩(ସଂକେତ ପାତ୍ର): ଗତ ଫେବୃଆରୀ ୨୫ ତାରିଖରେ ବେଙ୍ଗାଲୁରୁରେ ଗୁଣୁପୁର ନିକଟସ୍ଥ ରେଜିଂତାଲ ଗ୍ରାମର ଇସ୍ତିପାନ ଗମାଙ୍ଗଙ୍କ ଝିଅ ମଞ୍ଜୁଳା ଗମାଙ୍ଗଙ୍କ ମୃତ୍ୟୁ ଘଟିଥିଲା। ଏନେଇ ଧରିତ୍ରୀରେ ଖବର ପ୍ରକାଶ ପାଇବା ପରେ ତତ୍ପରତା ପ୍ରକାଶ ପାଇଛି। ମଙ୍ଗଳବାର ଅପରାହ୍ନରେ ତାଙ୍କ ମୃତଦେହ ଆମ୍ବୁଲାନ୍ସ ଯୋଗେ ତାଙ୍କ ଗ୍ରାମରେ ପହଞ୍ଚିଛି।
ମଞ୍ଜୁଳାଙ୍କ ମର ଶରୀରକୁ ବେଙ୍ଗାଲୁରୁରୁ ଗ୍ରାମକୁ ଆଣିବା ପାଇଁ ତାଙ୍କ ବାପା, ମା’ ଓ ଭାଇ ସହ ସେହି ଅଞ୍ଚଳର ସମାଜସେବୀ ଇସ୍ମାଇଲ ଶବର, ଭାଜପା ରାଷ୍ଟ୍ରୀୟ ପରିଷଦ ସଦସ୍ୟ ୱାଇ. ଗଣପତିଙ୍କ ସହ ସମ୍ପର୍କ ରଖି ଏହି ଦୁଃଖଦ ଘଟଣା ବିଷୟରେ ଜଣାଇଥିଲେ। ଘଟଣା ଜାଣିବା ପରେ ଗଣପତି ବେଙ୍ଗାଲୁରୁ ସିଟି ପୋଲିସ ଷ୍ଟେଶନର ଭାରପ୍ରାପ୍ତ ଅଧିକାରୀଙ୍କ ସହ କଥା ହୋଇ ମୃତଦେହକୁ ଆମ୍ବୁଲାନ୍ସ ଯୋଗେ ଗୁଣୁପୁରକୁ ପଠାଇବା ପାଇଁ ବ୍ୟବସ୍ଥା କରିଥିଲେ। ଏଥିସହ ଗୁଣୁପୁର ଉପଜିଲାପାଳ ଦୁଧାଲ ଅଭିଷେକ ଦିଲୀପ ଓ ଗୁଣୁପୁର ଥାନାର ଆଇଆଇସି କମଳକାନ୍ତ କନ୍ହରଙ୍କ ସହ କଥାବାର୍ତ୍ତା ହୋଇ ଶୋକସନ୍ତପ୍ତ ପରିବାରକୁ ସରକାରୀ ସାହାଯ୍ୟ ଯୋଗାଇବା ପାଇଁ ଅନୁରୋଧ କରିଥିବା ଜଣାପଡ଼ିଛି।
ଆମ୍ବୁଲାନ୍ସ ଆଜି ଗ୍ରାମରେ ପହଞ୍ଚିବା ସମୟରେ ଭାଜପା ରାଷ୍ଟ୍ରୀୟ ପରିଷଦ ସଦସ୍ୟ ୱାଇ. ଗଣପତି, ଜିଲା ଉପସଭାପତି ଶ୍ରୀନିବାସ ସ୍ବାଇଁ, ଯୁବ ନେତା ସତ୍ୟ ସୁନ୍ଦର କର ଓ କିରଣ କୁମାର ପାଣଗ୍ରାହୀ ରେଜିଂତାଲ ଗ୍ରାମରେ ଉପସ୍ଥିତ ରହି ପରିବାରବର୍ଗଙ୍କୁ ସାନ୍ତ୍ୱନା ଜଣାଇଥିଲେ। ଘଟଣାକୁ ନେଇ ସମଗ୍ର ଅଞ୍ଚଳରେ ଶୋକର ଛାୟା ପ୍ରକାଶ ପାଇଛି।
