ଦୁବାଇ,୩୧।୮(ପି.ଟି): ଦୀର୍ଘ ୫ ମାସ ପରେ ପ୍ରଥମଥର ପାଇଁ ନେଟ୍ସରେ ଅଭ୍ୟାସ କରିବାକୁ ଡର ଲାଗିଥିଲା ବୋଲି ଭାରତୀୟ ଅଧିନାୟକ ବିରାଟ କୋହଲି କହିଛନ୍ତି। ତେବେ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ସେସନ ପୂର୍ବରୁ ଏହି ପ୍ରଥମ ଟ୍ରେନିଂ ଆଶାଠାରୁ ଭଲ ଥିଲା ବୋଲି ସେ କହିଛନ୍ତି। ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) ଅଧିନାୟକ କୋହଲି କୋଭିଡ୍-୧୯ ମହାମାରୀ କାରଣରୁ ୫ ମାସ ପରେ ଟ୍ରେନିଂ ଆରମ୍ଭ କରିଥିଲେ। ଏହି ନେଟ୍ସ ସେସନ୍ରେ ଦକ୍ଷିଣ ଆଫ୍ରିକା ଦ୍ରୁତ ବୋଲର ଡେଲ ଷ୍ଟେଇନ୍ ଓ ଆରସିବି ଟିମ୍ ଡାଇରେକ୍ଟର ମାଇକ ହେସନ ଯୋଗ ଦେଇଥିଲେ।
ଗତ ୫ ମାସ ହେବ ବ୍ୟାଟ ଧରି ନ ଥିଲି। ତେଣୁ ଡରି ଯାଇଥିଲି। ତେବେ ଯାହା ଆଶା କରୁଥିଲି ତାହାଠାରୁ ବହୁତ କିଛି ଅଧିକ ଥିଲା ବୋଲି କୋହଲି କହିଛନ୍ତି। ୩୧ ବର୍ଷୀୟ କୋହଲି ଗତବର୍ଷ ଆରସିବିର ସର୍ବାଧିକ ରନ୍ ସ୍କୋରର ସାବ୍ୟସ୍ତ ହୋଇଥିଲେ। ଲକ୍ଡାଉନ୍ରେ ଫିଟ୍ ରହିଥିବାରୁ ନେଟ୍ ସେସନ୍ ଭଲ ହୋଇପାରିଥିଲା। ଲକ୍ଡାଉନ୍ ଜାରି ରହିଥିବା ବେଳେ ଟ୍ରେନିଂ ଜାରି ରଖିଥିଲି। ଏହା ଏବେ କାମ ଦେଇଛି।
ଆଇପିଏଲ୍ର ୧୩ତମ ସଂସ୍କରଣ ଖେଳିବାକୁ ଆରସିବି ଦଳ ଗତ ସପ୍ତାହରେ ଦୁବାଇରେ ପହଞ୍ଚିଥିଲା। ଆଇପିଏଲ୍ ସେପ୍ଟେମ୍ବର ୧୯ରୁ ଆରମ୍ଭ ହେବାର କାର୍ଯ୍ୟକ୍ରମ ରହିଛି। କୋଭିଡ୍-୧୯ ସଂକ୍ରମଣ କାରଣରୁ ଏଥର ଆଇପିଏଲ୍ ଭାରତରୁ ୟୁନାଇଟେଡ ଆରବ ଏମିରେଟ୍ସ (ୟୁଏଇ)କୁ ସ୍ଥାନାନ୍ତର ହୋଇଛି। କ୍ୱାରାଣ୍ଟାଇନ୍ରେ ରହିବା ପରେ ଆରସିବି ଦଳ ଶନିବାର ନେଟ୍ସରେ ଅଭ୍ୟାସ କରିଥିଲା। ୩ ସ୍ପିନର ୟୁଜବେନ୍ଦ୍ର ଚହଲ, ଓ୍ବାଶିଂଟନ ସୁନ୍ଦର ଓ ଶାହାବାଜ ନଦୀମ ଓ ଆଉ କେତେକ ପେସର ଅଭ୍ୟାସ କରିଥିଲେ। ସ୍ପିନରମାନେ ଭଲ ପ୍ରଦର୍ଶନ କରିଛନ୍ତି।
ଆରସିବି ୩ ଥର ରନର୍ସଅପ୍ ହୋଇଥିଲେ ମଧ୍ୟ କେବେ ଆଇପିଏଲ୍ ଟାଇଟଲ ହାସଲ କରିପାରି ନାହିଁ। ୨୦୧୬ରେ ଶେଷଥର ପାଇଁ ଆରସିବି ରନର୍ସଅପ୍ ହୋଇଥିଲା। ଶନିବାର ଦିଲ୍ଲୀ କ୍ୟାପିଟାଲ୍ସ ଦଳର ସଦସ୍ୟମାନେ ମଧ୍ୟ ସ୍ଥାନୀୟ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ଏକାଡେମୀରେ ପ୍ରଥମ ନେଟ୍ସ ସେସନ୍ରେ ଅଭ୍ୟାସ କରିଥିଲେ। ଦୀର୍ଘଦିନ ପରେ ଆମେ ଏକାଠି ହୋଇଛୁ। ତେଣୁ ଆମ ପାଖରେ ଆତ୍ମବିଶ୍ୱାସ ଭରପୂର ରହିଛି। ଭଲ ଆରମ୍ଭ ମଧ୍ୟ କରିଛୁ ବୋଲି ବାମହାତୀ ଅଭିଜ୍ଞ ବ୍ୟାଟ୍ସମ୍ୟାନ ଶିଖର ଧାଓ୍ବନ୍ କହିଛନ୍ତି। ଗତ ୬ ଦିନଧରି ଆମେ ଏଠାରେ ରହିଛୁ। ଏଠାକାର ପରିବେଶ ବେଶ୍ ଉଷ୍ମ ରହିଛି ବୋଲି ସେ କହିଛନ୍ତି। ମାନସିକ ଭାବେ ପ୍ରସ୍ତୁତି ହେବା ପାଇଁ ସକାରାତ୍ମକ ଚିନ୍ତା କରିବା ଆବଶ୍ୟକ। ଏଥର ଟୁର୍ନାମେଣ୍ଟରେ ଆମେ ଭଲ ପ୍ରଦର୍ଶନ କରିବୁ ବୋଲି ଧାଓ୍ବନ କହିଛନ୍ତି।
