ଭୁବନେଶ୍ୱର,୭।୮(ବ୍ୟୁରୋ): ବହୁ କୋଟିର ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଗିରଫ ହୋଇଥିବା ଓଡ଼ିଶା ଷ୍ଟାଫ୍ ସିଲେକ୍ସନ କମିଶନ (ଓଏସ୍ଏସ୍ସି) ସଦସ୍ୟଙ୍କ ପ୍ରାଇଭେଟ ସେକ୍ରେଟାରି (ପିଏସ୍) ବିରଞ୍ଚତ୍ ନାରାୟଣ ସାହୁଙ୍କ ରିମାଣ୍ଡ ଅବଧି ଶୁକ୍ରବାର ଶେଷ ହୋଇଛି। ଭିଜିଲାନ୍ସ ତାଙ୍କୁ ୪ ଦିନିଆ ରିମାଣ୍ଡରେ ଆଣି ଜେରା କରିଥିବାବେଳେ ବହୁ ଗୁରୁତ୍ୱପୂର୍ଣ୍ଣ ତଥ୍ୟ ପାଇଛି। ଏହି ମାମଲାରେ ଓଏସ୍ଏସ୍ସି ନିଯୁକ୍ତି ଲିଙ୍କ୍ ରହିଥିବା ନେଇ ଅଭିଯୋଗ ଉଠୁଥିବାବେଳେ ଜେରାବେଳେ ବିପୁଳ ସମ୍ପତ୍ତି ଠୁଳ ପଛରେ ଆଉଏକ ଖିଅ ମିଳିଛି। ତେବେ ଜେରା ସଂକ୍ରାନ୍ତରେ ଭିଜିଲାନ୍ସ ଶୁକ୍ରବାର ଏକ ପ୍ରେସ୍ ବିଜ୍ଞପ୍ତି ଜାରି କହିଛି ଯେ, ଚାକିରି ବ୍ୟତୀତ ବିରଞ୍ଚତ୍ ୨୦୦୯ରୁ ତାଙ୍କ ସ୍ତ୍ରୀଙ୍କ ନାମରେ ଇନ୍ସ୍ୟୁରାନ୍ସ ବ୍ୟବସାୟ ଚଲାଉଥିଲେ। ଯେଉଁଥିରେ ସେ ଏପର୍ଯ୍ୟନ୍ତ ୯ଶହ ଜଣଙ୍କୁ ଜୀବନବୀମା କରାଇଛନ୍ତି। ଯେଉଁମାନେ ଜୀବନ ବୀମା କରିଛନ୍ତି ସେମାନେ ଓଏସ୍ଏସିସିର ବିଭିନ୍ନ ପରୀକ୍ଷା ଦେଇଥିବା ସନ୍ଦେହ କରାଯାଉଛି। ବିରଞ୍ଚତ୍ ସେମାନଙ୍କୁ ବିଭିନ୍ନ ପ୍ରଲୋଭନ ଦେଖାଇ ଜୀବନ ବୀମା କରାଇଥିବା ଜେରା ସମୟରେ ଭିଜିଲାନ୍ସ ଜାଣିବାକୁ ପାଇଛି। ବୀମା କରିଥିବା ୯ଶହ ଜଣଙ୍କ ମଧ୍ୟରୁ ୨୧ଜଣ ପରିକ୍ଷାର୍ଥୀ ଥିବା ଜଣାପଡିଛି। ଅନ୍ୟ ବୀମାଧାରୀଙ୍କ ସମ୍ବନ୍ଧରେ ଖୋଳତାଡ କରାଯାଉଛି। ତେବେ ସେ କରିଥିବା ଇନ୍ସ୍ୟୁରାନ୍ସ ପଲିସିରେ କେତେ କମିଶନ ପାଇଛନ୍ତି, ଟ୍ୟାକ୍ସ ଦେଉଥିଲେ କି ନାହିଁ ସେନେଇ ତଦନ୍ତ କରାଯିବ ବୋଲି ଭିଜିଲାନ୍ସ ଏସ୍ପି ଆର୍. ପ୍ରକାଶ ଗଣମାଧ୍ୟକୁ କହିଛନ୍ତି। ସେପଟେ ବେଆଇନ ଅର୍ଥ କରାବାରରେ ଚେର ଖୋଜିବା ପାଇଁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ନିଜ ଆଡୁ ଏକ ମାମଲା ରୁଜୁ କରି ତଦନ୍ତ ଚଳାଇଛି। ଅନ୍ୟପକ୍ଷରେ ବିରଞ୍ଚତ୍ଙ୍କ ଘରେ ଚଢାଉ ସମୟରେ ୧୧୪ଟି ଆଡ୍ମିଟ୍ କାର୍ଡ ଭିଜିଲାନ୍ସ ଜବତ କରିଥିଲା। ଜବତ ଆଡ୍ମିଟ୍ କାର୍ଡ ମଧ୍ୟରୁ ୧୦୭ଜଣ ଚାକିରି ପାଇ ନ ଥିବା ଜଣାପଡିଛି। ତେବେ ବାକି ଆଡ୍ମିଟ୍ କାର୍ଡର ସମ୍ପୂର୍ଣ୍ଣ ତଥ୍ୟ ଜାଣିବାକୁ ଭିଜିଲାନ୍ସ ତଦନ୍ତ ଜାରି ରଖିଥିବା ଭିଜିଲାନ୍ସ ଏସ୍ପି ସୂଚନା ଦେଇଛନ୍ତି।
ସୂଚନାଯୋଗ୍ୟ, ଜୁଲାଇ ୩୦ରେ ତୃତୀୟଶ୍ରେଣୀ କର୍ମଚାରୀ ବିରଞ୍ଚତ୍ଙ୍କ ଭୁବନେଶ୍ୱର ନୀଳାଦ୍ରିବିହାରସ୍ଥିତ ବାସଭବନ, କଟକରେ ଥିବା ଶ୍ୱଶୁରଘର ସମେତ ୬ ସ୍ଥାନରେ ଭିଜିଲାନ୍ସର ୩ ଟିମ୍ ଚଢ଼ାଉ କରି ବିପୁଳ ସମ୍ପତ୍ତି ଠାବ କରିଥିଲା। ନୀଳାଦ୍ରି ବିହାରସ୍ଥିତ ଦୁଇମହଲା ଘରୁ ଦେଢ କେ.ଜି.ର ସୁନା ଅଳଙ୍କାର, ନଗଦ ୧୨ଲକ୍ଷ ଟଙ୍କା, ୫୬ଲକ୍ଷ ଟଙ୍କାର ବୀମା, ବ୍ୟାଙ୍କ ଜମା, ଟଙ୍କା କାରବାର ରସିଦ୍, ବିଦେଶୀ ଟଙ୍କା, ଛାତ୍ରୀଛାତ୍ରଙ୍କ ଆଡ୍ମିଟ୍ କାର୍ଡ, କାର୍, ବାଇକ ଏବଂ ଅନ୍ୟାନ୍ୟ ସାମଗ୍ରୀ ମିଳିଥିଲା। ଏଥିସହିତ ବିଭିନ୍ନ ସ୍ଥାନରେ ଥିବା ୧୪ଟି ପ୍ଲଟ୍, ୨ଟି ଦୁଇ ମହଲା କୋଠା ସମେତ ମୋଟ ୪ଟି ଘରକୁ ଭିଜିଲାନ୍ସ ଟିମ୍ ଠାବ କରିଥିଲା। ସେହିପରି ତାଙ୍କ ସମ୍ପର୍କୀୟଙ୍କ ଘରୁ ମଧ୍ୟ ନଗଦ ୧୩ଲକ୍ଷ ଟଙ୍କା ଜବତ କରାଯାଇଥିଲା। ଯାଞ୍ଚ ପରେ ବିରଞ୍ଚତ୍ ନିଜ ଆୟତର ୨୬୮% ଅର୍ଥାତ୍ ମୋଟ ୩ କୋଟି ୫୧ଲକ୍ଷ ଓ ୫୧ହଜାର ଟଙ୍କାର ଆୟ ବହିର୍ଭୂତ ସମ୍ପତ୍ତି ଠୁଳ କରଥିବା ଭିଜିଲାନ୍ସ ସ୍ପଷ୍ଟ କରିଥିଲା। ପରେ ବିରଞ୍ଚତ୍ଙ୍କୁ କାର୍ଯ୍ୟରୁ ନିଲମ୍ବନ କରାଯିବା ସହ ବାଧ୍ୟତାମୂଳକ ଅବସର ଦିଆଯାଇଛି।
