ନୂଆଦିଲ୍ଲୀ,୨୧।୧: ଟେଷ୍ଟ ର଼୍ୟାଙ୍କିଙ୍ଗରେ ଯଶସ୍ବୀ ଜୟସ୍ବାଲ ଉପରକୁ ଡେଇଁଛନ୍ତି। ଇଂଲଣ୍ଡ ବିପକ୍ଷରେ ଲଗାତାର ଦ୍ୱିଶତକ ହାସଲ କରିଥିବା ଜୟସ୍ବାଲ ର଼୍ୟାଙ୍କିଙ୍ଗରେ ୧୪ ସ୍ଥାନ ଉପରକୁ ଉଠିଛନ୍ତି। ସେ ଏବେ ସେ ବିଶ୍ୱର ୧୫ ତମ ଟେଷ୍ଟ ବ୍ୟାଟ୍ସମ୍ୟାନ ହୋଇଛନ୍ତି। ଏହା ସହିତ ତିନି ଜଣ ଭାରତୀୟ ଖେଳାଳି ଦିନିକିଆ ର଼୍ୟାଙ୍କିଙ୍ଗରେ ଟପ-୫ରେ ପ୍ରବେଶ କରିଛନ୍ତି। ଏଥିରେ ଶୁବମାନ ଗିଲ, ବିରାଟ କୋହଲି ଏବଂ ରୋହିତ ଶର୍ମା ଅଛନ୍ତି।
ଉଭୟ ଟେଷ୍ଟ ଏବଂ ଏକଦିବସୀୟ ର଼୍ୟାଙ୍କିଙ୍ଗରେ ଭାରତୀୟ ବ୍ୟାଟ୍ସମ୍ୟାନ ଉପକୃତ ହୋଇଛନ୍ତି। ଇଂଲଣ୍ଡ ବିପକ୍ଷରେ ଖେଳାଯାଉଥିବା ପାଞ୍ଚ ମ୍ୟାଚ ଟେଷ୍ଟ ସିରିଜର ଦ୍ୱିତୀୟ ତଥା ତୃତୀୟ ମ୍ୟାଚରେ ଜୟସ୍ବାଲ ଦ୍ୱିଶତକ ହାସଲ କରିଥିଲେ। ବିଶାଖାପାଟନମରେ ଖେଳାଯାଇଥିବା ଦ୍ୱିତୀୟ ମ୍ୟାଚରେ ଜୟସୱାଲ ଭାରତର ପ୍ରଥମ ଇନିଂସରେ ୨୦୯ ରନ ସଂଗ୍ରହ କରିଥିଲେ। ଏହା ପରେ ରାଜକୋଟରେ ଖେଳାଯାଇଥିବା ତୃତୀୟ ଟେଷ୍ଟରେ ସେ ଦ୍ୱିତୀୟ ଇନିଂସରେ ବ୍ୟାଟିଂ କରୁଥିବାବେଳେ ଅପରାଜିତ ୨୧୪ ରନ ସ୍କୋର କରିଥିଲେ। ଏହା ବ୍ୟତୀତ ଜୟସ୍ବାଲ ହାଇଦ୍ରାବାଦରେ ଖେଳାଯାଇଥିବା ପ୍ରଥମ ଟେଷ୍ଟରେ ୮୦ ରନ୍ର ଇନିଂସ ଖେଳିଥିଲେ।
ଟେଷ୍ଟ ର଼୍ୟାଙ୍କିଙ୍ଗରେ ଟପ-୫ ବିଷୟରେ କହିବାକୁ ଗଲେ ନ୍ୟୁଜିଲାଣ୍ଡର କେନ ୱିଲିୟମ୍ସନ ୮୯୩ ରେଟିଂ ସହ ଶୀର୍ଷ ସ୍ଥାନରେ ଅଛନ୍ତି। ଏହା ବ୍ୟତୀତ ଷ୍ଟିଭ ସ୍ମିଥ ୮୧୮ ରେଟିଂ ସହିତ ଦ୍ୱିତୀୟ, ଡାରିଲ ମିଚେଲ ୭୮୦ ରେଟିଂ ସହିତ ତୃତୀୟ, ବାବର ଆଜାମ ୭୬୮ ରେଟିଂ ସହିତ ଚତୁର୍ଥ ଏବଂ ଇଂଲଣ୍ଡର ଜୋ ରୁଟ ୭୬୬ ରେଟିଂ ସହିତ ପଞ୍ଚ୍ଚମ ସ୍ଥାନରେ ଅଛନ୍ତ।
ଦିନିକିଆ ର଼୍ୟାଙ୍କିଙ୍ଗରେ ୮୦୧ ରେଟିଂ ସହ ଭାରତୀୟ ଓପନର୍ ଶୁବମନ ଗିଲ ଦ୍ୱିତୀୟ ସ୍ଥାନରେ, ବିରାଟ କୋହଲି ୭୬୮ ରେଟିଂ ସହ ତୃତୀୟ ସ୍ଥାନରେ ଏବଂ ରୋହିତ ଶର୍ମା ୭୪୬ ରେଟିଂ ସହ ଚତୁର୍ଥ ସ୍ଥାନରେ ଅଛନ୍ତି। ଏହି ତାଲିକାରେ ଆଗକୁ ବଢି ନ୍ୟୁଜିଲାଣ୍ଡର ଡାରିଲ ମିଚେଲ ୭୨୮ ରେଟିଂ ସହ ପଞ୍ଚମ ସ୍ଥାନରେ ଅଛନ୍ତି। ଦିନିକିଆ ର଼୍ୟାଙ୍କିଙ୍ଗରେ ପାକିସ୍ତାନର ପୂର୍ବତନ ଅଧିନାୟକ ବାବର ଆଜମ ପ୍ରଥମ ସ୍ଥାନରେ ଅଛନ୍ତି। ୮୨୪ ରେଟିଂ ସହ ବାବର ଦିନିକିଆରେ ଏକ ନମ୍ବର ବ୍ୟାଟ୍ସମ୍ୟାନ ରହିଛନ୍ତି।
