ପାରଳାଖେମୁଣ୍ଡି, ୧୧ା୯ (ଗିରିଧାରୀ ପରିଛା): ଗଜପତି ଜିଲା ଗୋଷାଣି ବ୍ଲକ ଗାରବନ୍ଧ ଗ୍ରାମର କୁମୁଟି ସାହିରେ ଡ୍ରେନ ନିର୍ମାଣ ନିମନ୍ତେ ଦୀର୍ଘ ପାଞ୍ଚମାସ ହେଲା ନାଳ ଖୋଳି ଛାଡି ଦିଆଯାଇଛି । ବର୍ତ୍ତମାନ ସୁଦ୍ଧା କାମ ଶେଷ ହେବାର ନାଁ ଗନ୍ଧ ନାହିଁ। ଏପରି ସ୍ଥଳରେ ଲୋକେ ନିଜ ଘରକୁ ଯିବା ପାଇଁ କାଠ ପଟା କିମ୍ବା ଅନ୍ୟ କୌଣସି ପ୍ଲେଟ ପକାଇ ଯାତାୟତ କରୁଛନ୍ତି । ନାଳଗୁଡିକୁ ଖୋଳି ଛାଡିଦେଇଥିବା ଯୋଗୁଁ ମଶା ମାଛିଙ୍କ ଉପଦ୍ରବ ବଢିବାରେ ଲାଗିଛି। ଡେଙ୍ଗୁ, ମ୍ୟାଲେରିଆ ସଂକ୍ରମଣ ଉପୁଜିବାର ଆଶଙ୍କା ରହିଥିବାକୁ ସାହିବାସିନ୍ଦାଙ୍କ ମନରେ ଭୟ ସଂଚାର ହୋଇଛି।
ପ୍ରକାଶ ଯେ, ୫ମ ଏସଏଫସି ୨୦୨୧-୨୨ରେ ୨ଲକ୍ଷ ୨୦ ହଜାର ଟଙ୍କା ବ୍ୟୟ ଅଟକଳରେ କୁମୁଟିସାହିର ଗୋଟିଏ ପାଶର୍ବ ଡ୍ରେନ ନିର୍ମାଣ ଏବଂ ତା’ ଉପରେ ସିମେଣ୍ଟ ଢାଙ୍କୁଣି ପକାଯାଇ କାମ ଆରମ୍ଭ ହୋଇଥିଲା । ଏଥିଲାଗି ସାହିରେ ଗୋଟିଏ ପାଶର୍ବରେ ନାଳ ଖୋଳାଯାଇଥିଲା। ହେଲେ ସାହିର ଅଧା ପର୍ଯ୍ୟନ୍ତ କାମ ହୋଇଥିଲ ମଧ୍ୟ କୌଣସି କାରଣରୁ ଅବଶିଷ୍ଟ କାମକୁ ସମ୍ପୂର୍ଣ୍ଣ ଛାଡ଼ି ଦିଆଯାଇଛି। ତେବେ କେଉଁ କାରଣରୁ ଏହି ନାଳ କାମ ଅଧାରେ ଅଟକିଛି କାହା ପାଖରେ ଉତ୍ତର ନାହିଁ । ଏପରି ସ୍ଥଳେ ଯେଉଁମାନଙ୍କ ଘର ଆଗରେ ନାଳ କାମ ହୋଇନି ସେମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ନାଳରେ ପାଣି ଜମି ରହିବା ସହ ମଶା ମାଛି ଉପଦ୍ରବ ବଢିଥିବା ଏବଂ ନିଜ ଘରକୁ ଯିବାରେ ନାନାଦି ଅସୁବିଧାର ସମ୍ମୁଖୀନ ହେଉଥିବା କହିଛନ୍ତି। ସାହି ବାସିନ୍ଦା ମଧ୍ୟ ଗାଡି ମୋଟର ନେଇ ଯିବା ପାଇଁ ଅସୁବିଧା ଭୋଗୁଥିବା ଜଣାଇଛନ୍ତି। ଏନେଇ ଗାରବନ୍ଧ ସରପଞ୍ଚ ପି.ଅଶୋକ କୁମାରଙ୍କୁ ପଚରାଯିବାରେ ଜଣାଇଛନ୍ତି ଯେ, ଆସନ୍ତା କିଛି ଦିନ ମଧ୍ୟରେ ବାକିଥିବା କାମ ଆରମ୍ଭ ହେବ।
