ନୂଆଦିଲ୍ଲୀ,୩୦।୫ : ଭାରତରେ ସାଧାରଣତଃ ସଫା କରିବାର ଦୁଇଟି ପଦ୍ଧତି ଅଛି। କେହି ଘରେ ଝାଡୁ ଲଗାଇ ସଫା କରିଥାନ୍ତି ଅବା ଅନ୍ୟ କେହି ପୋଛିଥାନ୍ତି। ଯେତେବେଳେ ଝାଡୁ କରାଯାଇଥାଏ ସେତେବେଳେ ଧୂଳି କଣିକା ଭୂମିରୁ ଉଡି କାନ୍ଥ, ଶଯ୍ୟା, ଆସବାବପତ୍ର ଇତ୍ୟାଦିରେ ଲାଗି ଥାଏ। ପ୍ରମୁଖ ଭାକ୍ୟୁମ କ୍ଲିନର୍ ନିର୍ମାତା ଡାୟସନ ଲୋକମାନଙ୍କର ସଫେଇ ପ୍ରଣାଳୀ ସମ୍ବନ୍ଧରେ ଏକ ସର୍ଭେ କରିଛି। ଯେଉଁଥିରେ ପ୍ରକାଶ ପାଇଛି କରୋନା ମହାମାରୀ ପରେ ଭାରତୀୟ ଲୋକଙ୍କ ଘର ସଫା କରିବାର ପଦ୍ଧତି ବଦଳିଛି।
ଲୋକମାନେ ସଚେତନ ହୋଇ ପୂର୍ବ ଅପେକ୍ଷା ପରିଷ୍କାର ପରିଚ୍ଛନ୍ନତା ପ୍ରତି ଅଧିକ ଧ୍ୟାନ ଦେଉଛନ୍ତି । କିନ୍ତୁ ଏକ୍ଷେତ୍ରରେ ଲୋକମାନଙ୍କଠାରେ କେତେକ ତ୍ରୁଟି ରହିଛି। ଅନେକେ ସ୍ବଚ୍ଛତାକୁ ଗମ୍ଭୀରତାର ସହ ନେଉ ନ ଥାନ୍ତ।ି କାରଣ ଭାରତର ୭ ଜଣଙ୍କ ମଧ୍ୟରୁ କେବଳ ଜଣେ ନିଜ ଘରକୁ ଭଲ ଭାବରେ ସଫା କରୁଛନ୍ତି। ଅନ୍ୟ ୬ ଜଣ କେବଳ ଦୀପାବଳି ଅବସରରେ ଅବା ଅନ୍ୟ କୌଣସି ପର୍ବପର୍ବାଣୀ ସମୟରେ ଘରଗୁଡ଼ିକୁ ଠିକ ଭାବରେ ସଫା କରୁଛନ୍ତି ।
ଏହି ସର୍ଭେରେ ୩୯ ଟି ଦେଶର ୩୯ ହଜାର ଲୋକ ଅଂଶଗ୍ରହଣ କରିଥିଲେ। ମହାମାରୀ ପରେ ଭାରତର ଲୋକମାନେ ଅଧିକ ସଚେତନ ହୋଇପଡିଛନ୍ତି। ତେବେ ମାତ୍ର ୩୨ ପ୍ରତିଶତ ଲୋକ ନିୟମିତ ଭାବରେ ରୋଷେଇ ଘର, ଶୋଇବା ଘର ଏବଂ ରହିବା ପ୍ରକୋଷ୍ଠକୁ ସଫା କରୁଛନ୍ତି।
ଏହି ସର୍ଭେରେ ଜଡିତ ୬୧ ପ୍ରତିଶତ ଭାରତୀୟ ସହମତ ହୋଇଛନ୍ତି ସେମାନେ ପୂର୍ବ ଅପେକ୍ଷା ବର୍ତ୍ତମାନ ପରିଷ୍କାର ପରିଚ୍ଛନ୍ନତା ବିଷୟରେ ଅଧିକ ସଚେତନ ଅଛନ୍ତି। ସର୍ବେକ୍ଷଣ ଅନୁଯାୟୀ, ୪୨ ପ୍ରତିଶତ ଲୋକ ମଇଳା ଦେଖିଲେ ନିଜ ଘର ସଫା କରନ୍ତି। ସର୍ବେକ୍ଷଣ ଅନୁଯାୟୀ, ଅଧିକାଂଶ ଲୋକ ଏପର୍ଯ୍ୟନ୍ତ ଜାଣି ନାହାଁନ୍ତି ସେମାନଙ୍କ ଘରେ ଅଧିକ ମଇଳା ମଧ୍ୟ ଥାଇପାରେ।
ଘରେ ଥିବା ଧୂଳି କଣିକା ଅଛି, ଏହା ବିଷୟରେ ସଚେତନତା କମ। ପୃଥିବୀରର ୫୫ ପ୍ରତିଶତ ପରିବାରରେ ଆଲର୍ଜି ଥିବା ବ୍ୟକ୍ତି ଅଛନ୍ତି, ତଥାପି ଧୂଳିରେ ସାଧାରଣ ଆଲର୍ଜେନ୍ସର ଉପସ୍ଥିତି ବିଷୟରେ ଅଳ୍ପ ଲୋକଙ୍କୁ ଜଣା ଅଛି। ସର୍ବେକ୍ଷଣ କରାଯାଇଥିବା ଲୋକମାନଙ୍କ ମଧ୍ୟରୁ କେବଳ ୩୩ ପ୍ରତିଶତ କହିଛନ୍ତି ସେମାନେ ଜାଣିଛନ୍ତି ଧୂଳିରେ ବିପଜ୍ଜନକ ମାଇକ୍ରୋବସ ରହିପାରେ ଏବଂ ୩୨ ପ୍ରତିଶତ ଲୋକ ଜାଣିଛନ୍ତି ଘରର ଧୂଳିରେ ମଳରେ ଥିବା ପ୍ୟାଥୋଜେନ ମଧ୍ୟ ରହିପାରେ।
ସର୍ବେକ୍ଷଣରେ ଜଡିତ ଅଧିକାଂଶ ଲୋକ ବିଶ୍ୱାସ କରନ୍ତି ମଇଳା ଶୌଚାଳୟରେ ଅଛି। ୪୫ ପ୍ରତିଶତ ଭାରତୀୟ ବିଶ୍ୱାସ କରନ୍ତି ରୋଷେଇ ଘରେ ପ୍ୟାଥୋଜେନ ରହିଥାନ୍ତି। ତେବେ ୭୦ ପ୍ରତିଶତରୁ ଅଧିକ ଭାରତୀୟ ରୋଷେଇ ଘର ସଫା କରିବା ସମୟରେ ପ୍ୟାଥୋଜେନ ସଫା କରିବାକୁ ବ୍ୟଗ୍ର ହୁଅନ୍ତି ନାହିଁ।
